[A:131]drin shin du che bas/ bdag legs su 'dod pa rnams kyis 'di'i byas shes dang drin rgyun du bsam par bya'o/ /de nas bzung ste/ stag lo zla ba bcu pa'i nyer cig gi bar la/ chos kyi rgyal po lo chen gyis dgon pa 'di gzhi gzung thugs phab pa'i sgo nas 'chad rtsod rtsom gsum dang / khyad par 'dul ba'i ngang tshur gtso bor mdzad pa'i 'phrin las kyi phyag phyi legs par mdzad de/ nyid kyis kyang 'chad pa dang / rtsod pa dang rtsom pa dang / dge 'dun gi skyong dar dang / sbyin bdag gi bsam pa bskang ba la sogs pa bla ma'i zhabs tog dang rgyal ba'i bstan pa spyid dgos kyi gsos su 'gyur nges thams cad la brtson pa gong nas gong du 'phel bar mdzad pas/ kun gyis bstod pa dang bkur sti dang phun sum tshogs pa thams cad ches cher rgyas par gyur tau/ /de nas/ dam pa'i dgongs pa rdzogs phyir brtson pas na/ /gangs can skye bos bsam las 'das gyur pa'i/ / mdzad pa kun la brtson pa'i khur chen bzhes/ /snying stobs rmad du byung ba de la 'dud/ ces pa ni/ chos kyi rgyal po lo chen de nyid zhing gzhan du gshegs ma thag nas/ phyogs kyi sbyin bdag dang bu slob mtha' dag bsdus/ bu chen gyi gtso bo shang pa kun mkhyen chen po shes rab dpal bzang pa dang / chos lung rin po che bsod rin pa la sogs pas thog drangs pa'i dge ba'i bshes gnyen bzang la mang ba phebs pa'i tshogs dpon/ hor rgyal po se chen gan gyi dbon po rgyal ban gzhon nu theng nge zhes bya ba/ chos rje lo chen nyid kyi mkhan bur gyur pa/ rgyal bu dge sbyong bud dha shrI bha dra zhes bya bas mdzad pa'i dge 'dun rnam dag brgya phrag bdun brgyad tsam gyis zhag mang po'i bar du gsol 'debs mdzad/