མཁས་བཙུན་ཡོན་ཏན་རྒྱ་མཚོ།
དེ་ཉིད་ལ་ཁོ་བོ་ཅག་གི་དཔལ་ལྡན་བླ་མ་དམ་པ་ཡོན་ཏན་རྒྱ་མཚོ་པས་ལོ་མང་པོའི་བར་དུ་འབྲལ་བ་མེད་པར་བསྟེན་ཅིང་། ཆོས་རྗེ་ཉིད་ལ་མངའ་བའི་ཡོན་ཏན་ཐམས་ཅད་ཡོངས་སུ་རྫོགས་པར་ཐོབ་པ་ཡིན་ནོ།། འདི་ཉིད་ཀྱི་རྣམ་པར་ཐར་པ་རགས་རིམ་བརྗོད་ན། འཁྲུངས་ཡུལ་ནི་མདོག་གི་སྤེན་པ། གདུང་རུས་ལྡིང་ཡིན་ཅིང་། གཞོན་ནུ་ལ་རབ་ཏུ་བྱུང་ནས་ཐུགས་རྗེ་རྒྱལ་མཚན་ཞེས་མཚན་དུ་བཏགས་ལ། མདར་དུ་མདར་བྱང་སྐྱབས་དང་སློབ་དཔོན་སྤྱང་སྟོན་རྡོ་རྗེ་རྒྱལ་མཚན་གྱི་དྲུང་དུ་བསྙེན་ནས། དམ་པའི་ཆོས་མངོན་པ་ཀུན་ལས་བཏུས་པ་དང་། ཚད་མ་རྣམ་པར་ངེས་པ། རིགས་གཏེར་རྣམས་མཁས་པར་མཛད་ནས་བཤད་པ་དང་གྲྭ་སྐོར་ཡང་མཛད་དེ། གདན་ས་ཆེན་པོ་དཔལ་ལྡན་ས་སྐྱར་བྱོན་ནས། བླ་མ་ཆེན་པོ་དུས་འཁོར་བ་ཡེ་ཤེས་རིན་ཆེན་གྱི་དྲུང་དུ། དུས་འཁོར་དང་། ཀྱེའི་རྡོ་རྗེའི་རྒྱུད་དང་མངོན་རྟོགས་རྒྱན་ལ་སོགས་པ་རྣམས་གསན་ཅིང་། བླ་མ་འཇམ་དབྱངས་ཆེན་པོ་ལ་ཀྱེའི་རྡོ་རྗེའི་རྒྱུད་གསུམ་གདམས་ངག་དང་བཅས་པ་དང་། རྒྱས་པའི་བསྟན་བཅོས་ཚད་མ་རྣམ་འགྲེལ། མངོན་པར་རྟོགས་པའི་རྒྱན། སྤྱོད་འཇུག་ལ་སོགས་པ་མང་དུ་གསན། འུ་སྟོན་ཀུན་བཟང་དཔལ་ལ་མངོན་རྟོགས་རྒྱན། ཚད་མ་རྣམ་ངེས། འདུལ་བ་མདོ་རྩ་ལ་སོགས་པ་མང་དུ་གསན་ཅིང་མཁྱེན་པར་མཛད་ནས། རྗེ་དུས་འཁོར་ཞབས་པའི་ཆགས་ཕྱི་ལ་གོང་དུ་ཡང་བྱོན་ཅིང་། བསྟན་པ་ལ་བྱ་བ་རྒྱ་ཆེར་མཛད་ནས་ཐུགས་དམ་ལ་གཞོལ་བར་དགོངས་ཏེ། བོད་ཡུལ་དུ་གཤེགས་པར་ནན་གྱིས་ཞུས་ནས་གདན་སར་བྱོན་ཞིང་། དེ་མ་ཐག་ཇོ་མོ་ནས་ཆོས་རྗེ་ཀུན་སྤངས་ཆེན་པོ་ཉིད་བསྟེན་ཏེ། རི་ཁྲོད་ཆེན་པོ་དེ་ཉིད་ལས་གང་དུ་ཡང་མ་གཡོས་པར་ལོ་སུམ་ཅུ་རྩ་བརྒྱད་བཞུགས་ནས། ཐོས་པ་དང་བསམ་པ་དང་བསྒོམས་པས་དུས་འདའ་བར་མཛད་དེ། བསྟན་པའི་བྱ་བ་དང་། འགྲོ་བའི་དོན་ཡང་རྒྱ་ཆེར་མཛད་པ་ཡིན་ནོ།། དེ་ཉིད་ཁོ་བོ་ཅག་གིས་ལོ་ལྔའི་བར་དུ་འབྲལ་མེད་དུ་བསྟེན་ནས། དབང་དང་། སེམས་འགྲེལ་སྐོར་གསུམ་གྱི་ འབྲོ་པ། རྭ་པ། བི་བྷཱུ་ཏི་ནས་བརྒྱུད་པའི་ཤ་ཝ་རི་པའི་སྐོར། ས་སྐྱ་པཎ་ཆེན་ནས་བརྒྱུད་པའི་སྲོག་རྩོལ། གྱི་ཇོ། ཙ་མི། དཔྱལ་པ། མན་ལུང་གུ་རུ་རྣམས་ནས་བརྒྱུད་པའི་ མན་ངག་ཆ་ལག་དང་བཅས་པ་ཡོངས་སུ་རྫོགས་པར་ཐོབ་པ་ཡིན་ནོ།། །།
(2) རྭ་ལུགས།
རྭ་པའི་ལུགས་ལྟར་ན། དུས་ཀྱི་འཁོར་ལོའི་འགྲེལ་ཆེན་ལ་སོགས་པ། བྱང་ཆུབ་སེམས་དཔའི་འགྲེལ་པའི་སྐོར་འདི་རྣམས་རྒྱ་གར་དུ་རྒྱལ་པོ་གསུམ་གྱི་རིང་ལ་བྱུང་སྟེ། དེ་ཡང་རྡོ་རྗེ་གདན་དབུས་སུ་བཞག་པའི་ཤར་ཕྱོགས་ག་ཛ་པ་ཏི གླང་པོའི་བདག་པོ ར། རྒྱལ་པོ་དེ་ཝ་པཱ་ལ། ལྷོ་ཕྱོགས་ན་ར་པ་ཏ ིམིའི་བདག་པོ ར། རྒྱལ་པོ་ཛའུ་གངྒ་པ། ནུབ་ཕྱོགས་ཨ་ཤྭ་པ་ཏ ིརྟའི་བདག་པོ ར། རྒྱལ་པོ་ཀ་ན་ཀ་འུ་ཛ་ཞེས་པ་ཡོད་པའི་ཚེ་བྱུང་ངོ་།། དེ་ལ་རྒྱ་གར་ཤར་ཕྱོགས་སུ་ཡུལ་བྷཾ་ག་ལ། བྷ་རེན་དྲ། ཨོར་ཝི་ས། ཀ་མ་རུ་བཞི་དང་། དབུས་ཀྱི་མ་ག་དྷཱ་རྣམས་སོ།།
ཙི་ལུ་པཎྜི་ཏ།
དེ་དུས་ན་ཤར་ཕྱོགས་ཨོར་ཝི་སར་སྐུ་འཁྲུངས་པ། ཙི་ལུ་པཎྜི་ཏ་ཐེག་པ་མཐའ་དག་མཁྱེན་པ་དེས། རཏྣ་གི་རི་བི་ཧཱ་ར་ རིན་ཆེན་རི་བོའི་གཙུག་ལག་ཁང་ དང་། བི་ཀྲ་མ་ཤཱི་ལ་ རྣམ་པར་གནོན་པའི་ངང་ཚུལ། རྒྱལ་པོ་དེ་ཝ་པཱ་ལས་བཞེངས་པ་ དང་། ནཱ་ ལན་ད་ རྣམས་སུ་མདོ་རྒྱུད་ཀྱི་གླེགས་བམ་ཐམས་ཅད་གཟིགས་ཤིང་། ཁྱད་པར་དུ་ཕ་རོལ་ཀྱི་དམག་གི་འཇིགས་པ་མེད་པ། རཏྣ་གི་རི རིན་ཆེན་རི་བོ འི་གཙུག་ལག་ཁང་དུ་མདོ་རྒྱུད་རྣམས་གཟིགས་པས། ཚེ་གཅིག་གིས་སངས་རྒྱས་འགྲུབ་པ་ལ་གསང་སྔགས་བླ་མེད་དགོས་པར་མཁྱེན། དེ་ཉིད་ཕྱིན་ཅི་མ་ལོག་པར་མཁྱེན་པ་ལའང་སེམས་འགྲེལ་སྐོར་གསུམ་དགོས་པ་ཤམྦྷ་ལ་ན་ཡོད་དོ་ཞེས། ཡི་དམ་གྱི་ལྷས་ལུང་བསྟན་པ་ལ་བརྟེན་ནས་ཤམྦྷ་ལར་གཤེགས་པར་དགོངས་ཏེ། ཚོང་པ་དུ་མ་དང་འགྲོགས་ནས་བྱང་ཕྱོགས་སུ་ཟླ་བ་གཅིག་ཙམ་བྱོན་པ་ན། རི་ཞིག་གི་འགྲམ་དུ་མི་ལུས་བོངས་ཤིན་ཏུ་ཆེ་བ་གཅིག་དང་མཇལ། ཁྱོད་གར་འགྲོ་གསུང་བ་ལ། བདག་ཤམྦྷ་ལར་བྱང་ཆུབ་སེམས་དཔའ་ལ་ཆོས་ཉན་དུ་འགྲོ་ཞེས་བྱས་པས། དེར་ཁྱོད་ཀྱིས་བགྲོད་པར་མི་ནུས་ཤིང་ཚེའི་བར་ཆད་དུ་འགྲོ་བས།