[B:429]rgyal po indra bhU ti zhes bya bas/ shes pa dang bshad pa dang sems can la gsal bar byed do/ / /ces phyis gsang sngags 'byung bar lung bstan pa'i phyir/ rgyud 'di rnams thog mar gsungs pa yin no/ / /'o na bshad rgyud rdo rje phreng ba'i 'grel par bde mchog gsung tshul bshad nas/ de'i rjes su dzambu'i gling 'di nyid du/ ma ga dhAr bdud bzhi btul ba'i don du/ dpal dgyes pa rdo rje'i rgyud bstan pa chen po dang chung ngu'i rgyud bshad pa'i rgyud dang bcas pa bstan par mdzad do/ / /zhes bshad pa dang 'gal zhe na mi 'gal te/ de'i rgyud chen po ni 'bum phrag bdun pa yin la/ chung ngu ni 'bum phrag lnga pa yin zhing / bshad pa'i rgyud ni ye shes thig le la sogs pa yin no/ / /des na thog mar bde mchog gi chos 'khor bskor nas/ de nas dgyes pa rdo rje'i rgyud de rnams gsungs te/ slar yang sangs rgyas pa'i tshul bstan nas/ dgyes pa rdo rje'i rgyud chung ngu rnams gsungs pa yin la/ bde mchog gi rgyud ni phyis gsungs pa med pa'i phyir ro/ / /gnyis pa ni/ ston pa nges don du mngon par rdzogs par sangs rgyas te/ gsang sngags mtha' dag gsungs nas/ slar yang dzambu'i gling gi mi rnams kyi phyir/ dga' ldan du dam pa tog dkar por 'khrungs pa la sogs pa mdzad pa bcu gnyis kyis sangs rgyas pa'i tshul bstan te/ theg pa gsum gyi 'khor lo bskor nas/ chags bral gyi lam gyis 'dul bar mi nus pa rnams kyi don du/ gsang sngags kyi rgyud sde bsdus pa 'ga' zhig gsungs shing / khyad par rtsa rgyud bsdus pa dpal