rje 'dzin pa'i lam dang bral ba'o// de lta bas na mchog gi dang po'i sangs rgyas ni bla ma dam pa rnams kyis bstan par bya zhing / thar pa don du gnyer ba'i slob ma dam pa rnams kyis mnyan par bya'o// zhes pa'i saM skr-i ta bris pa/ der gnas pa'i paNDi ta lnga brgya tsam gyis gzigs pas/ thugs su ma shong ste brtsad pas/ chos kyi rang bzhin zab cing rgya che bas thams cad yid mgu nas slob mar gyur te/ dus kyi 'khor los thog drangs pa'i sems 'grel rnams gsan to// de rnams kyi nang nas mchog tu gyur pa manydzu kIRti dang / 'da' byang chub sems dpa' dang / paNDi ta ri bo pa dang / shAnta gubta dang / a bhi yuka ta dang / a bha yA ka ra gubta dang / puNya chen po dang / kha che gam bhI ra dang / gu Na rakShi ta dang / so ma nA tha dang / tsa mi la sogs pa'i mkhas pa mang du byung nas shin tu dar bar gyur to// de nas bal po ye rang gi paNDi ta sa manta shrI bha dras mkhas pa lnga la gsan cing / gtso bor manydzu kIRti'i rjes su 'brang ngo //
rwa chos rab/
de la snya nam snang yul du sku 'khrungs pa'i rwa lo tsA ba rdo rje grags kyi dbon po rwa chos rab kyis/ 'jigs byed/ dgra nag gdong drug pa ste nag po skor gsum/ he ru ka mngon 'byung / phag mo mngon 'byung / mgon po mngon 'byung ste/ mngon 'byung gsum dang / a bhi dhA na dang / saM pu Ti rnams dang / chos chung drug la sogs pa rnams thugs su chud nas/ dus kyi 'khor lo gsan par dgongs te/ bal po'i mthil du byon nas/ paNDi ta sa manta shrI lo lnga/ zla ba bcu/ zhag lngar bar chad med par bsten nas/ dbang / bshad pa/ man ngag gi bka' rnams zhus shing / paNDi ta bod du spyan drangs nas/ rgyud 'grel pa cha lag dang bcas pa zhus shing bsgyur/ gtan la phab/ thams cad kyis bsnyen bkur cher byas te/ nyi ma gcig la gser srang sum brgya phul/ slar skyid grong bar du bskyal bas bla ma yang shin tu mnyes te/ paNDi ta 'bum phrag gsum pa'i prog zhu dang / chags lham/ paNDi ta nyid kyi phyag dril dus 'khor nas gsungs pa'i tshad ldan yang gnang ngo //
ye shes sengge/
de la de nyid kyi sras bla ma ye shes sengges gsan cing / de la de nyid kyi sras rwa 'bum sengges gsan la/ de la bla ma rga los zhus so//
bla ma rga lo/
bla ma rga lo ni/ bod kyi rgyal po'i dus su blon po dba' sang shi pho nyar btang ste/ rgya nag las rgya nag gi skad btsun pa hwa shang spyan drangs pa dang 'brel par me nyag me nyag gi skad btsun pa tsen tser gyur pa zhig kyang spyan drangs te/ rgyal po'i mchod gnas su gyur cing / sngags 'chang du gyur pa'i rgyud las/ yar 'brog tu me nyag gzhon nu snying po zhes bya ba byung / de'i sras gzhon nu sengge/ de'i sras rig 'dzin snying po/ de'i sras rdo rje sengges rong gi mkhar phug bzung / de las sras bzhi byung ba'i gcen po ye shes rdo rje zhes bya ba grub pa brnyes pa zhig byung / des grub thob dbang phyug rgyal po zhes bya ba'i gdan sa dben dmar bzung ngo //
rje btsun rga lo/
de'i sras rje btsun rga lo ni/ yab kyi mtshan ltas la brten nas/ sngon gyi khams pa rga lo tsA ba'i skye bar dgongs nas mtshan du'ang de nyid btags/ lo gsum bzhes dus kha che paN chen ngur smrig tu byon pa'i tshe/ ma cig jo