[A:47]nyes bshad 'byed pa'i shes rab gnyis phan tshun 'dren pa bzhin du 'phel ba'i smon lam cung zad thebs par gdon mi za'o/ /
bzhi pa ni/ dri med bslab gsum rin chen gzhal med khang / /kun gsal mkhyen brtse'i gzi 'od rab tu 'bar/ /gzhan phan bsdu bzhi'i phrin las them skas can/ /thub bstan sgron me mchog la gus phyag 'tshal/ /zhes pa/ yon tan gyi rten bslab gsum ni gzhal med khang / brten pa/ rang don mkhyen brtse ni 'od stong 'bar ba dang / gzhan don bsdu bzhi ni/ them skas dang skye tshal dang / dpag bsam gyi shing la sogs pa'i gzugs su bkod nas/ 'jig rten gsal byed nyi ma bzhin du/ bstan pa'i sgron me mchog nyi ma lta bu yin zhes pa'o| |gzhan rnams bshad zin la/ bsdu dngos bzhi ni/ mdo sde rgyan las/ sbyin mtshungs de ston len 'jug dang / /bdag nyid rjes su 'jug rnams kyis// snyan par smra dang don spyod dang / /don mthun nyid du 'dod pa yin/ /zhes sbyin pa ni/ phar phyin drug gi zang zing gi sbyin pa dang mtshungs/ snyan par smra ba ni/ phyin drug sogs kyi lam de dang de gsal bar ston pa dang / don spyod pa ni/ bstan pa de nyams su len du 'jug pa dang / don mthun pa ni/ gzhan la gang bstan pa de bzhin du rang yang nyams su len pa'o/ /de rnams las/ dang po ni/ sbyin shugs kyi longs spyod che tshad ni ma byung la/ gang byung bla ma'i dus mchod la dmigs te/ dge 'dun rnam dag la gtong ba dang / bla ma'i dgongs pa bskangs phyir du/ zhig gsos dang rten bzhengs dang / dge 'dun 'du ba'i ched du| sbyin bdag la gtong ba sogs byas te/ rang don du cung zad kyang mi 'dzin