།དེ་ནས་བྲམ་ཟེའི་ཁྱེའུ་བྲག་ཕུག་ལྷ་ཞལ་ཅན་བྱ་བར་སྒོམ་ཞིང་སྒྲུབ་པས་བྲག་དེ་ཤེལ་གྱི་མཆོད་རྟེན་རྡོ་རྗེས་བརྒྱན་པ་ཞིག་ཏུ་གྱུར་ནས། བྲམ་ཟེའི་ཁྱེའུ་ལུས་མ་བོར་བར་ཕུང་པོ་ལྷག་མེད་དུ་མཁའ་སྤྱོད་དུ་གཤེགས་སོ། །བྲག་ཤེལ་གྱི་མཆོད་རྟེན་དེ་ལ་སུས་སྐོར་བ་ལན་གསུམ་བྱས་ན་ངན་སོང་གསུམ་དུ་མི་འགྲོ་སྟེ། བྱང་ཆུབ་ཀྱི་ལམ་དུ་ཞུགས་པར་འགྱུར་ལ་བྲམ་ཟེའི་ཁྱེའུ་ནི་འཕགས་པ་སྤྱན་རས་གཟིགས་ཀྱི་སྤྲུལ་པ་ཡིན་པས་སེམས་ཅན་ཐམས་ཅད་ལ་ཐུགས་རྗེས་དུས་དྲུག་ཏུ་འགྲོ་བའི་དོན་མཛད་དོ། །ཐུགས་རང་བྱོན་དུ་བྱོན་པའི་ལོ་རྒྱུས་སོ། །གསུང་རང་བྱོན་དུ་ཇི་ལྟར་བྱོན་པའི་ལོ་རྒྱུས་ནི། དེ་ཡང་ཡང་དག་པར་རྫོགས་པའི་སངས་རྒྱས་ཀྱིས་ལུང་བསྟན་པ་ལ། འཕགས་པ་ཀླུ་སྒྲུབ་ཉིད། ལང་ཀར་གཤེགས་པའི་མདོ་ལས། སོ་སོ་རང་རིག་ཡེ་ཤེས་ནི། །རྟོག་གེ་རྣམས་ཀྱི་མ་ཡིན་ཏེ། །ཕྱི་མའི་དུས་སུ་གྱུར་པ་ན། །བསྟན་པ་སུ་ཡིས་འཛིན་པར་འགྱུར། །ཚུལ་གནས་འཛིན་པར་གྱུར་པ་ནི། །བློ་གྲོས་ཆེན་པོས་ཁྱོད་བྱོས་ཤིག །བདེ་གཤེགས་མྱ་ངན་འདས་གྱུར་ནས། །ལོ་ནི་ཉིས་བརྒྱ་ལོན་པ་ན། །ལྷོ་ཕྱོགས་བྷེ་ཏའི་ཡུལ་དུ་ནི། །དགེ་སློང་དཔལ་ལྡན་ཞེས་གྲགས་པ། །དེ་མིན་ཀླུ་ཞེས་འབོད་པ་ནི། །ཡོད་དང་མེད་ཀྱི་མཐའ་རྫོགས་ཤིང༌། །ང་ཡི་བསྟན་པ་འཇིག་རྟེན་འདིར། །བླ་མེད་ཐེག་པ་ཐེག་པ་རབ་བསྟན་ནས། །བདེ་བ་ཅན་དུ་དེ་འགྲོའོ། །ཞེས་གསུངས་སོ། །འཕགས་པ་སྤྲིན་ཆེན་པོའི་མདོ་ལས། ལི་ཙ་བྱི་གཞོན་ནུ་སེམས་ཅན་ཐམས་ཅད་ཀྱིས་མཐོང་ན་དགའ་བ་འདི། ང་མྱ་ངན་ལས་འདས་པའི་འོག དགེ་སློང་ཀླུ་ཞེས་བྱ་བར་བཟུང་ནས་ངའི་བསྟན་པ་རྒྱས་པར་བྱས་ཏེ། རིམ་གྱིས་འཇིག་རྟེན་གྱི་ཁམས་དྭངས་པའི་འོད་ཅེས་བྱ་བར་དེ་བཞིན་གཤེགས་པ་ཡེ་ཤེས་འབྱུང་གནས་འོད་ཅེས་བྱ་བར་མངོན་པར་རྫོགས་པར་སངས་རྒྱའོ། །ཞེས་ལུང་བསྟན་ཏོ། །རྔོ་བོ་ཆེའི་མདོ་ལས་ཀྱང་བསྟན། འཇམ་དཔལ་རྩ་རྒྱུད་ཆེན་པོ་ལས། དེ་བཞིན་གཤེགས་པ་མྱ་ངན་ལས་འདས་ནས། ལོ་ནི་བཞི་བརྒྱ་ལོན་པ་ན། །དགེ་སློང་ཀླུ་ཞེས་འབོད་པ་འབྱུང༌། །བསྟན་པ་ལ་ནི་དད་ཅིང་ཕན། །རབ་ཏུ་དགའ་བའི་ས་ཐོབ་ནས། །ལོ་ནི་དྲུག་བརྒྱ་དག་ཏུ་འཚོ། །རིག་པ་རྨ་བྱ་ཆེན་མོ་ཡང༌། །བདག་ཉིད་ཆེན་པོ་དེ་ཡིས་གྲུབ། །བསྟན་བཅོས་དོན་ནི་མཏའ་དག་དང༌། །སྐྱེ་བ་མེད་པའི་དོན་ཡང་རིག །དེ་ནས་མཐར་གྱིས་སངས་རྒྱས་ཉིད། །ཁོ་ན་ཐོབ་པར་འགྱུར་གསུངས་སོ། །ཞེས་སོ། །ཡང་མདོ་སྡེ་སྐུ་གསུང་ཐུགས་ཀྱི་སྒྲོན་མེ་བལྟམས་པ་ཞེས་བྱ་བ་སྐུ་གསུང་ཐུགས་ཀྱི་གསང་བ་བསམ་གྱིས་མི་ཁྱབ་པ་ཞེས་བྱ་བ་ནས། འཛམ་བུའི་གླིང་གི་རྒྱན་ལུང་བསྟན། །ཉི་མ་ཟླ་བ་ལྟ་བུ་རུ། །སངས་རྒྱས་བསྟན་པ་གསལ་བྱེད་པ། །འཇིག་རྟེན་ཁམས་འདིར་འཛམ་བུ་ཡི། །གླིང་གི་རྒྱན་དྲུག་འབྱུང་བར་འགྱུར། །གཉིས་ཀྱིས་སངས་རྒྱས་བསྟན་པ་བསྲུངས། །གཉིས་ཀྱིས་ཡིད་ཆེས་ལུང་དོན་འགྲོལ། །གཉིས་ཀྱིས་ཐུགས་ཀྱི་སྒྲོན་མེ་ལྷམ། །གཉིས་ནི་རྒྱུད་པའི་སློབ་དཔོན་ཏེ། །གཉིས་ནི་དངོས་ཀྱི་སློབ་མའོ། །ཞེས་གསུངས་སོ། །དེ་རྣམས་ཀྱི་ནང་ནས་ཀླུ་སྒྲུབ་མཆོག་ཏུ་བསྟན་ཏེ། རིན་ཆེན་ཕུང་པོ་བཀོད་པའི་མདོ་སྡེ་ལས། འགྲོ་ལྡིང་ཞེས་བྱའི་གྲོང་ཁྱེར་དུ། །རྒྱལ་པོ་ཀི་ཏ་ཀ་དང་ནི། །བྲམ་ཟེ་གྷ་ཏ་མ་ཡི་སྲས། །ཀླུ་སྒྲུབ་ཅེས་བྱ་འབྱུང་འགྱུར་ཏེ། །ཀླུ་རྣམས་ཀུན་གྱི་སློབ་དཔོན་ནོ། །ཞེས་གསུངས་སོ། །གཞན་ཡང་དཔལ་མགོན་པོ་དང༌། དཔལ་ལྷ་མོའི་རྒྱུད་ལ་སོགས་པ་དང༌། ཡོངས་སུ་གྲགས་པའི་མདོ་རྒྱུད་མང་པོ་ནས་ཀླུ་སྒྲུབ་ལུང་བསྟན་པ་བརྒྱ་རྩ་བརྒྱད་གསུངས་སྐད། དེ་ལྟར་བདེ་བར་གཤེགས་པས་ལུང་བསྟན་པའི་སྟོན་པ་གཉིས་པ་ལྟ་བུའི་སློབ་དཔོན་་འཕགས་པ་ཀླུ་སྒྲུབ་དེས་གདུལ་བྱའི་ལས་ཅན་གྱི་ནང་ནས་ཐུགས་རྗེ་ཆེན་པོ་འཕགས་པ་སྤྱན་རས་གཟིགས་དབང་ཕྱུག་གིས་འདུག་ཐུགས་མངོན་པར་ཤེས་པས་གཟིགས་པས་ཁྱེའུ་མ་ཧེའི་རྫི་བོ་བྱེད་པ་གཅིག་འདུག་ནས་དེ་ལས་དང་སྐལ་བར་ལྡན་པར་གཟིགས་ཏེ། སློབ་དཔོན་གྱིས་བྱིས་པ་མ་ཧེའི་རྫི་བོ་བྱེད་པ་དེའི་རྩར་བྱོན་ནས། ཁྱེད་མ་ཧེ་གཏན་དུ་འཚོ་བ་ཡིན་ནམ་ཞེས་གསུངས་པས། གཏན་དུ་མི་འཚོ། འཁོར་བའི་ཆོས་ལ་སྙིང་པོ་མི་གདའ་ཆོས་ཤིག་བྱེད་སྨྲས་པས།