jo btsun tshul khrims rin chen gyis gser srang drug phul/ g.yo ru ba 'gar ston/ mang yul ba ston ma sri dar/ smon gro pa 'jam sgom la sogs pas zhabs tog che bar byas kyang / so sor spong tsam ma gtogs pa gzhan ma gnang ngo //
sgom pa dkon mchog bsrung /
'phan yul grab tu sku 'khrungs pa'i sgom pa dkon mchog srungs zhes pa/ mngon pa dang sa sde dang / sman dpyad kyi gtsug lag la shin tu mkhas shing yon tan che bar grags pa de nyid kyis/ 'byor ba thams cad bsdus pas gser srang drug byung ba dang / bdag nyid kyi ske la dar yug gcig btags te lus phul nas zhabs thog yun ring du mdzad cing / ji ltar gsungs pa bzhin bsgrubs pas gzhung gdams ngag dang bcas pa rnams ma lus par gnang ngo // bla ma 'di nyid kyi phyi rten ring bsrel mang po 'byung ba zhig 'phan yul rag ma'i nang na dus ding sang yang 'dug go/ grab na phyi rten che ba zhig bzhugs pa ni dus phyis zhig nas rje btsun gyi phyag dpe 'ga' zung dang / rus pa'i rgyan drug dang dam pa rgya gar gyi snyan rgyan la sogs pa nang tshangs su bzhugs pa rnams kyang 'thor nas/ kho bo cag gi lag tu'ang 'ga' re byung ngo //
bla ma sgro ston gnam brtsegs/
bla ma sgro ston gnam la brtsegs ni/ 'phan yul sgro ris su sku 'khrungs shing / dgung lo nyi shu rtsa drug pa la dbus sde'i dge bshes lo ro pa'i drung du/ g.yu che chung 'dres pa phul gang rgyags su bsnams nas byon te/ lnga bcu rtsa brgyad kyi bar du slob gnyer rgya cher mdzad do// lo ro pa'i zhal nas 'chims sngags pa chen po zhig yod pa la 'di rdo rje 'dzin pa dang 'dra/ kun 'di la ltos na ba lang dang 'dra bar 'dug 'on kyang nga yis kyang lo tsA ba chen po leng shAkya brtson 'grus/ 'brog mi shAkya ye shes/ 'gos khug pa lhas btsas gsum la thug pas rdo rje 'dzin pa dang 'dra bar song ste/ dus 'khor shes pa cig byung na da dung ba lang dang mtshungs par 'dug gsung bas/ bla ma gnam la brtsegs dus 'khor la shin tu dad de/ dus 'khor su'i shes dris pas/ paNDi ta so ma nA thas mkhyen zer nas/ de ma thag der byon te/ paNDi ta la gser srang bcu gnyis dang rta nag po cig phul nas zhabs tog yun ring du byas kyang so sor spong tsam las ma gnang / bla ma dkon mchog srungs la'ang gser nyung ngu phul nas zhus kyang / paNDi ta'i bka' rgya yod gsungs nas ma gnang ngo // de nas paNDi ta rgya gar du gshegs pa'i shul du/ snor bzangs su lo gsum dang / yer par lo gsum/ bla ma lha rje go bteg mdzad de zhus pas gzhung gdams ngag kun rdzogs par gnang ngo // phyis paNDi ta bod du byon pa'i dus su lha rje sgom pas sgro ston la/ gzhung gdams ngag ma lus pa byin 'dug ces pa gsan nas/ sgro ston dang mjal ma thag da chos gang dgos pa sbyin no gsung ba la/ gzhon pa'i dus ni rdzogs par gnang du ma 'dod/ da rgas pas mi zhu lags byas pas/ khyod dkon mchog srungs kyi chos kyis ngoms 'dug ste/ de nga las ma byung na su las byung gsungs nas phyag phab po// sgro ston gyis de shin tu mad lags/ bla ma chen po'i bka' drin lags zhes zhus pas/ chos gang gang byin zhes gsung ba la/ 'di dang 'di rnams gnang lags zhes zhus pas/ de rnams las lhag pa nga la'ang med/ thams cad tshang 'dug pas su la'ang ma ster/