[B:432]yang dag par sbyor ba rnams gsungs te/ 'di dag kyang drang don du dus rim can du gsungs par mngon no/ / /gsum pa ni/ ma 'ongs pa'i gang zag shes rab chung zhing tshe thung ba/ dbang po rtul ba rnams kyis rtsa rgyud chen po rnams gzung bar mi nus pas/ de dag gi don du rtsa rgyud dang bshad rgyud bsdus pa rnams gsungs pa yin te/ / /rdo rje gur las/ bcom ldan 'das ji ltar na spros pa las bsdus pa lags/ bskal pa bzang po las byang chub sems dpa' rnams dang / so so skye bo tshe thung bar 'gyur na ji ltar na de rnams 'dzin par 'gyur/ ji ltar na de rnams thos par 'gyur/ ji ltar na sems par 'gyur/ bcom ldan 'das ji ltar na skye bo phal pa tshe thung bar 'gyur/ rdo rje 'dzin pas bka' stsal pa/ re zhig gang dag slob dpon du gyur pa de rnams rtsa ba'i ltung bar 'gyur ba dang / gang dag spyod pa po de rnams mi dge bcu'i las kyi lam la spyod par 'gyur ba dang / gang dag so so skye bo de dag srog chags gsod par 'gyur ba dang / gang dag ma mo'i tshogs rnams gcig tu 'dod pa la zhen par 'gyur ba ste/ de'i phyir na rgyud rnams kyi bstan pa rgyas pa ma yin no/ / /zhes gsungs shing / de'i don yang / slob dpon shAnti pas/ de bas na bsam gtan gyi bdud rtsi'i ro ma myong bas/ thos pa dang bsam pa'i shes rab tsam la chags bzhin du 'chi ba'i dus byed par ma gyur cig snyam du dgongs pas ched du gzhung rgyas pa mi snang bar byin gyis brlab pa'o/ / /zhes bshad do/ / /kha cig rgyud 'bum phrag lnga pa 'dar byed kyi gling na yod do zhes 'chad pa ni lung 'di dang