དམྱལ་བར་སྐྱེས་ན་ཚ་གྲང་ལུས་ལ་བཅད་གཏུབ་ཀྱི་སྡུག་བསྔལ་དཔག་ཏུ་མེད་དོ། །ཡི་དྭགས་སུ་སྐྱེས་ན་བཀྲེས་སྐོམ་སྡུག་བསྔལ་དཔག་ཏུ་མེད་དོ། །བྱོལ་སོང་དུ་སྐྱེས་ན་གླེན་ལྐུགས་དང་འཇིགས་དངས་དང་བཀོལ་སྤྱོད་ཀྱི་སྡུག་བསྔལ་དཔག་ཏུ་མེད་དོ། །ད་ལྟ་མིར་སྐྱེས་པ་ནི་བསོད་ནམས་དང་སྐལ་བར་ལྡན་ནོ། །ཁྱོད་ཅག་རྣམས་ཀྱིས་སྦྱིན་པ་ཐོངས་ཤིག ལོངས་སྤྱོད་འཛད་པ་མེད་པ་ཐོབ་པར་འགྱུར་རོ། །སེར་སྣ་ནི་སྡུག་བསྔལ་ཡིན་ཏེ་སེར་སྣས་ནི་བདག་གི་དོན་ཡང་མི་འགྲུབ་ལ་གཞན་གྱི་དོན་ལྟ་ཅི་སྨོས། སེར་སྣའི་རྣམ་པར་སྨིན་པ་ནི་ངན་སོང་གསུམ་པོར་སྐྱེ་བས་སྡུག་བསྔལ་ཆེན་པོར་འགྱུར། སྦྱིན་པའི་ཕ་རོལ་ཏུ་ཕྱིན་པའི་ཆོས་བསྟན་ཏོ། །ཚུལ་ཁྲིམས་ལ་གནས་པར་གྱིས་ཤིག ལྷའི་ལུས་དང་མིའི་ལུས་ཐོབ་པོ། །ཚུལ་ཁྲིམས་འཆལ་བས་བདག་གི་དོན་མི་འགྲུབ་ལ་གཞན་གྱི་དོན་ལྟ་ཅི་སྨོས། ཚུལ་ཁྲིམས་ཀྱི་ཕ་རོལ་ཏུ་ཕྱིན་པའི་ཆོས་བསྟན་ཏོ། །བཟོད་པ་སྒོམས་ཤིག ཁོང་ཁྲོ་བས་ནི་བདག་དང་གཞན་ཡང་བསྲེགས། རང་གི་ལུས་ལོངས་སྤྱོད་ལ་མ་ལྟ་བར་བཟོད་པ་གྱིས་ཤིག གཟུགས་བྱད་ཕུན་སུམ་ཚོགས་པ་ཐོབ་པར་འགྱུར་རོ། །བཟོད་པའི་ཕ་རོལ་ཏུ་ཕྱིན་པའི་ཆོས་བསྟན་ཏོ། །བརྩོན་འགྲུས་རྩོམས་ཤིག ལེ་ལོས་ནི་རང་གི་དོན་མི་འགྲུབ་ལ་གཞན་གྱི་དོན་ལྟ་ཅི་སྨོས་ཏེ་བརྩོན་འགྲུས་བརྩམས་པས་དཀར་པོའི་ཡོན་ཏན་དང་ཆོས་རྙེད་པར་འགྱུར་རོ། །བརྩོན་འགྲུས་ཀྱི་ཕ་རོལ་ཏུ་ཕྱིན་པའི་ཆོས་བསྟན་ཏོ། །བསམ་གཏན་ལ་མཉམ་པར་ཞིག་ཅིག གཡེང་བའི་སེམས་བསྐྱེད་ན་རང་གི་དོན་མི་འགྲུབ་ལ་གཞན་གྱི་དོན་ལྟ་ཅི་སྨོས་ཏེ་བསམ་གཏན་ལ་མཉམ་པར་བཞག་པས་ཆོས་ཀྱི་གོ་དོན་ཟབ་མོ་ཐོབ་པར་འགྱུར་རོ། །བསམ་གཏན་གྱི་ཕ་རོལ་ཏུ་ཕྱིན་པའི་ཆོས་བསྟན་ཏོ། །ཤེས་རབ་ཀྱི་ཕ་རོལ་ཏུ་ཕྱིན་པའི་བློ་རྒྱ་ཆེན་པོ་སྦྱོངས་ཤིག མ་རིག་པའི་མུན་པ་འདི་སྡུག་བསྔལ་ལོ། །ཤེས་རབ་སྦྱངས་པས་བྱང་ཆུབ་སེམས་དཔའི་བློ་རྒྱ་ཆེན་པོ་ཐོབ་པར་འགྱུར་རོ། །གཏི་མུག་གིས་ནི་རང་གི་དོན་ཡང་མི་འགྲུབ་ལ་གཞན་གྱི་དོན་ལྟ་ཅི་སྨོས། ཤེས་རབ་ལ་སྤྱད་པས་ཆོས་ཐམས་ཅད་ཀྱི་རང་བཞིན་ཤེས་ནས་སངས་རྒྱས་ཐོབ་པར་འགྱུར་རོ། །ཤེས་རབ་ཀྱི་ཕ་རོལ་ཏུ་ཕྱིན་པའི་ཆོས་བསྟན་ཏོ། །སྤྱན་རས་གཟིགས་ཀྱི་སྤྲུལ་པའི་ཁྱེའུ་དེས། མི་དགེ་བ་བཅུ་ལས་བཟློག་དགེ་བ་བཅུའི་ཆོས་བཤད་ནས་ཆོས་ཁྲིམས་ལ་བཀོད་དོ། །ཕ་རོལ་ཏུ་ཕྱིན་པའི་ཆོས་དྲུག་བསྟན་ནས་མི་མཐུན་པ་དྲུག་བཟློག་པས་ལུས་མཛེས་ཤིང་བཟང་ལ་སེམས་དང་ཆོས་སུ་ལྡན་པ་སོ་སོ་ནས་ཐོབ་པོ། །ད་ལྟ་ཁྱད་པར་མི་ལུས་ཐོབ། ཆོས་དང་སྐལ་ལྡན་པ་ཡོད་པ་འདི་འཕགས་པ་སྤྱན་རས་གཟིགས་ཀྱི་བཀའ་དྲིན་ཡིན་ནོ། །དེ་ལྟར་བོད་ཡུལ་ཁ་བ་ཅན་ལ་ཐུགས་རྗེས་གཟིགས་པའོ། །དེ་རྣམས་ནི་ཆོས་ཀྱིས་བསྡུས་པའོ། །དེ་ནས་སྤྲེའུའི་རིགས་རྣམས་ཚན་པ་བཞིར་ཆད་དོ། །ཁ་བ་ཅན་འདིར་ནི་མིའི་འགྲོ་བ་སྤྲེའུ་དང་བྲག་སྲིན་མོའི་བུ་ཚ་ཤ་ཟན་གདོང་དམར་བ་དེ་རྣམས་འཕེལ་བར་གྲགས་ལ། འདུལ་བ་དཀའ་བས་གཅིག་ལ་གཅིག་མི་འཇིགས་ཏེ། སྤྲེའུ་རྒྱུད་བཞི་ལྔར་སོང་བ་དང་རིགས་བཞིར་སོང་ཏེ། རིགས་གཅིག་མགོ་བོ་སེར་པོར་བྱུང་ངོ༌། །རིགས་གཅིག་ནང་རིག་པ་བཀྲ་བ་མུ་ཟེ་བ་བྱུང༌། རིགས་གཅིག་སྣ་བཟང་བ་བྱད་བཞིན་མཚར་བ་བྱུང༌། རིགས་གཅིག་ལྟོ་ཡངས་ལ་བཟའ་བཏུང་ལ་དགའ་བ་བྱུང༌། དེ་ཡང་རིགས་བཞི་ནི། སེ་ཚེ་རིང་བ། སྨུ་ནོར་ཕྱུག་ལྡོང་མགོ་དྲག སྟོང་ཡིད་སྒམ་པར་བྱུང་སྟེ་དེ་དག་ནི་ཡོན་ཏན་ནོ། །དེ་རྣམས་འཐབ་ཅིང་རྩོད་ལ་རྗེ་མེད། སེ་དང་སྨུ། ལྡོང་དང་སྟོང་མིའུ་རིགས་བཞི་ཟེར་ཏེ། བོད་ཀྱི་རུས་ལ་སྔ་བ་ཡིན་ནོ། །བོད་ཀྱི་རྒྱལ་པོ་ལ་སྔ་བ་ནི་རྗེ་གཉའ་ཁྲི་བཙན་པོ་ཡིན་ཏེ། དེ་ལ་འདོད་ལུགས་ནི་མི་མཐུན་པ་མང་པོ་ཡོད་དེ། ལ་ལ་ན་རེ་སློབ་དཔོན་ཤེས་རབ་གོ་ཆས་མཛད་པའི་ལྷ་ལས་ཕུལ་དུ་བྱུང་བའི་གཏོར་མའི་བསྟོད་པའི་འགྲེལ་པ་ན་འདི་ལྟར་བཤད་དེ། ཡུལ་དབུས་ན་རྒྱལ་པོ་སྐྱབས་སེང་བྱ་བ་ལ་བཙུན་མོ་ལྔ་བརྒྱ་ཡོད་པ་སྲས་མེད་ནས་འདུ་འཛི་སྤངས་ཏེ་ལྷ་མོ་ཀྲི་སྣ་དང་དཀོན་ཀྲི་གཉིས་ཁྲིད་ནས་ནགས་སུ་སོང་བ་དང་དྲང་སྲོང་བདེན་པ་མཐོང་བ་གཅིག་ལ་བཙུན་མོས་གསོལ་བ་བཏབ་པས་དེས་མི་མ་ཡིན་པའི་བུ་ལྔ་བཀུག་སྟེ་ཕྱིན་བྱིན་ནས་ལྷའི་བུ་སྣ་ཚོགས་ཅན་དང༌།