སློབ་དཔོན་གྱིས་དེ་ལ། ཆོས་བྱེད་ན་ངས་བསླབས་སམ། གསུངས་པས། དེ་གནང་ན་ཤིན་ཏུ་ལེགས་པས་བདག་ལྷ་གཅིག་སྒོམ་པ་དང༌། སྙིང་པོ་གཅིག་ཟློས་པ་དང༌། སངས་རྒྱས་ཀྱི་དགོངས་པ་ཕྱིན་ཅི་མ་ལོག་པ་ཡང་དག་པའི་དོན་ཞིག་ཞུ་ཟེར་ནས། སློབ་དཔོན་གྱིས་ཁྱོད་ཀྱི་ཡིད་དང་མིག་སྔར་ཅི་ཡོང་གསུངས་པས། བྱིས་པས་སྨྲས་པ། བདག་ལ་ཡིད་ཡུལ་དང་མིག་སྔར་མ་ཧེའི་ཕྲུ་གུ་གཅིག་ཡོང་ཞུས་པས། སློབ་དཔོན་གྱིས་ཁྱེའུ་དེ་ལ་གདམས་པ། མ་ཧེའི་ཕྲུ་གུ་དེ་ཇོ་བོ་ཐུགས་རྗེ་ཆེན་པོའི་སྐུར་སྒོམས། རང་ཡང་ཐུགས་རྗེ་ཆེན་པོར་སྒོམས་ལ། སྙིང་པོ་ཡི་གེ་དྲུག་པ་ཟློས་ཤིག འཕགས་པའི་ཐུགས་ཀ་ནས་འོད་ཟེར་བྱུང་རང་ལ་ཕོག རང་གི་སྙིང་ཁ་ནས་བྱུང༌། འཕགས་པ་སྤྱན་རས་གཟིགས་ལ་ཕོག མ་ཧེ་དང་སྣང་བ་ཐམས་ཅད་ཐུགས་རྗེ་ཆེན་པོར་སྒོམས་ཤིག རང་སེམས་སྤྲོས་བྲལ་བདག་གཞན་གཉིས་སུ་མེད། །ཅིར་ཡང་མི་རྟོག་རྩོལ་མེད་ལྷུག་པར་ཞོག །སྣང་སེམས་ཆོས་ཉིད་སྐྱེ་བ་མེད་པ་ཡིན། །མ་རྟོགས་འཁྲུལ་པའི་སེམས་ཅན་བྱམས་དང་སྙིང་རྗེས་སྐྱོངས། །ཞེས་གསུངས་པ་དང༌། ཁྱེའུ་དེས་སློབ་དཔོན་གྱིས་ཇི་ལྟར་གདམས་པ་བཞིན་བསྒོམས་བཟླས་བྱས་ཤིང་ཉམས་སུ་བླངས་པས་མ་ཧེ་བདུད་རྩིས་འཚོ་ཞིང་ཉིན་རེ་བཞིན་རྩ་བརྔས་ཏེ་དགོང་མོ་མ་ཧེ་ལ་རྩ་ཕོན་རེ་བཀལ་ནས་འོངས། སང་ཕོད་ལོ་དུས་སུ་སོང་བ་དང་མ་ཧེའི་ཕྲུ་གུའི་སྙིང་ཁ་ནས་ཚུར་གྲོད་པ་ལྟ་བུ་ཞིག་བྱུང༌། དེའི་ནང་ནས་ཁྱེའུ་དཀར་པོ་ཤེལ་ལྟར་དག་པ་ལག་ན་གསེར་གྱི་ཕྱག་ཤིང་ལ་མུ་ཏིག་གི་ཡི་གེ་དྲུག་པ་འབུར་དུ་དོད་པ་ཐོགས་པ་ཞིག་བྱུང་ནས། མ་ཧེའི་རྫི་བོ་ལ་ཕྱག་ཤིང་གཏད་དེ་དབང་བསྐུར་བྱིན་གྱིས་བརླབས་ནས་དངོས་གྲུབ་ཅི་འདོད་གསུངས་པས། མ་ཧེའི་རྫི་བོས་ཕྱག་འཚལ་སྐོར་བ་བྱས་ནས་བདག་གི་ལུས་འདི་འཕགས་པའི་སྐུར་གྱུར། ངག་བྱིན་གྱིས་བརླབས་ཏེ་ཡི་གེ་དྲུག་པས་འགྲོ་བ་རིགས་དྲུག་གི་དོན་བྱེད་པར་འདོད་ཅེས་ནས་གདམས་ངག་ཞུས་པས་སྤྲུལ་པའི་བྱང་ཆུབ་སེམས་དཔའི་ཞལ་ནས་ཡི་དམ་གྱི་ལྷ་རང་གི་སེམས་སུ་ཤེས་པར་གྱིས་ཤིག སྙིང་པོ་གསལ་དག་ཆོས་ཀྱི་རང་སྒྲ་ལ་ཤེས་པར་གྱིས། སེམས་རིག་པ་སྟོང་གསལ་དུ་ཤེས་པར་གྱིས། སྟོང་པ་ཆོས་སྐུ་སྐྱེ་མེད་དུ་ཤེས་པར་གྱིས། སེམས་ཅན་ཐམས་ཅད་ཀྱི་དོན་ལ་མི་སྐྱོ་བར་གྱིས། གསུངས་ནས་ལྷ་དེ་ནམ་མཁའ་ལ་འཇའ་ཡལ་བ་ལྟར་མི་སྣང་བར་གཤེགས་སོ། །དེ་ནས་མ་ཧེའི་རྫི་བོས་དགོང་མོ་དེ་བཞིན་མ་ཧེ་དེད་ནས་འོངས་པས་ཡུལ་མི་རྣམས་ཀྱིས་ཐུགས་རྗེ་ཆེན་པོ་འོད་སྒོར་རེ་བྱོན་པར་མཐོང་ནས། ཀུན་གྱིས་མ་ཧེའི་རྫི་བོ་ལ་ཕྱག་འཚལ་མེ་ཏོག་གཏོར། སྐོར་བ་བྱས་པས་མ་ཧེའི་རྫི་བོས་སྨྲས་པ། ཁྱེད་ཡུལ་མི་ཀུན་སུ་དང་ནོར། ང་ནི་མ་ཧེའི་རྫི་བོ་ཡིན་ཞེས་སྨྲས་པས། ཡུལ་མི་ཀུན་ན་རེ། ཁྱེད་ནི་འཕགས་པ་ཐུགས་རྗེ་ཆེན་པོའི་སྐུར་སྣང་ངོ༌། །བདག་ཅག་གི་ཕྱག་དང་མཆོད་པའི་གནས་ཡིན་ནོ། །ཞེས་སྨྲས་ནས། དེ་མཆོད་གནས་སུ་ཞུས་པས་མ་ཧེའི་རྫི་བོ་དེ་ལུས་མ་སྤངས་པར་ཕུང་པོ་ལྷའི་སྐུར་གྱུར་ནས་དག་པ་མཁའ་སྤྱོད་དུ་གཤེགས་ཏེ་ཞག་རེ་ལ་འཛམ་བུ་གླིང་དང་འགྲོ་བ་རིགས་དྲུག་གི་གནས་ལན་གསུམ་བསྐོར་ཞིང༌། སྐལ་ལྡན་རྣམས་དངོས་གྲུབ་སུ་འདོད་མཆོག་དང་ཐུན་མོང་གི་དངོས་གྲུབ་ང་ལ་ལོངས་ཞེས་གསུང་ཞིང་བྱོན་པ་ཡིན་ཏེ། སེམས་ཅན་ལས་ཀྱི་སྒྲིབ་པ་མ་དག་པ་རྣམས་ཀྱིས་མི་མཐོང་བ་ཡིན་ནོ། །ཕྱག་ཤིང་ལ་སྙིང་པོ་འབུར་དུ་དོད་ཡོད་དོ། །ནུབ་ཕྱོགས་པར་པ་ཏ་ནའི་གཙུག་ལག་ཁང་གི་སློབ་དཔོན་ཀླུ་སྒྲུབ་ཀྱི་དགོན་པ་གསེར་གྱི་བྲག་བྱ་སྐྱིབས་ཅན་བྱ་བ་ན་ད་ལྟ་ཡང་བཞུགས་སོ། །དེ་ནི་གསུང་རབ་བྱུང་བྱོན་པའི་ལོ་རྒྱུས་སོ། །སྤྱན་རས་གཟིགས་ཀྱི་སྐུ་རང་བྱུང་དུ་བྱོན་དུ་བྱོན་ནས་འགྲོ་དོན་ཇི་ལྟར་མཛད་པ་ནི། རྒྱ་གར་མ་ཧ་དྷའི་ནུབ་ཕྱོགས་ན་ཚོང་དཔོན་མཛེས་པའི་བློ་གྲོས་ཞེས་བྱ་བ་ཐུགས་རྗེ་ཆེན་པོ་ལ་མོས་པ། ཆོས་ལ་དད་པ། བརྩོན་འགྲུས་ཀྱི་ཕ་རོལ་ཏུ་ཕྱིན་པའི་དཀའ་བ་དང་དུ་ལེན་པ་ཞིག་ཡོད་པས། རྒྱ་མོན་གྱི་རི་ཁྲོད་ན་ཙན་དན་གྱི་སྡོང་པོ་གཅིག་ལ་སྐོར་བ་བྱེད་ཅིང་འཕགས་པ་སྤྱན་རས་གཟིགས་ལ་ཡང་གསོལ་བ་འདེབས་ཤིང༌། ཨོཾ་མ་ཎི་པདྨེ་ཧཱུཾ། ཞེས་ཡི་གེ་དྲུག་པའི་སྙིང་པོ་འདི་བཟླས་ནས་ཁོ་ཚེའི་དུས་བྱེད་ཁར་སྨན་ལམ་བཏབ།