[A:89]དང་། སྲོག་ཐུར་འདྲེས་པའི་བདེ་ཉམས་འུར་ལ་དག་པ་སོགས་གྲུབ་པའི་མཚན་མ་བརྟན་པོ་བརྙེས། སོ་ལྔ་པ་ལ་བླ་མའི་བཀས་ཇོ་མོ་ནང་གི་གདན་ས་མཛད། ཀུན་མཁྱེན་ཆེན་པོ་ཞེས་མཚན་དོན་དང་མཐུན་པར་ཀུན་གྱིས་གསོལ། སོ་དགུ་པ་ལ་བཟང་ལྡན་འོག་མར་མཆོད་རྟེན་གྱི་ས་ཆོག་མཛད་པས་ས་གཡོས་ཤིང་མེ་ཏོག་གི་ཆར་བབ། དེ་ནས་སྐུ་འབུམ་འཛམ་གླིང་རྒྱན་མཐོང་གྲོལ་ཆེན་མོ་དཔལ་ཡོན་ཅན་ལྷ་ཁང་བརྒྱ་རྩ་བརྒྱད་པ། རྒྱ་སྤངས་མཉམ་པར་ཁྲུ་ཉི་བརྒྱ་བཅོ་ལྔ་པ། རྒྱན་བཀོད་པ་ཕུན་སུམ་ཚོགས་པ། གདུགས་ཀྱི་ལྷ་ཁང་ན་རིན་པོ་ཆེ་སྣ་ཚོགས་ལས་གྲུབ་པའི་དུས་འཁོར་ཡོངས་རྫོགས་ཀྱི་དཀྱིལ་འཁོར། བློས་བསླང་བཞུགས་པ་ལོ་ཕྱེད་དང་བཞི་ལ་གྲུབ་སྟེ། རབ་གནས་མཛད་དུས་འདབ་མ་ཡུ་བ་དང་བཅས་པའི་མེ་ཏོག་གི་ཆར་ཁ་བ་བབ་པ་ཙམ་བབས། ལྷུན་པོ་བཞེངས་པས་རྒྱ་མཚོ་རྡོལ་བ་སྙམ། ཞེས་གསུངས་ཏེ་ཆོས་ཀྱི་གསང་མཛོད་རྡོལ། རྣམ་གཉིས་ལ་ཞུས་མཚན་དང་མཆན་བུ་མཛད། མཁན་ཆེན་བསོད་གྲགས་པས་གཙོ་མཛད་ཇོ་གདན་ཚོགས་པ་ལ་གཞལ་ཡས་ཁང་དུ་དུས་འཁོར་གྱི་དབང་མོ་ཆེ་མཛད། དེ་ལྟར་ལོ་བཅུ་གསུམ་གྱི་བར་དུ་ཇོ་མོ་ནང་ཉིད་དུ། ལོ་རེ་བཞིན་མཁས་པ་མང་པོ་ལ་དུས་འཁོར་རྒྱུད་འགྲེལ་དང་བྱམས་ཆོས་རྣམས་དུས་ཆོས་སུ་གསུང་ཞིང་སྟོན་དཔྱིད་སྦྱོར་དྲུག་གི་དུས་ཁྲིད་དང་། ཚོགས་ཆོས། དབྱར་དགུན་སྐུ་མཚམས་དམ་པོ་རྣམས་དུས་ལས་མ་ཡོལ་བར་ཆག་མེད་དུ་མཛད་ནས། སྟག་ལོ་ལ་ལོ་ཙཱ་བ་བློ་གྲོས་དཔལ་གདན་སར་བསྐོས། གཟིམས་ཁང་བདེ་བ་ཅན་དུ་བཞུགས་ནས་རི་ཆོས་ངེས་དོན་རྒྱ་མཚོ། མངོན་རྟོགས་རྒྱན་དང་རྒྱུད་བླའི་ཊིཀྐ་རྣམས་མཛད། གོང་མ་ཐོ་གན་ཐི་མུར་གྱིས་གདན་འདྲེན་དུ་བསྔགས་པའི་གསེར་ཡིག་པ་བྱུང་དུས། གསང་དམ་པོས་ན་ཐུང་དུ་ལོ་གཉིས་སྔགས་པའི་ཆ་ལུགས་མཛད་ནས་རྟ་མགྲིན་གྱི་ཐུགས་དམ་ལ་རྩེ་གཅིག་ཏུ་བཞུགས་པས་གསེར་ཡིག་པ་ཟློག། ས་སྐྱ། ངམ་རིངས། བཟང་ལྡན། ཆུ་བཟང་རྣམས་སུ་སྔ་ཕྱིར་དགེ་འདུན་གྱི་ཚོགས་ཆེན་པོ་ལ་