དེར་རྒྱལ་པོས་བོད་ལ་ལྷ་གཅིག་བཀས་གནང་བ་ལས། ངེད་ལ་ལྷ་གཅིག་མི་སྟེར་ཟེར་བས། སྟག་གཅིག་ན་རེ། ངེད་ལ་མི་སྟེར་ན་ཡུལ་མེས་བསྲེཏ་ཟེར། ཁྲོམ་ན་རེ། ངེད་ལ་ལྷ་གཅིག་མི་སྟེར་ན་ཡུལ་དུ་ཆུ་འདྲེན་ཟེར། དེ་ལ་སོགས་པའི་འཕྲུལ་འགྲན་པས་སུས་ཀྱང་བོད་ཀྱི་བློན་པའི་རིག་པ་མ་ཐུབ་པོ། །ད་ངེད་ལ་ལྷ་གཅིག་ཞུ་བྱས་པས་ནུབ་གཅིག་གི་ཚེ་རྔ་ཞིག་བརྡུངས་པ་དང་སྙེ་བོ་རྣམས་ལ་སྤྱོད་ལམ་སྟོན་པའི་གཡོག་མོ་རྣམས་ན་རེ། རྒྱལ་པོའི་ཕོ་བྲང་དུ་སྙེ་བོ་རྣམས་ལ་ཤོག་བྱ་བའི་རྔ་ཡིན་པས་ད་ཆས་ཟེར། དེར་སྙེ་བོ་རྣམས་རྒྱུགས་ནས་སོང་སྟེ། བོད་ཀྱི་བློན་པོའི་བསམ་པ་ལ་རྔ་འདི་སྐྱོན་ཅན་ཞིག་ཡིན་སྙམ་ནས་ཁོ་རང་གི་འདུག་སའི་སྒོ་ཡི་ཡ་ཐེམ་ལ་མཚལ་གྱིས་རྡོ་རྗེ་གཅིག་བྲིས། མ་ཐེམ་ལ་གཡུང་དྲུང་རིས་གཅིག་བྲིས་ཏེ་སྒོ་རྣམས་བགྲངས་ཤིང་སོང༌། སྒོ་རེ་ལ་མཚན་མ་རེ་བཏབ་སྟེ་ཕྱིན་ནོ། རྒྱལ་པོའི་ཕོ་བྲང་དུ་ཕྱིན་པའི་ཚེ་དགའ་སྟོན་ཆེན་པོ་གནང་ནས་ཐམས་ཅད་བཟི་བ་དང༌། རྒྱལ་པོ་ན་རེ། ད་རྒྱ་སྲང་མ་འཛོལ་བར་ཕྱིན་པ་ལ་ལྷ་གཅིག་སྟེར་ཟེར་ནས། དེར་བློན་པོ་གཞན་རྣམས་ཆང་གིས་བཟི་བ་དང་སྒོ་འཆོལ་ཏེ་མ་རྙེད་དོ། །དེ་ནས་བློན་མགར་གྱིས་བོད་རྣམས་ཁྲིད་ནས་མེ་སྒྲོན་བཏེགས་ཏེ་མཚན་མ་བཏབ་པ་ལྟ་བཞིན་ཕྱིན་པས། རང་གི་ཁྱིམ་དུ་ཚུད་དེ་མལ་དུ་ཉལ་ཡོད་པས། ཕྱི་ཉིན་ནངས་པར་བལྟ་བར་བཏང་བས་གཞན་རྣམས་ཀྱི་འཛོལ་ནས་ལམ་ཡང་མ་རྙེད་པར་སྲང་བར་ཐམས་ཅད་དུ་ཉལ་ནས་བསྡད་འདུག བོད་ཀྱི་བློན་པོས་ཁང་པ་མ་འཛོལ་བར་རྙེད་འདུག་པས། ལྷ་གཅིག་བཀས་གནང་འཚལ་བྱས་པས། རྒྱལ་པོས་ད་ལྷ་གཅིག་ཀོང་ཇོ་བུ་མོ་བརྒྱའི་ཁྲོད་དུ་བཅུག་ལ་སུས་ངོ་ཤེས་པ་དེ་ལ་སྟེར་རོ་ངོས་ཟུངས་ཤིག་གསུངས་པ་ལ། སྔར་གྱི་རྣམས་མ་ནོར་བར་བྱུང་ངོ༌། །དེ་ནས་བོད་ཀྱི་བློན་པོ་རིག་པ་ཅན་དེས། ཀོང་ཇོའི་སྔར་ནས་ཀྱི་གཡོག་མོ་གཅིག་ཡོད་པ་ལ་ཅི་ཟ་བའི་ཕྱེད་ཕྱེད་བྱིན་ཏེ། གཞན་ཡང་རྔན་པ་ཕག་ཏུ་བྱིན་ནས་སེམས་བཟུང་བ་དང༌། སང་ཀོག་ཇོ་བུ་མོ་བརྒྱའི་ཁྲོད་དུ་ཡོང་བར་ཡོད་པས་དེ་ཁྱོད་ཀྱིས་ང་ལ་མ་ནོར་སྟོན་དགོས་བྱས་པས། འབྲས་ཀྱི་སོག་མ་སྐེ་ལ་བྱུགས་ཏེ་ཆད་པ་ཡོང་བྱ་བའི་བརྡའ་བྱས། བློན་པོས་ཁྱེད་ལ་ཆད་པ་མི་ཡོང་བའི་ཐབས་ཡོད་བྱ་བའི་བརྡ་བྱས་པས། དེ་ལྟར་ཡོད་ན་སྨྲ་བའི་འཛུམ་བྱས་ཏེ། དེ་ནས་བློན་པོ་མགར་གྱིས་སྒྱེད་བུ་གསུམ་གྱི་སྟེང་དུ་ཟངས་ཆུས་བཀང་བ་དེ་ཁ་བཅད་དེ་རྦ་བར་གཡོག་མོ་བཅུག ལྕགས་ཀྱི་སེ་རུའི་ནང་ནས་མར་སྨྲར་བཅུག་པ། ཀོང་ཇོ་ལ་གཡོག་བཅུ་དྲུག་ཡོད་པའི་སྨྲ་མཁས་དམ་པ་ང་ཡིན་ནོ། །ཁྱེད་བོད་དང་ལས་འབྲེལ་ཡོད་པས་ཀོང་ཇོ་ཐོབ་སྟེ་ཡོང༌། བུ་མོ་ལྔ་བརྒྱ་སོང་བ་ལས་ཕྱེད་སུམ་བརྒྱ་སོང་བའི་བར་ནས་འོང༌། ཆ་ལུགས་བཟང་ངན་འབྲིང་པོ་ཙམ་ཞིག་ཡོད་དེ། ཤ་མདངས་བག་ཙམ་སྔོ་བ་ལུས་ལས་ཙན་དན་གྱི་དྲི་ཞིམ་འཐུལ་བ། ཁ་ནས་ཨུཏ྄པལ་གྱི་དྲི་ཡང་བྲོ། ཧ་ཅང་མི་རིང་མི་ཐུང་བ། ཧ་ཅང་མི་སྐམ་མི་རྒྱགགས། མཛངས་ཤིང་ལེགས་ལ། འཛུམ་མདངས་ཆེ། གོམ་འགྲོས་དལ་ལ་ས་ཆོད་ཆེ། ཧ་ཅང་མི་ནག་མི་སྔོ་ལ། ཧ་ཅང་མི་སྔ་མི་དམར་བ། སོ་ཚགས་དམ་ལ་སོ་ཞོ་དཀར། རྙིལ་མདུང་རིང་ལ་རྙིལ་ཁུགགས་དམར། མིག་དཔངས་དམའ་ལ་མིག་རྒྱང་རིང༌། དཔྲལ་བའི་དཀྱིལ་ན་གཡུང་དྲུང་རིས། བཀྲ་ཤིས་ཕྱག་རྒྱ་ནས་ཙམ་ཡོད། མཁུར་ཚོས་གཡས་པར་པད་མ་རིས། མཁུར་ཚོས་གཡོན་མར་འཁོར་ལོ་རིས། ལྐོག་མའི་དཀྱིལ་ན་དཔལ་བེའུ་རིས། གདོང་པ་གཡོན་པའི་གོང་རིམ་ན། མཚལ་གྱི་གཡུང་དྲུང་ནས་ཙམ་ཡོད། ལྷ་མོ་ཀླུ་མོ་ཡིན་པའི་རྟགས། །གཡ་ཡི་སྦྲང་མ་ཁྱད་པར་ཅན། །བཞིན་ལ་འཁོར་ཞིང་ཡོད་པ་ཡིན། །དེ་ནི་ལྷ་གཅིག་ཀོང་ཇོ་ཡིན། །ཁྱེད་རང་མདའ་བྱ་རྒོད་མ་གཅིག་ལ་དར་ལེབ་རྒན་དམར་ལཔོ་བཏགས་ཏེ་ལག་པལ་མ་འཇུ་བར་ན་བཟའི་གོང་པ་ནས་མདའ་ལྟོང་གིས་སྒྲིལ་ལ་ཟུངས་ཤིག་ཟེར་རོ། །སང་ནངས་པར་བུ་མོ་ལྔ་བརྒྱ་ལམ་ནས་བྱུང༌། སྙེ་བོ་ཚན་པ་བཞི་པོ་ཡང་སྒོ་ན་བསྒུགས་སོ། །བོད་གཞན་རྣམས་ཁང་བཟང་ན་ཡོད་དོ། །བློན་པོ་མགར་གྱིས་སྒོ་ཡི་རྒྱབ་ནས་མདའ་བྱ་རྒོད་མ་བཟུང་ཞིང་ཐོགས་ཏེ་ང་ནི་ལྟད་མོ་བལྟའོ་ཟེར་ཏེ་བསྡད།