[B:431]dang bcas pa'o/ / /dus phun sum tshogs pa ni/ dka' 'grel rdo rje'i tshig btu bar/ 'di ltar bcom ldan 'das kyi sprul pa'i sku mi lo brgyad cur dzambu'i gling du bzhugs pa de srid la/ rgyud rin po che 'di ni yang nas yang du ma gsungs kyi/ dus gcig na lan cig gsungs pa kho na ste/ de bas na/ 'di yi dus ni dus gzhan las khyad par du 'phags pa kho na'o/ / /zhes gsungs so/ de ltar phun tshogs bzhi 'dzom pa'i tshe/ chos phun sum tshogs pa gsung bar bzhed nas/ ston pas rdo rje snying po la spyan gyis gzigs zhal 'dzum pa mdzad de/ thugs dpal gyi be'u las 'od zer phyung nas bskul bas rdo rje snying po stan las langs te/ bla gos phrag pa gcig tu gzar nas pus mo g.yas pa'i lha nga sa la btsugs te/ thal mo sbyar ba btud nas/ ye shes kyi dbang po de bzhin gshegs pa thams cad kyi sku dang gsung dang thugs kyi snying po rje btsun gsang ba las ches shin tu gsang ba'ang bstan par 'tshal na/ de rnams ji lta bu zhig lags zhes zhus pas/ e ma ho zhes pa ngo mtshar che ba'i tshig dang / legs so zhes gtang rag byin nas/ zhus pa dang lan gyi sgo nas brtag pa gnyis kyi bdag nyid le'u nyi shu rtsa gsum/ shlau ka bdun brgya lnga bcu pa'i rgyud 'di gsungs pa dang / de bzhin du nam mkhar bem bcas dwang ba dang / zhes sogs kyis bsdus rgyud dam thun mong ma yin pa'i bshad rgyud 'phags pa mkha' 'gro ma rdo rje gur gsungs pa dang / 'di skad bdag gis thos pa'i dus zhes sogs kyis rgyud gzhan dang thun mong gi bshad rgyud dpal