te bzhengs/ /sprul pa'i sku la bdag ni mos btus nas/ /zhu zhing snyan du gsol ba mi 'os kyang / /bdag la thugs ni brtse bar dgongs bzhugs la/ /tshe gcig sangs rgyas gsang sngags sgrub pa'i chos/ /bdag la thugs kyis bzung nas gnang bar zhu/ /zhes zhus nas phyag dbu thod bud bud 'tshal lo/ /de nas slob dpon gyis rgyal po la gsungs pa/ e ma ho/ rgyal po chos skyong bstan pa'i mnga' bdag yin/ /bdag gis 'chi med tshe'i rig 'dzin thob/ /phyag rgya chen po mchog gi dngos grub brnyes/ /sngags dang sngags la rig pa'i rtsal dbang thob/ /rgyal po'i thugs dgongs yongs su rdzogs par bgyi'o/ /gsungs nas/ sgra bsgyur nyi shu rtsa gcig shes pa'i bai ro tsa na dang / rgya bod yig rigs nyi shu rtsa gcig shes pa'i legs byin nyi ma/ yi ge skyen pa phul du phyin pa'i 'dan ma rtse mang dang / snubs nam mkha'i snying po/ a tsarya ye shes dbyangs de rnams kyis yig mkhan byas te/ u rgyan skad dang / rgya gar skad las bsgyur te/ rtsa ba'i rgyud la brten nas sgrub pa chen po sde drug mdzad/ gshen rje rol pa'i rgyud dang / gshen rja dmar nag gi rgyud la brten nas/ 'jam dpal sku'i sgrub thabs mdzad do/ /rta mchog rol pa'i rgyud dang / pad ma dbang chen gyi rgyud la brten nas/ pad ma gsung gi sgrub thabs mdzad do/ /yang dag rtsa ba khrag 'thung rol pa'i rgyud dang / he ru ka gal po dang / 'jig rten 'das mdo la brten nas/ yang dag thugs kyi sgrub thabs mdzad do/ /gsang ba ye shes 'khor lo dang / bdud rtsi mchog gi lung bam po brgyad pa la brten nas/ bdud rtsi yon tan gyi sgrub thabs mdzad do/ /phur pa rol pa rtsa ba'i rgyud/ bi to ta ma la dang / kI la ya bcu gnyis kyi tan tra la brten nas/ phur pa drag po 'phrin las kyi sgrub thabs mdzad/ ma mo rol pa rtsa ba'i rgyud dang / srid pa bem rgyud lung la brten nas/ ma mo rbod gtong gi sgrub thabs mdzad/ de yar chad 'jig rten las 'das pa'i sgrub pa ste drug go/ /rig 'dzin rol pa'i rgyud dang / rig 'dzin 'dus pa'i rgyud la brten nas/ rig 'dzin gyi sgrub thabs brgya rtsa gcig mdzad/ 'jig rten dregs pa 'dul pa'i rgyud la rten nas/ 'jig rten mchod bstod kyi sgrub thabs mdzad/ drag po sngags kyi rgyas 'debs la brten nas drag sngags dmod pa'i sgrub thabs mdzad do/ /de rnams la khyad par du gal che ba'i gdams pa gshin rje'i 'khor lo shes dka' bas 'phrul 'khor lde mig tu bsdu ba mdzad do/ /phur pa sgrub dka' bas gzhi snying gcig tu dril ba mdzad do/ /ma mo grub kyang 'khor dka' 'khu ldog che bas/ ma mo srog gi 'khor lo shis pa bstan pa mdzad/ pho rgyud las la myur kyang ldog cing gyong bas/ che ba ching dang log gnon gyi 'khor lo mdzad do/ /de nas slob dpon pad ma 'byung gnas kyis lhag par khyad par du 'phags pa sgrub pa bka' brgyad du 'dus pa/ bde gshegs 'dus pa rtsa ba'i rgyud/ phyi ma'i rgyud/ ma tshang ba kha skong gi rgyud/ 'byed par byed pa lde mig gi rgyud/ phyi ma'i phyi ma sngags kyi rgyud lnga la brten nas/ zhi ba rigs brgya dang / de nyid rigs lnga / de nyid rigs gcig khro bo 'jigs byed chen po'i dkyil 'khor dang / rdo rje 'jigs chung gi dkyil 'khor dang / sgrub thabs cha lag dang bcas pa mdzad/ de nas mchims phur bde gshegs 'dus