[B:༤༢༥]བུ་ག་ནས་དཀྱིལ་འཁོར་གྱི་འཁོར་ལོ་སྣ་ཚོགས་པ་གླིང་བཞི་བྱེ་བ་ཕྲག་བརྒྱར་གདུལ་བྱའི་དོན་དུ་སྤྲོས་ཤིང༌། ཁྱད་པར་དུ་ཛམྦུའི་གླིང་འདིར། སྤྲུལ་སྐུ་འབྲས་བུའི་ཧེ་རུ་ཀ་བཅོམ་ལྡན་འདས་ཀྱེ་རྡོ་རྗེ་ཞལ་བརྒྱད་ཕྱག་བཅུ་དྲུག་པ་དང༌། དྲག་པོའི་ཆུང་མ་བརྒྱད་དང་མིང་མཐུན་པའི་གཽ་རཱི་ལ་སོགས་པའི་ལྷ་མོ་བརྒྱད་སྤྲུལ་ནས་དབང་ཕྱུག་རང་དང༌། དེ་བས་ཆེ་བ་གསུམ་དང་བཅས་པ་བཅོམ་ལྡན་འདས་ཉིད་ཀྱི་གདན་དུ་མཛད། དྲེགས་པ་ཅན་བརྒྱད་ནི་ལྷ་མོ་བརྒྱད་ཀྱི་གདན་དུ་བྱས། ཞེས་རྣམ་བཤད་དག་ལྡན་དུ་འབྱུང་ལ། གདན་གྱི་དག་པ་ལས། དྲག་པོའི་འཁོར་ཆེ་ཤོས་ནི་གཙོ་བོས་མནན། དྲག་པོ་རང་ནི་གྷསྨ་རཱིས་མནན་ནོ་ཞེས་བཤད་དོ། ། །དབང་ཕྱུག་གི་ཆུང་མ་བརྒྱད་དང༌། དེ་དག་གི་འཁོར་བསམ་གྱིས་མི་ཁྱབ་པ་ནི་ཕྲིན་ལས་པའི་ཚུལ་གྱི་དུར་ཁྲོད་བརྒྱད་དུ་བསྐྲད་ནས་དེ་རྣམས་ཀྱི་ཞེ་སྡང་བཏུལ། ཙུམྦྷ་དང་བསྲུབ་པ་ལ་སོགས་པ་བདེ་བ་ཆེན་པོའི་རྣམ་འཕྲུལ་གྱིས་འདོད་ཆགས་བཏུལ། སྔགས་ལ་སོགས་པ་གསུང་གི་སྒྲས་གཏི་མུག་བཏུལ་བར་མཛད་དེ། མདོར་ན་དབང་ཕྱུག་འཁོར་བཅས་ཀྱིས་འཇིག་རྟེན་པ་རྣམས་མ་རུངས་པར་བྱས་པས། དེ་དག་འདུལ་བའི་ཆེད་དུའོ། ། །གཉིས་པ་ནི། དེ་ལྟར་དུས་དབང་ཕྱུག་འཁོར་བཅས་བཏུལ་བའི་རྗེས་ཁོ་ན་ལ་གནས་རྡོ་རྗེ་བཙུན་མོའི་བྷ་གའི་ནང་དུ་ཚུད་པའི་གཞལ་ཡས་ཁང་པར་སྟོན་པ་བཅོམ་ལྡན་འདས་ཀྱེ་རྡོ་རྗེས་འཁོར་འཇིག་རྟེན་ལས་འདས་པ་དུ་མ་ལ། ཆོས་ཀྱེ་རྡོ་རྗེ་འབུམ་ཕྲག་བདུན་གྱི་བདག་ཉིད་ཅན་གྱི་རྩ་བའི་རྒྱུད་ཀྱི་རྒྱལ་པོ་ཆེན་པོ་དང༌། འབུམ་ཕྲག་ལྔ་པ་ཞེས་བྱ་བ་རྟོག་པའི་རྒྱུད་དང༌། དེའི་རྒྱུད་ཕྱི་མ་