[B:༤༢༦]དཔལ་ཕྱག་རྒྱ་ཆེན་པོ་ཐིག་ལེ། ཕྱི་མའི་ཕྱི་མ་ཡེ་ཤེས་སྙིང་པོ། ཐུན་མོང་མ་ཡིན་པའི་བཤད་པའི་རྒྱུད་ཡེ་ཤེས་ཐིག་ལེ། རྒྱུད་སྡེ་གཞན་དང་ཐུན་མོང་གི་བཤད་རྒྱུད་དཔལ་སམྤུ་ཊ་འབུམ་ཕྲག་སུམ་ཅུ་སོ་དྲུག་པ། སྙིང་པོའི་རྒྱུད་གྲུབ་པ་ངེས་བསྟན་ཐིག་ལེ། འབྲས་བུའི་རྒྱུད་དེ་ཁོ་ན་ཉིད་སྒྲོན་མེ་རྣམས་གསུངས་ཏེ། ཡེ་ཤེས་ཐིག་ལེ་ལས། དེ་ནས་གཞན་ཉོན་བདག་གིས་བཤད། ། །ཇི་ལྟར་རྒྱུད་ཀྱི་རིམ་པ་བཞུགས། ། །དཔལ་དང་ལྡན་པའི་རིན་ཆེན་རྒྱུད། ། །འབུམ་བདུན་གྱིས་ནི་མཚན་ཞེས་བྱ། ། །དེ་ནི་གཙོ་བོའི་རྩ་བའི་རྒྱུད། ། །སྐུ་བརྒྱད་བདག་ཉིད་རབ་ཀྱི་མཆོག ། །དེ་བརྟག་ཀྱེ་ཡི་རྡོ་རྗེ་ནི། ། །འབུམ་ལྔ་ཡི་ནི་མཚན་ཞེས་བྱ། ། །དཔལ་ལྡན་ཕྱག་རྒྱ་ཆེ་ཐིག་ལེ། ། །དེ་ཡི་ཕྱི་མའི་རྒྱུད་དུ་དྲན། ། །ཡེ་ཤེས་སྙིང་པོར་གྲགས་པའི་རྒྱུད། ། །དེ་ཡི་ཕྱི་མའི་ཕྱི་མའོ། ། །དགའ་མོ་ཡེ་ཤེས་ཐིག་ལེ་སྒྲ། ། །བཤད་པའི་རྒྱུད་ནི་གསང་བ་ཆེ། ། །གྲུབ་པ་ངེས་བསྟན་ཐིག་ལེ་ནི། ། །ཞལ་བཟང་མོ་དེ་སྙིང་པོ་དང༌། ། །དེ་ཁོ་ན་ཉིད་སྒྲོན་མེའི་མཚན། ། །འབྲས་བུའི་རྒྱུད་གྲགས་འཆད་པར་འགྱུར། ། །དེ་བདུན་དུ་ནི་བདག་གིས་བཤད། ། །ཅེས་གསུངས་སོ། ། །གལ་ཏེ་འབུམ་ཕྲག་ལྔ་པ་ལ་སོགས་པའི་རྒྱུད་རྣམས་ཤཱཀྱ་ཐུབ་པའི་སྔོན་རོལ་དུ་གསུངས་པ་གང་གིས་ཤེས་ཞེ་ན། མཁའ་འགྲོ་རྒྱ་མཚོའི་རྒྱུད་རྩ་འགྲེལ་ལས། རྒྱུད་ཆེན་པོ་མཁའ་འགྲོ་རྒྱ་མཚོ་ལ་སོགས་པ་འདིར་འདུས་པའི་གཟུགས་འབུམ་ཕྲག་སུམ་ཅུ་རྩ་དྲུག་གིས་རྩ་བའི་མདོ་རྣམ་པར་འཆད་པ་པོར་གྱུར་ཏོ། ། །རྒྱ་ཆེ་བ་ནི་དུ་མའོ། ། །མདོར་བསྡུས་པ་སྟོང་ཕྲག་བརྒྱད་ཅུ་རྩ་བཞི་ནི་ཆོས་ཀྱི་ཕུང་པོའི་ཚད་དེ་འདི་ནི་ངེས་པའོ། ། །འབུམ་ཕྲག་སུམ་ཅུ་རྩ་