[B:430]kye rdo rje zhes bya ba brtag pa gnyis kyi bdag nyid can dang / bsdus rgyud thun mong ma yin pa'i bshad rgyud 'phags pa mkha' 'gro ma rdo rje gur dang / rgyud gzhan dang thun mong gi bshad rgyud dpal sambu Ta rnams gsungs pa las/ 'dir rtsa rgyud kyi dbang du byas na/ gnas phun sum tshogs pa rdo rje btsun mo'i bha ga ni/ dka' 'grel rdo rje'i tshig btu bar/ gnas phun sum tshogs pa gsal bar bya ba'i phyir/ bha ga ces bya ba smros te ye shes kyi bdag nyid kyi phyir/ bem po ma yin pa'i khang pa brtsegs pa gru bzhi sgo bzhi pa/ 'jig rten las 'das pa'i rgyan gyi khyad par gyis spras pa/ tshad med pa'i bsod nams kyi rgyu las byung ba de ni bha ga ste de na'o/ / /'di nyid gang yin zhe na skal ba dang ldan pa de dag la ni/ rgyal po'i khab la sogs pa tha mal pa'i gnas 'di dag nyid de ltar snang ba'o/ / /zhes gsungs so/ / /ston pa phun sum tshogs pa ni/ sprul pa'i sku bcom ldan 'das kye rdo rje zhal brgyad phyag bcu drug pa ste/ rgyud phyi ma las/ phyag ni bcu drug zhal brgyad pa la sogs pa gsungs so/ / /'dir gtum ston sogs bod kyi 'grel byed kha cig sku gsung thugs snying po kye rdo rje bdag med ma/ ku ru kulle rnams kyis gsungs par 'dod mod/ bstan pa gcig la ston pa drug 'byung ba shin tu ngo mtshar ro/ / /'khor phun sum tshogs pa ni rdo rje snying po la sogs pa dpa' bo'i 'khor bye ba phrag brgyad cu dang / bdag med la sogs pa rnal 'byor ma'i 'khor ri rab kyi rdul dang mnyam pa dang / gzhan yang 'gro ba rgyud yongs su dag pa lha dang mi bsam gyis mi khyab pa