so// de nyid phar tshad mngon sum la sogs pa la mnga' brnyes pa'i chos rje mngon grwa pa rin chen rtse mo zhes grags pa bo dong e ru bzhugs pa de nyid dang / sde snod dang rgyud sde du ma la dbang 'byor pa chos rje 'jam dbyangs gsar ma shes rab 'od zer zhes grags pa/ 'dol chung dang rkyang 'dur du bzhugs pa de dag gis g.yas ru smon dkar gyi grong chung dgon par gdan drangs nas/ dbang dang gdams ngag ma lus par zhus/ sems 'grel skor gsum cha lag dang bcas pa rdzogs par gsan nas/ dbang dang gzhung bshad/ gdams ngag kyang mang du spel zhing 'gro ba'i don rgya cher mdzad do//
chos sku 'od zer/
'di nyid la man ngag dge sdings dang rgyang ro gser sdings su bzhugs pa'i/ sngags mtshan nyid du ma la mnga' brnyes pa dge ba'i bshes gnyen chen po chos kyi 'od zer zhes thog mar grags shing / 'gro ba'i mgon po chos rgyal 'phags pas/ chos sku 'od zer zhes btags pas phyis de ltar grags pa de nyid kyis/ sems 'grel skor gsum gyi dbang gdams ngag gzhung bshad dang bcas pa rdzogs par gsan la/
chos rje kun spangs chen po/
de nyid la ngam phyar spang sgang du sku 'khrungs pa'i chos rje kun spangs chen po zhang thugs rje brtson 'grus zhes grags la/ jo nang pa chen po zhes kyang grags pa mtshan nyid theg pa dang rgyud sde du ma la mkhas par sbyangs shing / ting nge 'dzin la dbang 'byor pa/ chos rje 'jam dbyangs chen po bzhi thog pa dang / kun spangs ri khrod pa grags pa rgyal mtshan dang / mkhan chen rin po che bsod nams sengge la sogs pa dge ba'i bshes gnyen skyes mchog du ma'i bla mar gyur cing / skye bo du ma smin grol gyi lam la bkod pa de nyid kyis bum pa gang byo'i tshul du thob pa yin no//
mkhas btsun yon tan rgya mtsho/
de nyid la kho bo cag gi dpal ldan bla ma dam pa yon tan rgya mtsho pas lo mang po'i bar du 'bral ba med par bsten cing / chos rje nyid la mnga' ba'i yon tan thams cad yongs su rdzogs par thob pa yin no// 'di nyid kyi rnam par thar pa rags rim brjod na/ 'khrungs yul ni mdog gi spen pa/ gdung rus lding yin cing / gzhon nu la rab tu byung nas thugs rje rgyal mtshan zhes mtshan du btags la/ mdar du mdar byang skyabs dang slob dpon spyang ston rdo rje rgyal mtshan gyi drung du bsnyen nas/ dam pa'i chos mngon pa kun las btus pa dang / tshad ma rnam par nges pa/ rigs gter rnams mkhas par mdzad nas bshad pa dang grwa skor yang mdzad de/ gdan sa chen po dpal ldan sa skyar byon nas/ bla ma chen po dus 'khor ba ye shes rin chen gyi drung du/ dus 'khor dang / kye'i rdo rje'i rgyud dang mngon rtogs rgyan la sogs pa rnams gsan cing / bla ma 'jam dbyangs chen po la kye'i rdo rje'i rgyud gsum gdams ngag dang bcas pa dang / rgyas pa'i bstan bcos tshad ma rnam 'grel/ mngon par rtogs pa'i rgyan/ spyod 'jug la sogs pa mang du gsan/ 'u ston kun bzang dpal la mngon rtogs rgyan/ tshad ma rnam nges/ 'dul ba mdo rtsa la sogs pa mang du gsan cing mkhyen par mdzad nas/ rje dus 'khor zhabs pa'i chags phyi la gong du yang byon cing / bstan pa la bya ba rgya cher mdzad nas thugs dam la gzhol bar dgongs te/ bod yul du gshegs par nan gyis zhus nas gdan sar byon zhing / de