ye shes kyi spyan gyis gzigs pas/ bod yul gyi rgyal po khri lde gtsug btsan bya ba'i bka' 'og tu 'dug par gzigs so/ /der rgyal po khri srong lde gtsug btsan dang / gyim shing kong jo gnyis pho brang brag dmar na rin po che'i khri steng na gzims nas bzhugs pa la 'phags pa 'jam dpal gyi thugs kha nas 'od zer sna lnga'i sna la/ gser gyi khye'u chung tshon gang ba zhig gyim shing kong jo'i mngal du spros nas zhugs pa las/ der yang yum gyi mnal lam na shar phyogs nas 'od nyi ma shar ba lta bu zhig byung nas mngal du zhugs pa rmis/ tshul de lta bu yab rgyal po la smras pas/ bar snang gi lha phran zhig rang re'i bur 'ong ba yin te yong gsungs so/ /rmi lam de shin tu bzang gsungs nas yab rgyal po shin tu dgyes so/ /de nas yum lus mi bde ba gang yang med par 'gul ba dang 'phar ba dang 'phrig pa la sogs pa byung ba dang / shes pa gsal ba/ lus yang ba/ bde ba/ nyon mongs mi skye bar gyur to/ /de nas zla ba dgu ngo dang bcu na yum la na tsha med par pho brang brag dmar du sras khri song lde btsan sku bltams so/ /de yang tshems dung so 'khor ba yod pa/ dbu skra mthon mthing g.yas su 'khyil ba shin tu mdzes pa lha'i sras lta bu zhig 'khrungs so/ /rta'i lo dpyid zla ra ba'i tshe skar ma rgyal gyi nam langs nyi ma shar ba la sku 'khrungs/ mtshan ni khri srong lde'u btsan du gsol lo/ /de nas rgyal bu dgung lo lnga lon pa na sna nam zhang khrom pa skyes dang / sna nam pa rnams rgyal bu khri srong lde btsan nged kyi tsha bo yin zer nas rgya mo la dbang che byas/ rgyal bu 'phrog tu byung ba la/ der rgyal blon kun nyi ma gcig thams cad tshogs nas dga' ston chen po byas nas/ sras rgyal bu la khyed kyi ma rgya mo yin nam/ sna nam pa'i sras yin ngos 'dzin tu bcug pa las/ sras rgyal po khri srong lde btsan na re/ gral rim gyis phyag g.yas pa gdengs nas/ khri srong lde btsan rgya tsha la/ /sna nam zhang gis ci zhig bgyi/ /zhes gral rim gyis bsgrags so/ /de nas rig pa'i gnas thams cad mkhyen cing dgung lo bcu gsum lon pa dang yab khri lde gtsug btsan dgung du gshegs so/ /der sras rgyal bu khri srong lde btsan rgyal por mnga' gsol lo/ /jo mo gsum khab tu bzhes pa tshe spong bza' me tog sgron dang / pho yong bza' rgyal mo btsun dang / 'brom bza' byang chub sman dang gsum lags so/ /de nas lo bdun 'bangs dang so tshigs phyi'i so kha srung ba dang / nang gi so tshigs mdzad cing rgyal srid bskyangs so/ /de nas lo nyi shu glang gi lo la dam pa'i chos bya ba'i thugs dgongs skyes te/ sngon gyi rgyal po srong btsan sgam pos kyang bod mun pa'i smag rum 'dra ba la/ gtsug lag khang brgya rtsa brgyad bzhengs/ dam pa'i chos bsgyur/ bal yul nas jo bo mi bskyod rdo rje dang / byams pa chos kyi 'khor lo dang / rang byung tsan dan gyi jo mo sgrol ma dang / rgya nag nas gser gyi lha shAkya mu ne gdan drangs/ dam pa'i chos kyi srol btod/ bod kha ba can gyi don mdzad cing bka' drin che ba lags par gda'/ da ni ngas kyang dam pa'i chos byas la dar zhing rgyas par bya snyam pa'i thugs dgongs skyes nas/ dang thog mar dkon mchog gi rten zhig bzhengs dgos par dgongs kyang / blon po rnams gdug pa che zhing