[A:91]ngal kun spangs te/ /nyin mtshan kun tu brtse bas 'doms mdzad pa'i/ /bka' drin mtshungs med khyod la gus phyag 'tshal/ /zhes pa ste/ gong du brjod pa ltar/ chos rje rnam gsum dang / kun mkhyen chen po la sogs pa'i theg chen thun mong min pa'i dge ba'i bshes gnyen mtshad nyid yongs su rdzogs pa rnams yun ring du brten/ rgyal ba'i gsung rab dgongs 'grel dang bcas pa'i glegs bam rnams la nyin mtshan 'khor yug tu gzigs/ de yang gzhan gyi kha 'gram bcog par 'dod pa'i slob gnyer byed lugs kyis gags thug chen mo'i dus su bslu'o zhes yang yang gsung zhing / rang nyid rang rgyud 'dul ba dang / gzhan gyi sems la gang phan gyi gsan sbyong mdzad lugs kho na mdzad pas/ mtho ris dang thar pa'i lam la zhugs pa'i skyes bu gsum gyi lam thun mong dang thun mong ma yin pa'i gnad mtha' dag la gzhan gyis mi 'phrogs pa'i rang byan chub/ legs par nyams su bzhes pa'i myong ba thon/ gnad du bsnun nas gzhan la ston pa'i gsung ngag byang / de'i stobs kyis khams dang dbus dang mnga' ris sogs dang / nye skor gyi dge ba'i bshes gnyen dang / dgon pa so so'i mkhan po bla ma sogs don du gnyer ba yang mang rabs su 'byung zhing de rnams la/ rang gis nus na/ nam phyed kyi dus su/ spyan sngar phyin nas/ dbang dang / lung dang rjes gnang dang dmigs rim lta bu gang zhus na'ang / do nub 'phyis 'dug pas sang byed bya ba lta bu mi gsung bar gang zhus de ma thag tu/ dpe cha la gsung dgos pa zhig yin na'ang phyag dpe rnyed ma thag tu gsung bar bdag gis lan mang du nyams su myong ngo / /res 'ga' don gnyer ba med pa'i skabs srid