[A:13]dmar grib byad kha la sogs kyis/ /mi tshugs sngags 'chang gnod sbyin rigs phyir ro/ /zhes sogs mang du mthong na'ang/ phyis yi ge rnams brlag nas ma rnyed do| |de la bu dpon don grub rgyal po dang / dpon yig dpal 'byor bzang po gnyis byung ba kho bo ni/ de gnyis khyim so sor ma gyes gong du/ sha ru bla ma mgon po rgyal mtshan zhes bya ba la lung pa 'di'i shi dge gson las mtha' dag byed pa bu slob mang rags dang bcas pa zhig gi bu mo lnga tshar lha mo skyabs zhes bya ba/ bud med kyi yon tan du ma dang ldan pa zhig khyim thabs su blangs pa las skyes so/ /dus ni/ bstan rtsis yongs grags ltar na rgyal ba mya ngan las 'das nas lo gsum stong lnga brgya dang sum cu/ dus 'khor lugs kyi rtsis lugs 'thad ldan ltar na/ gnyis stong gnyis brgya gya gcig 'das pa sa skyong zhes bya ba| shing mo bya'i hor zla bzhi pa sa ga zla ba'i tshes gsum/ skar ma smin drug la skyes so zhes ma las thos so/ /gza' sbyor sogs kyang / 'dod na brtsis pas gsal mod snang chung ngo / /pha sku mched gnyis kyang / bla ma dang dkon mchog la dad pa dang / dpon sa la gus pa dang / 'khor 'bangs gnyen 'dun la byams pa dang / shes rab che zhing / khyad par phyi ma ni/ skya sgom gyi tshul du/ rje btsun 'jam dbyangs sogs kyi bsgom bzlas la shin tu brtson la/ rgya bod kyi rgyal rabs dang bstan rtsis sogs kyi yig tshang la shin tu 'dris pas/ 'dis sbyar ba'i yig tshang rgyas 'bring bsdus pa sogs mang ngo / /snga ma ni/ chos rje sems dpa' chen pos mkhan po dang | rgya ston shAkya bzang pos slob dpon mdzad de rab tu byung / dge sbyong shAkya 'od zer du btags/ dgon pa la zhen che zhing bla ma