gzhan la ster ri mna' skyol gsungs nas/ mgul pa la phreng ba bcug pa dang / bla mas ni rdzogs par ma gnang / bla ma dkon mchog srungs la zhus pa lags mod/ ces zhus pas phreng ba phud de/ ngan pa 'di gsungs nas dbu la bye ma spar gang rgyab ste/ da chud ma gsan gsung ba la de skad gsung mi 'tshal/ chud ci ste gson zhes zhus nas bkur bsti du ma mdzad de/ paNDi ta'ang mnyes par mdzad do// de ltar paNDi ta dang bla ma dkon mchog srungs la/ byang chub sems dpa'i 'grel pa skor gsum/ gzhung gdams ngag cha lag dang bcas pa ma lus par gsan no// de nyid zhi bar gshegs pa'i dus su brtsigs pa'i phyi rten khang bu brtsegs pa'i mchod rten zhig sgro ris gnas sgang na bzhugs so zhes thos nas dad pas kun nas bslang ste/ kho bo dpon slob mang ba zhig gis phyag dang bskor ba la phyin pa'i tshe/ mchod rten ni zhig nas rjes tsam yang mi snang ngo // der rab byung rgan po zhig 'dug pa la/ bla ma gnam la brtsegs kyi phyi rten zhig 'di phyogs na bzhugs zer ba/ ding sang ni mi snang khyed kyis thos sam zhes dris pas/ sa cung zad 'bur ba 'di nyid rang na khang bu brtsegs pa'i mchod rten chung ngu zhig yod pa 'ga' zhig dge bsnyen dad pa zhes pa'i phyi rten yin zhes gleng / 'ga' zhig sgro ston gnam brtsegs kyi phyi rten yin zhes gleng ba ring bsrel du ma 'byon pa zhig 'dug pa la/ mi mang pos ring bsrel 'dod pa'i phyir du mchod rten gyi sa brkos pas lo 'ga' zung na mchod rten yang zhig tsha tsha'i nang na gzungs bzhugs pa'i mjug na/ bla ma gnam la brtsegs kyi thugs dgongs par gyur cig ces pa gda' ba bdag gis kyang mthong na'ang / de nas gso mkhan med pas rjes med 'di bzhin du gyur gda' zhes/ gnas sgang gi dkon gnyer ba zhig bdag gzhon nu'i dus na zer lags zhes zer ro// mchod rten gyi shul yin zer ba'i sa 'bur tsam 'dug pa la/ phyag btsal zhing mos gus byas nas btsal bas kho bo cag rnams kyis kyang ring bsrel brgya phrag du ma rnyed do// ngo mtshar bar 'khums te mchod rten gyi shul gyi sa rnams las tsha tsha bsgrubs te/ khang bu brtsegs pa'i mchod rten zhig kho bos rgyu sbyar te sgrubs pa ding sang yang gnas sgang na bzhugs so//
grub chen yu mo/
bla ma yu mo ni/ gdung rus rngam zhes pa yin zhing / yab rngam khro bo zhes pa yin la/ gangs ti se'i rtsar sku 'khrungs shing sku mched shAkya rgyal mtshan/ gzhon rdor byang / tshul she /bla ma chen po ste bzhi yod pa'i chung ba yin no// rim gyis la stod lhor byon nas dgung lo bcu pa la lho mtsher gnas su mkhan po stag lo gzhon byang bzhugs pa la/ rab tu byung ste mtshan 'dogs pa'i dus na/ khyed kyi gdung rus rngam du 'dug dad pa shin tu che ba cig 'dug pas/ rngam btsun dad pa rgyal po bya bar 'dogs so zhes gsungs nas/ de ltar mtshan btags/ mkhan po la chos gsan cing lo gnyis bzhugs/ de nas don mo rir byon te/ se ston sgra gcan 'dzin dang / dge gnas su bar ston thos pa dga'i drung du mngon pa dang pha rol tu phyin pa'i skor mang du gsan/ khong rang gnyis kyis yu mo pa zhes mtshan bla dwags su btags so// de nas dba' dge mthong dang / snyegs la dbu ma dang tshad ma gsan/ de nas 'dul ba gsan par dgongs pa la/ de dus sog 'dul ba 'dzin