byin gyis brlabs pas zhag re la sho lo ka stong re zin par gyur nas/ rgyud 'grel thams cad thugs la bzung ste rgya gar du byon/ rab tu byung bas tsi lu pa zhes grags so// de nas slob dpon de/ ka ta ka'i rgyal po'i gnas su bzhugs pas slob ma gsum byung ste/ de rnams kyis rgyud 'grel rnams glegs bam du 'dri bar zhus nas bris so// gcig slob ma tha mal pa cig byung / gcig dza yA ka ra gubta zhes pa grub pa brnyes pa zhig byung / gcig shar phyogs bha ga lar 'khrungs pa pi to A tsaRya zhes pa shin tu mkhas pa zhig byung ste/ des byang chub sems dpa'i chos skor ma lus pa thugs su chud cing sku nyams su bzhes so// de nas yul der rgyal po gzhan gyi dmag gi gnod pa byung nas glegs bam thams cad dong du sbas te bros so// dmag gyes nas bltas pas kye'i rdo rje dang / bde mchog gi rgyud gnyis kyi 'grel pa'i smad mi 'dug nas 'bri bar zhus pas/ mkha' 'gro mas sbas pas 'drir mi rung gsung ste ma gnang nas slar rgya gar shar phyogs su gshegs so// der pi to ba la paNDi ta A tsaRya zhes kyang grags shing / de nyid kyis/ ba ren trar sku 'khrungs pa'i slob dpon dus zhabs pa chen po la gsungs shing / des kyang yongs su rdzogs par mkhyen nas thugs nyams su bzhes so// kha cig na re dus zhabs pa de nyid kyis sgrol ma 'grub nas ci 'dod pa zhu ru yod pas sgrol mas lung bstan nas/ shambha lar byon pa spyan ras gzigs kyis lam nas bsus nas ma la ya'i tshal dbus kyi dkyil 'khor gyi khang par khrid de/ dbang bskur rgyud 'grel pa rnams gsungs/ gdams pa dang dpe rnams kyang gnang ste slar rgya gar du byon no// de nas shar phyogs puShpa gr-i ha zhes bya ba'i grong khyer du bzhugs pas/ slob ma'i mchog bzhi byung ste/ dus zhabs pa gnyis pa dang / dul ba'i 'byung gnas blo gros dang / sengge rgyal mtshan dang / mtha' yas rnams so//
nA lan dra pa/
de la dus zhabs pa gnyis pa ni/ rgya gar shar phyogs manydzu ha de shar sku 'khrungs pa/ mtshan bo dhi pa zhes kyang zer/ nA lan da pa zhes kyang grags so// cig ratna ka ra dang gcig tu 'dod pa ni mi 'thad de/ de ni sA dhu pu Ta'i slob ma yin pas dus 'phyi bas so// zhes gsung / yang 'ga' zhig na re/ dus 'khor zhabs pa gnyis pas ratna ka ra gubta la gsungs/ des nA lan dar dar bar byas zer ba yang mi 'thad de/ de gnyis grogs mched yin cing / dus zhabs pa gnyis pa nyid kyis nA lan dar byon cing / dus kyi 'khor lo'i lha khang yang bzhengs nas paNDi ta mang po slob mar bcug pa'i lo rgyus bris pa mthong ba'i phyir ratna ka ra mi dgos gsung / de nyid kyis ma ga dhAr dar na gzhan thams cad du'ang dar bar 'gyur ro snyam du dgongs nas/ ma ga dhA'i rgyal po shing stan can gyis byed pa'i dus su nA lan dar byon nas/ gtsug lag khang gi sgo gong du rnam bcu dbang ldan dang de'i 'og tu/ gang gis mchog gi dang po'i sangs rgyas mi shes pa des mtshan yang dag par brjod pa mi shes so// gang gis mtshan yang dag par brjod pa mi shes pa des rdo rje 'dzin pa'i ye shes kyi sku mi shes so// gang gis rdo rje 'dzin pa'i ye shes kyi sku mi shes pa des sngags kyi theg pa mi shes so// gang gis sngags kyi theg pa mi shes pa de thams cad ni 'khor ba pa ste bcom ldan 'das rdo