[A:89]dang / srog thur 'dres pa'i bde nyams 'ur la dag pa sogs grub pa'i mtshan ma brtan po brnyes/ so lnga pa la bla ma'i bkas jo mo nang gi gdan sa mdzad/ kun mkhyen chen po zhes mtshan don dang mthun par kun gyis gsol/ so dgu pa la bzang ldan 'og mar mchod rten gyi sa chog mdzad pas sa g.yos shing me tog gi char bab/ de nas sku 'bum 'dzam gling rgyan mthong grol chen mo dpal yon can lha khang brgya rtsa brgyad pa/ rgya spangs mnyam par khru nyi brgya bco lnga pa/ rgyan bkod pa phun sum tshogs pa/ gdugs kyi lha khang na rin po che sna tshogs las grub pa'i dus 'khor yongs rdzogs kyi dkyil 'khor/ blos bslang bzhugs pa lo phyed dang bzhi la grub ste/ rab gnas mdzad dus 'dab ma yu ba dang bcas pa'i me tog gi char kha ba bab pa tsam babs/ lhun po bzhengs pas rgya mtsho rdol ba snyam/ zhes gsungs te chos kyi gsang mdzod rdol/ rnam gnyis la zhus mtshan dang mchan bu mdzad/ mkhan chen bsod grags pas gtso mdzad jo gdan tshogs pa la gzhal yas khang du dus 'khor gyi dbang mo che mdzad/ de ltar lo bcu gsum gyi bar du jo mo nang nyid du/ lo re bzhin mkhas pa mang po la dus 'khor rgyud 'grel dang byams chos rnams dus chos su gsung zhing ston dpyid sbyor drug gi dus khrid dang / tshogs chos/ dbyar dgun sku mtshams dam po rnams dus las ma yol bar chag med du mdzad nas/ stag lo la lo tsA ba blo gros dpal gdan sar bskos/ gzims khang bde ba can du bzhugs nas ri chos nges don rgya mtsho/ mngon rtogs rgyan dang rgyud bla'i Tikka rnams mdzad/ gong ma tho gan thi mur gyis gdan 'dren du bsngags pa'i gser yig pa byung dus/ gsang dam pos na thung du lo gnyis sngags pa'i cha lugs mdzad nas rta mgrin gyi thugs dam la rtse gcig tu bzhugs pas gser yig pa zlog/ sa skya/ ngam rings/ bzang ldan/ chu bzang rnams su snga phyir dge 'dun gyi tshogs chen po la