la sogs pa gsan pa'i dus su/ bla ma bag tsam bsnyung ba byung ba na/ gtsang ston 'di la chos ma phogs kyi bar la nga ma bsad nga ma bsad ces/ mkha' 'gro ma la gsol ba btab nas gdams pa thams cad rdzogs par gnang ngo // de nas 'u yug tu lnga bcu pa la byon nas nub ma'i mda'/ rgyal khab ces par gzhi phab ste/ phu ru dben gnas kyang mdzad cing / gag tshangs kyi phu'i brag phug tu'ang thugs dam yun ring du mdzad nas grub pa thob ste/ dbang dang zab lam gyi khrid dang 'grel pa skor gsum cha lag dang bcas pa'i gzhung bshad mang du gsungs/ gsal sgron bzhi dang gces bsdus la sogs pa'i gdams pa'i bstan bcos kyang mang du mdzad nas/ dgung lo brgyad cu'i bar du bzhugs te/ bstan pa la bya ba rgya cher mdzad pa yin no lo rgyus 'di rnams ni rje btsun nyid kyi gsung la chos dbang gis zin bris mdzad pa'i gsung sgros rgyas pa'i nang bzhin bris pa yin zhing / 'ga' zhig gis sras kyi mtshan yab la btags pa dang / se ston dang bar ston gnyis la mkhan slob zhus dus yu mo zhes mtshan du btags zhes pa'i nor ba mang du bris 'dug pa la yid ma rton cig/
sras dharma shwa ra/
de nyid kyis dgung lo lnga bcu rtsa lnga pa la/ rigs kyi sras bskrun pa'i cho ga mdzad pa las/ sras dharma shwa ra 'khrungs te/ sngon gyi bag chags kyis klog yig kyang gzhon nu la mkhyen/ dgung lo bcu gnyis pa la dbang mdor bstan gsungs/ bcu drug pa nas 'grel chen gyis thog drangs pa'i sems 'grel skor gsum gsungs la/ gzhan yang spyod phyogs dang / dbu tshad dang / lam rim dang sngags kyi rgyud sde dang sgrub thabs mang po rnams/ dgung lo sum cu'i bar du slob gnyer mdzad cing mkhas par sbyangs nas gzhan phan rgya chen po yang mdzad do//
nam mkha' rgyal mtshan/
de nyid kyi sras grub thob nam mkha' rgyal mtshan zhes pa gtsang gi 'o lung gi se mo che'i dgon par bzhugs pa las/ grub thob se mo che zhes kyang grags pa de nyid kyis yab la dus kyi 'khor lo'i dbang yongs su rdzogs pa dang / sems 'grel skor gsum gdams ngag dang bcas pa rnams thob cing / 'grel chung padma can dang sgrub thabs dang man ngag phran tshegs 'ga' zung yab kyi lcam mo sprul sku jo 'bum las kyang thob la/ rje btsun yu mos mdzad pa'i bstan bcos 'ga' zhig dang / yab kyis mdzad pa'i ro bcud stong mthun la sogs dang / 'bro pa'i bla ma gong ma'i gsung sgros bsgrigs pa 'od zer phreng ba dang / jo btsun khong gis mdzad pa'i dri med rgyan rnams ni/ bla ma dharma shwa ra las sems 'grel skor gsum gyi gzhung / gdams ngag dang bcas pa gsan la/ 'gos dbang btsan las rigs tshogs la sogs pa gsan cing / mkhas par grags pa mkhar sar ba nam mkha' 'od las gsan pa yin no// bla ma 'di ni ting nge 'dzin la dbang 'byor pas mngon par shes pa chags thogs med pa brnyes la rin rtse/ dbu ma pa/ shog po gnas brtan la sogs la lung bstan mdzad pa rnams kyang ji lta ba bzhin du byung zhing / sku tshe mang po dran la/ rdzu 'phrul du ma'ang ston par mdzad ces thos so// grub thob nyid kyis phyag ris su mdzad pa'i rnam thar gyi yi ge dang / skye ba 'di dang 'dir 'khrungs kyi ri mo ras ris su bris pa yang kho bos mthong zhing / grub thob chen por gdon mi za bar 'khums