[A:100]'jug la sogs pa la gzhon nu nyid nas sbyangs shing legs par goms pas/ nam mkha'i snying po'i mdo dang / byang sa nas gsungs pa'i byang sems kyi rtsa ltung dang | sbom po dang / nyon mongs can dang / de min gyi nyes byas la sogs pa'i bcas mtshams la mkhas pa'i phul du phyin zhing / ji ltar bshad pa'i mtshams las nam yang ma 'das par mdzad pas/ byang sems kyi sdom pa'i yon tan mtha' dag yongs su rdzogs pa yin no/ /gsang sngags sdom pa'i yon tan rdzogs tshul ni/ skal bzang skye bo'i 'jug ngogs bla na med// zab mo rdo rje theg pa'i dga' ston gyis/ /rang gzhan rtag tu bde la 'god mdzad pa'i/ /rdo rje 'dzin pa'i mchog la gus phyag 'tshal/ /ces pa ste/ rdo rje theg pa ni/ gsang sngags spyod pa'i tshul 'byung ba/ /de bas kyang ni dkon pa ste/ /zhes u dum wa ra'i me tog las sangs rgyas 'jig rten du 'byon pa dkon zhing / de bas kyang gsang sngags 'jig rten du 'byung ba dkon te/ mar me mdzad nas shAka thub kyi bar gyi sangs rgyas gzhan gyis ma gsungs par sgron gsal sogs nas bshad pa ltar shin tu rnyed dka' ba dang / gang gis sems can mnyam med don/ /mya ngan mi 'da' byed par nus/ /zhes pa ltar spyi don che ba dang / mdo sngags so so'i lam gyi 'tshang brgya ba 'dod pa'i phyogs la yang / don gcig na yang ma rmongs dang / /zhes sogs ltar gdul bya shin tu dbang rnon gyi chos su bshad pa dang / mdo sde'i phyogs rkyang pas 'tshang rgya ba mi srid kyi/ sngags kyi lam gnon dgos par mang du gsungs pa rnams ni don la gnas pa ste rgyu mtshan du ma'i sgo nas skal ba mchog dang ldan pa'i skye bo'i 'jug ngogs zla med pa yin la/