rtsangs to legs kyi bu rtsangs legs grub gnyis bod du shes rab che bar grags nas/ de gnyis la bka' nan bstsal te mkhan po bo dhi sa twa la rab tu byung nas mkhan pos lo tsA ba'i sgra bsgyur bslabs nas rgyal pos gser phye bre gang dang gser gyi pa tra gcig bskur nas bka' rdzogs pa chen po 'tshol tu btang bas/ gcan 'phrang pas gser 'phrog par byas te spa gor bai ro tsa nas bye ma gser du bsgyur nas byin/ de nas rgya gar du phyin nas bka' rdzogs pa chen po la su mkhas dris pas/ slob dpon shrI ri sing ha mkhas zer nas slob dpon gyi spyan sngar phyin/ gser phye bre gang po dang / gser gyi pa tra yang phyag tu phul nas tshe gcig la sangs rgya ba'i chos bka' rdzogs pa chen po bya ba'i gdams ngag bod kyi btsan po lha sras la lung bstan byung nas bdag chos 'tshol du btang ba lags pas slob dpon gyis gnang bar zhu 'tshal zhes zhus pas/ slob dpon gyi bka' gnang ba/ bod kyi rgyal po'i thugs dgongs dad pa dang ldan pa la/ khyed gnyis brtson 'grus dang ldan pa legs pas/ bka' rdzogs pa chen po 'di bod du dar bar 'gyur bas ngas bshad kyi gsungs nas/ de yang rgyud nyi shu rtsa lnga bshad de/ dang po sems kyi don rtsa ba rgyas par bstan pa'i phyir nam mkha' che rgyas pa'i rgyud bshad/ sems kyi don rtogs par dka' bas de nyams su blang ba'i phyir nam mkha' che rgyas pa phyi rta'i rgyud bshad/ sems kyi don rnam par grol bar bstan pa'i phyir nam mkha' che grol ba'i rgyud bshad/ sems kyi don mi 'gyur bar bstan pa'i phyir Tika rgyal po'i rgyud bshad/ sems kyi don thig le'i klong du 'dus par bstan pa'i phyir byang sems thig le'i rgyud bshad/ sems kyi don rang byung ye shes bstan pa'i phyir ye shes thig le'i rgyud bshad/ sems kyi don rim pas rgyas par bstan pa'i phyir man ngag 'phreng ba'i rgyud bshad/ sems kyi don kun gyi thun mong du bstan pa'i phyir gsang ba rgyal po'i rgyud bshad/ sems kyi don rang gis rtogs shing khong dung chud par bya ba'i phyir shes rab ye shes thig le'i rgyud bshad/ sems kyi don kun tu bzang po'i klong du thams cad gcig par bya ba'i phyir dbyings rnam par dag pa'i rgyud bshad/ sems kyi don thams cad mchog tu bstan pa'i phyir man ngag snying po'i rgyud bshad/ sems kyi don mchog tu gyur pa de nyid yid ches pa bstan pa'i phyir snying po sidhi'i rgyud bshad/ sems kyi don rtsa ba ma nor bar bstan pa'i phyir nam mkha' che rtsa ba can gyi rgyud bshad/ sems kyi don thig le nyag gcig tu bstan pa'i phyir nyag gcig dgongs pa'i rgyud bshad/ sems kyi don ma nor ba rnal bar bzhag par bya ba'i phyir bsam gtan gcig pa'i rgyud bshad/ sems kyi don rim par brgyud nas bstan pa'i phyir bsam gtan brgyud pa'i rgyud bshad/ sems kyi don gzhung kun tu dgongs pa bstan pa'i phyir sgo mang gi rgyud bshad/ sems kyi don dbang rim pa bzhin bstan pa'i phyir nam mkha' che dbang gi rgyal po'i rgyud bshad/ sems kyi don brjod pa'i tshig dang bral bar bstan pa'i phyir nam mkha' che yi ge med pa'i rgyud bshad/ sems kyi don dngos po thams cad ji lta bar 'byung ba bzhin du bstan pa'i phyir rin chen 'bar ba'i rgyud bshad/ sems kyi don dngos po thams cad 'od gsal bar bstan pa'i phyir rin chen