ཉི་མའི་བུ་བསོ་ཁྲམ་ཅན་དང༌། དྲག་པོའི་བུ་ཐལ་དཀར་ཅན་དང༌། དབང་བྱེད་ཀྱི་བུ་མི་ཚུགས་པ་དང༌། རླུང་ལྷའི་བུ་མི་འཇིགས་པ་ལ་སོགས་པ་བྱུང་ངོ༌། །དེ་ལ་སྐྱབས་སེང་བུ་ལྔ་ཞེས་གྲགས་སོ། །དེའི་རྒྱལ་རྒྱུད་ཀྱི་རིམ་པ་ལས་གཉའ་ཁྲི་བཙན་པོ་བྱུང་བ་ཡིན་ཏེ། རྒྱལ་པོ་དམག་རྒྱལ་ཞེས་བྱ་བ་ལ་བུ་དགྲ་ངན་དང༌། འཐབ་དགའ་ལ་སོགས་པ་དགུ་བཅུ་གོ་དགུ་ཕ་དང་བརྒྱ་ཡོད་པས་ཡབ་དང་མཆེད་པོ་འཁྲུགས་ནས་སྲིན་པོའི་ཡུལ་དུ་འཐབ་པས་དགྲ་ངན་དཔུང་ཚོགས་བཅུ་གཉིས་པོ་ཐམས་ཅད་སྐྱབས་སེང་གི་བུས་བཅོམ་སྟེ་མིའི་བདག་པོ་འདི་ཉིད་ཀྱི་རིང་ལ་རྩོད་དུས་ཀྱི་འགོ་བཙུགས་ཏེ་མིང་གསལ་བར་བྱས་ཏེ་དེ་ཡང་སྐྱེ་དགུའི་ཚེ་ལོ་ཉི་ཁྲི་ཐུབ་པའི་དུས་སུ་བྱུང་སྟེ་དེ་ནས་ལོ་གཉིས་སྟོང་དུ་ཉེ་བ་ན་འཛམ་བུའི་གླིང་པའི་ཚེ་ལོ་བརྒྱ་ཐུབ་པར་གྱུར་ཏེ། དུས་ཕྱིས་བྱུང་བ་མ་ཡིན་པས་དེའི་རིགས་རྒྱུད་ཀྱང་མ་ཡིན་ནོ། །ལ་ལ་ན་རེ། ཐེའུ་རང་ལ་སོགས་པའི་རྒྱུད་ཡིན་ཟེར་ཏེ་དེ་ཡང་མ་ཡིན་ནོ། །ལ་ལ་ན་རེ། འདི་ནི་རྒྱ་གར་ཡུལ་བདུན་ནས་ཆད་དེ་མ་ག་དྷའི་རྒྱལ་པོ་གཟུགས་ཅན་སྙིང་པོའི་བུ་མ་སྐྱེས་དགྲ། དེའི་བུ་གཞོན་བུ་འཆར་བྱེད། དེའི་བུ་སྟོབས་མཆོག་དང་སྟོབས་ཆུང་ངོ༌། །སྟོང་ཆུང་ལ་སྲས་ལྔ་ཡོད་པའི་ལྔ་ཚིགས་མཚན་དང་ལྡན་པ་བྲམ་ཟེ་མཚན་མཁན་ལ་བསྟན་པས། མཁན་པོས་མཚན་འཁྲུལ་ཏེ་འདི་མཆེད་ལ་ངན་པས་སྤྱུགས་ན་བཟང་ཟེར་ནས་གཡོག་བདུན་དང་བཅས་སྤྱུགས་པ་ཡིན་ཟེར་ཏེ་དེ་ཡང་མ་ཡིན་ཟེར་ཏེ་བུ་ཕུ་བོ་སྟོབས་མཆོག་གི་རྒྱལ་པོས་ནུ་བོ་ཕྲོག་སྟེ། རྒྱལ་ས་ནུ་བོས་ཕྲོགས་ཏེ་ཕམ་པས་བུ་ཕོས་ལྷ་མ་ཧཱ་དེ་བ་བསྒྲུབས་ཏེ་མཐུ་བཏང་བས་སྟོབས་ཆུང་གི་འཁོར་ཐམས་ཅད་ཤི་སྟེ་ཕུ་བོས་བསྡུམས་བྱས། རྒྱལ་ས་གཏད་ནས་ནུ་བོ་ལ་ཡང་རྒྱལ་སྲིད་བགོས་ཏེ་བྱིན། བོད་དུ་བྱུང་ཞིང་འཕེལ་བ་མ་ཡིན་ནོ། ལ་ལ་ན་རེ་ཀོ་ས་ལའི་རྒྱལ་པོ་གསལ་རྒྱལ་གྱི་རྒྱུད་ལས་རབས་ལྔ་ན་སྲས་ལྔ་ཚིགས་གཅིག་མཚན་མཁན་འཁྲུལ་ནས་སྤྱུགས་པ་ལས་འཕེལ་ཟེར་བ་ཡོད། དེ་ཡང་མ་ཡིན་ཏེ་དེ་རྣམས་ལ་ཁུངས་ཐུབ་པའི་གཏན་ཚིགས་མེད་དོ། །ལ་ལ་ན་རེ། འགྲོ་བ་མི་ལ་རྗེ་མེད། དུད་འགྲོ་རྔོག་ཆགས་ལ་སྐྱེན་དུ་མེད་ནས་ལྷ་རི་གྱང་མཐོའི་ཁ་ནས་ཕྱའི་རྒད་པོ་གཅིག་གིས་ལྷས་སྤྱོན་ལན་གསུམ་བྱས་པས་ལྷའི་སྣོངས་བཅུ་གཅིག་བྱུང་སྟེ་དེ་ལ་མིའི་ལྷར་མི་འདོད་བྱས་ནས་གནམ་དུ་སྤུར་ཏེ་བཏང༌། སྲིད་པའི་ལྷ་རབས་མཆེད་བདུན་གྱི་བདུན་ཚིགས་སུ་སོང༌། མིང་ཡང་ལྷ་གར་མ་ཞེས་བྱའོ། །དེ་ནས་ཡང་ལྷ་རིའི་ཁ་ནས་ཕྱའི་རྒན་མོས་ལྷས་སྤྱོན་ལན་གསུམ་བྱས་པས་གནམ་རིམ་པ་བཅུ་གསུམ་གྱི་ཁ་ནས་གཉའ་ཁྲི་བཙན་པོ་བྱོན་པ་ཡིན་ཟེར། །བོན་པོ་ལ་ལ་ན་རེ་སེམས་ཅན་ཡིད་སྨོན་བྱས་པ་ལས་གནམ་ནས་ལྷའི་ལྷ་བཟང་སྟེ་བར་པ་བདུན་ཚིགས། རྗེ་ཡབ་ལྷ་བརྡལ་དྲུག སྲས་རྒྱལ་བུ་མཐིང་གེ་བྱུང༌། དེའི་སྲས་སྨོན་པ་བཙན། དེའི་སྲས་སྨོན་མི་དབུ་དཀར། དབུ་ནག དེའི་སྲས་སྟག་དགུ། གཟིག་དབུ། དེའི་སྲས་གཉའ་ཁྲི་བཙན་པོ། དེའི་སྲས་ཁྲི་རྩེ་འབུམ་བཞེར། དེའི་སྲས་ལྷ་ཐོ་རི་བྱོན་ཟེར་ཏེ་དེ་རྣམས་ཐམས་ཅད་མ་ཡིན་ནོ། །འོ་ན་གང་ལྟར་ཡིན་ཞེ་ན། རྒྱལ་པོ་སྲོང་བཙན་སྒམ་པོའི་ཞལ་ནས་འདི་ནི་རྒྱ་གར་གྱི་བད་ས་ལའི་རྒྱལ་པོ་འཆར་བྱེད་ལ། སྲས་རྒྱལ་པོ་ཤར་བའོ། །དེ་ལ་སྲས་གཉིས་བྱུང་བའི་ནུ་བོའི་རྒྱུད་ལ། བཙུན་མོ་དམ་པ་ལ་སྲས་ཤིག་བཙས་ཏེ། ཕུ་བོ་མིག་བྱ་མིག་ལྟར་མས་ཀྱིས་ཡར་འགེབས་པ། དཔྲལ་བའི་དབྱེས་ཆེ་བ། གཡུ་ཡི་སྨིན་མ་ཡོད་པ། སྣའི་གཟེངས་ལེགས་པ། སོ་དུང་སོ་འཁོར་བ་ཡོད་པ། ལག་པའི་སོར་མོ་ངང་པ་ལྟར་གསོལ་བས། དེ་ལྟས་ངན་ཞིག་འདུག་པས་གསོད་ཅིག་པར་གནང་ངོ༌། །དེ་ལ་བློན་པོ་རྣམས་ཀྱིས་མཚོན་གྱིས་འདེབས་པར་མ་ཕོད་པར། ཟངས་ཁ་སྦྱར་དུ་བཅུག་ནས་ཤིང་སྒྲོམ་བྱས་ཏེ་ནོར་སྐལ་དང་བཅས་པ་ཆུ་བོ་གང་གཱ་ལ་བསྐྱུར་བཏང་ངོ༌། །དེ་གྲོང་ཁྱེར་ཡངས་པ་ཅན་གྱི་ཆུ་ཁ་ནས་ཞིང་པས་རྙེད་དེ། དེ་ནགས་ཁྲོད་དུ་གསོས་པས་དེ་མཁར་གྱི་རྒྱལ་པོ་ཡིན་པས། རི་དྭགས་ཐམས་ཅད་ཀྱིས་རྩེད་ཟླ་བྱས། གཅན་གཟན་ཐམས་ཅད་ཀྱིས་ཟས་བསྐྱལ། དེར་མེ་ཏོག་ཐམས་ཅད་ཀྱིས་ཁ་བསྟན་ནོ། །དེ་ལ་རྒྱལ་བུ་ན་རེ།