དེ་བཞུགས་པའི་ལྷ་ཁང་དགོས་པས་ཁྱེད་ལ་མེད་པས། བོད་དུ་གཙུག་ལག་ཁང་བརྩིག་ནུས་པ་ཡོད་དམ། དེ་ནུས་ན་ངས་ལྷ་གཅིག་སྦྱིན་ཏེ། མི་ནུས་ན་མི་སྟེར་གྱིས་ལ་དྲིས་ལས་ཤོག་གསུངས་པས། བློན་པོ་མགར་གྱིས་ཡང་ཕྱག་བྱས་ཏེ་རྗེ་ལགས། དེ་ལ་རྒྱ་ནག་དང་བོད་བར་ས་ཐག་རིང་པོ་ལ་འཕྲིན་གཅིག་ལ་ཕར་སྐྱེལ་ཚུར་སྐྱེལ་བྱས་ན་ལྷ་གཅིག་ཀོང་ཇོ་གདན་འདྲོངས་པའི་དུས་མི་འོང༌། དེའི་ལན་དུ་བཀའ་ཤོག་སྒྲོམ་བུ་འདི་བསྐུར་བ་ལགས་ཞེས་སྒྲོམ་བུ་ཕྱག་ཏུ་ཕུལ་བ་ཕྱེ་སྟེ་གཟིགས་པས། སྔར་ལྟར་ཡི་གེ་བྱུང་བས་ཁྱེད་ང་ལ་གཙུག་ལག་ཁང་མེད་ཟེར་ནས་སྙད་བྱེད་ན། ངས་སྤྲུལ་པའི་བཟོ་བོ་བསམ་གྱིས་མི་ཁྱབ་པ་སྤྲུལ་ལ་བོད་ཡུལ་དུ་ལྷ་ཁང་བརྒྱ་རྩ་བརྒྱད་བཞེངས་ཏེ་སྒོ་ཐམས་ཅད་རྒྱ་ཡི་ཡུལ་ལ་གཏད་ལ་བཞག་བྱ་བ་བྱུང༌། དེ་ལྟར་མ་ཡིན་པ་ང་ལ་ལྷ་གཅིག་མི་སྟེར་ན། ངས་སྤྲུལ་པའི་དམག་མི་དཔག་ཏུ་མེད་པ་སྤྲུལ་ལ་ཁྱེད་ཀྱི་ཡུལ་ཐམས་ཅད་གཞོམ་ཕམ་བྱས་བ་བྱུང་ནས། རྒྱལ་པོ་བྲེད་ནས་བློན་པོ་རྣམས་ཀྱིས་བརྟེན་ཏེ་ཕོ་བྲང་དུ་གཤེགས་སོ། །ཕྱི་ནས་རྒྱལ་པོའི་ཐུགས་དགོངས་ལ། བུ་མོ་མཐར་བོད་ལ་གཏང་དགོས་པར་འདུག་སྙམ་སྟེ། རྒྱལ་པོ་དང༌། རྒྱལ་མོ་དང༌། རྒྱལ་བུ་དང༌།
༼ལྷ་གཅིག༽
ཚོ་ཚོགས་ནས་རྒྱལ་བློན་ཚོ་གྲོས་བྱས་པས། ཡབ་ན་རེ། རྒྱ་གར་ཆོས་ཀྱི་འབྱུང་ས་ཡིན་པས་རྒྱ་གར་ཆོས་ཀྱི་རྒྱལ་པོ་ལ་བྱིན་ཟེར། ཡུམ་ན་རེ། རྒྱ་གར་ལ་ལོངས་སྤྱོད་མེད་སྤྲང་པོ་དང་འདྲ་བས་ལོངས་སྤྱོད་དགོས་ཏེ། སྟག་གཟིག་ནོར་གྱི་རྒྱལ་པོར་སྟེར་ཟེར་རོ། །མིང་པོ་ན་རེ། སྲིད་དགོས་པས་ཁྲོམ་གེ་སར་དམག་གི་རྒྱལ་པོ་ལ་སྦྱིན་ཟེར། ལྷ་གཅིག་ཀོང་ཇོ་རང་བྱད་བཞིན་ལེགས་པ་ལ་དགའ་བས་ང་ཁྲོམ་ལ་འགྲོ་ཟེར་རོ། །དེ་ཡང་ཁྲོམ་གྱི་རྒྱལ་པོ་ཤིན་ཏུ་ལེགས་པས་དེ་ལ་མོ་ཆགས་ནས་ཡོང་དུ་རེ་བས་རྒྱལ་པོ་ལ་ཡང་དེ་བཞིན་དུ་ཡོད་དོ། །དེའི་བློན་པོ་རྣམས་ན་རེ། བོད་ལ་ཀོང་ཇོ་མི་སྟེར་ཟེར་རོ་བོད་ཀྱིས་རྒྱའི་གྱེན་པོ་ཐམས་ཅད་བསད་པ་ཡིན་ཟེར་རོ། །བོད་ལ་མོས་པ་དང་དགའ་བ་གང་ཡང་མེད་ཀྱང་ཁྲིམས་ཀྱིས་ཉེ་རིང་བྱར་མི་བཏུབ་པས། རྒྱལ་པོས་ངའི་ལྷ་གཅིག་འདི་ཁྱེད་མི་རིགས་བཞིའི་བློན་པོ་རིག་པ་གང་རྣོ་བ་ལ་སྟེར་གསུངས་པས། དེར་རིག་པ་འགྲན་དུ་བཅུག་པ་ལས། རྒྱའི་རྒྱལ་པོ་རྗེ་སེང་གེ་གཙན་པ་ལ་གཡུ་བྲེ་ཞབས་ཙམ་གཡུ་ཞགས་འཁྱིལ་བ་བྱ་བ་ཡོད་པ་དེ་ལ་དར་ཐག་སུས་ཚུད་པ་ལ་ལྷ་གཅིག་སྟེར་བས་སུས་ཚུད་འགྲན་པ་ལས། གཞན་རྣམས་ཀྱིས་ཉི་མ་མང་པོར་ཐབས་ཅི་བྱས་ཀྱང་མ་ཚུད་པས། ཁོང་ཚོ་དབང་དང་ནོར་ཡང་ཆེ། རྒྱལ་པོ་ཡང་ཁོང་ཚོ་ལ་དགའ་ཡང་ཐབས་རྡུགས་ནས་མ་ཚུད་དོ་ཞེས། དེར་བོད་ཀྱི་བློན་པོའི་ལག་ཏུ་གཡུ་ཞགས་འཁྱིལ་བ་གཏད་པ་ལས། བོད་ཀྱི་བློན་པོ་མགར་སྟོང་བཙན་ཡུལ་བཟུང་གིས་རྒྱའི་གྲོག་མ་ཆེ་བ་གཅིག་བཟུང་ནས་དེ་ཟན་གྱིས་གསོས་ཏེ། ཉི་མ་ཚ་པོ་ལ་གྲོག་མའི་སྐེད་པ་ལ་དར་སྐུད་བཏགས་ཏེ། དེ་ལ་དར་གྱི་ཐི་གུ་བཏགས། དེ་ལ་དར་ཡུག་བཏགས་ནས་མིག་ནང་ཕར་དལ་བུས་ཕུས་བཏབ་པལས་ཕར་ངོས་ཀྱི་གཡུའི་མིག་ནང་རྭ་ཅོ་སྙོང་སྟེ་བྱུང་བས་དེར་ཐག་པ་ཇེ་སྦོམ་ཐོན་ཏེ་དར་ཡུག་འཐེན་ནས་ཐག་པ་ཚུད་པས། གཡུའི་ཐག་པ་ངེད་ཀྱིས་ཚུད་པས་ངེད་ལ་ལྷ་གཅིག་སྟེར་དགོས་བྱས་ཀྱང་མ་སྟེར། ད་བྱ་བ་བུ་བརྒྱ་ངོས་སུས་ཤེས་པ་ལ་ལྷ་གཅིག་སྟེར་རོ་ཟེར་བས་ཤེས་ཀྱང་མ་བྱིན། ཤིང་གཞོག་གྲུ་བཞི་པོ་རྩེ་མོ་དང་རྩ་བ་ངོས་ཟིན་པ་ལ་ལྷ་གཅིག་སྟེར་ཟེར་བ་ལ་ངོས་ཟིན་ཡང་མ་སྟེར། ཡང་ཁང་བཟང་བཞིར་གཡོག་མོ་བཞི་བསྐོས། སྙེ་བོ་མི་རཻར་ལུག་རེ། ཆ་ཚོས་རེ་དྲངས་ནས་འདི་རྣམས་ཉིན་རེ་ལ་བཟའ་བ་ཟིན་པ། ལྤགས་པ་མཉེད་ཚར་བ། ཆང་འཐུང་སུས་ཚར་བ་ལ་ལྷ་གཅིག་སྟེར་ཟེར་བས་གཞན་རྣམས་ཀྱིས་ཤ་དུས་གཅིག་ལ་ཡོག་ཟས་བྱས། ཆང་ཡང་བཏུང་བྱས་ཀྱང་ཤ་ལ་སུན་ནས་བཟས་མ་ཚར། ཆང་གིས་ཀྱང་བཟི་ནས་འཐུང་མ་ཚར་བ་ལས། བློན་པོ་མགར་གྱིས་གྲལ་རིམ་གྱིས་ཤ་ཁམ་རེ་ཟོ། ཆང་ཧུབ་རེ་བྱས་ནས་རིམ་གྱིས་བཏུང་བས་ཤ་ཡང་བཟས་ཚར། ཆང་ཡང་བཏུང་ཚར། རྗེ་ཆང་གིས་མ་བཟི་བ་དང༌། ཤ་རྣམས་ལེགས་པར་ཟོས་ཟིན། པགས་པ་ཡང་གྲལ་རིམ་གྱིས་མཉེད་ཚར་བས། ལྷ་གཅིག་ངེད་ལ་སྟེར་དགོས་བྱས་པས།