[B:434]thams cad kyi don mdor bsdus nas bstan par go / /rtul pos sdud pa pos gling gzhi gsungs par go ba yin gyi/ sangs rgyas kyis chos bstan pa'i dus phyis sdud pa pos bcug pa'i tshig ma yin te/ yin na rgyud ston pa pos de la bshad pa mdzad pa mi rigs pa la/ rgyud du ma las gleng gzhi'i bshad pa gsungs pa'i phyir/ ston pa nyid kyis gsungs par nges te/ gsang ba grub pa las/ slob dpon phal cher 'di skad brjod/ / /dpal ldan 'dus pa mdangs chen gyi/ / /rgyud kyi sdud par byed pa po/ / /dpa' bo 'jig rten dbang phyug zer/ / /bla ma'i zhabs kyi bka' drin gyis/ / /dpal ldan 'dus pa sdud pa po/ / /gzhan dag yod pa ma yin zhes/ / /bdag nyid 'ba' zhig smra bar byed/ / /rgyud mdzad pa ni thugs rdo rje/ / /gsung pa po de brjod pa'ang de/ / /de las gzhan dag yod min pas/ / /bde chen las gzhan gsungs pa med/ / /'di skad bdag thos tshig gang dang / / /bzhugs zhes bya ba'i tshig gnas pa/ / /thugs kyi rdo rje bdag nyid kyi/ / /sangs rgyas kun la bstan pa yin/ / /zhes so/ / /gsum pa la gnyis/ 'phags pa'i yul du 'phel tshul dang / de bod du ji ltar byung ba'i tshul lo/ / /dang po ni/ sprul pa'i sku ye shes kyi mkha' 'gro mas/ rnal 'byor gyi dbang phyug birWa pa la/ rgyud dang man ngag mtha' dag gdams shing / snyan brgyud bzhis byin gyis brlabs te/ 'di dag gi lo rgyus kyang rje btsun chen pos mdzad pa ltar shes par bya'o/ / /slob dpon des mthu stobs kyi dbang phyug Dombhi he ru ka la gdams te/ de'ang slob dpon 'di rgya gar shar