dgrar mthong lugs bzhin ma byas nas/ /de'i rnam smin tshe 'dir khrel med phyi ma dmyal bar 'gro/ /bskal bar lus la zug rngu nad kyis thebs par 'gyur/ /yang shi yang gsos thig nag dmyal bar 'gyur/ /de ltar ma byed yid ches thob par bkur sti skyed/ /bsam pa dag pas 'bul nom bzang bar gyis/ /dei dge bas bskal pa mang por yang / /nad med bde skyid thob par the tshom med/ /pad ma 'byung gnas bdag ni da 'gro bas/ /da ltar bzhugs dang smad nas 'byon pa yi/ /sman pa rnams kyis thugs la de zhog /ces gsungs pa ste/ slob dpon gyis bod kyi sman pa rnams la zhal ta gsungs pa'o/ /slob dpon pad ma 'byung gnas gshegs khar bod kyi slob ma rnams la zhal ta gsungs pa/ bod kyi slob dpon slob ma chos 'brel byed pa rnams/ /dang po bla ma slob dpon phul du phyin pa rtogs/ /de nas dam chos mtha' rgya chod la mkhas par slobs/ /mtha' mar bsgrubs la grub rtags thon par gyis/ /tshogs dang zhabs thog dbang yon mnyes par phul/ /dbang dang dam tshig thob par yang yang zhus/ /dam tshig bsrungs la phyag len zhal gdams zhus/ /dam tshig bsrungs la byams sems 'byongs par gyis/ /lta ba thag chod gdeng dang ldan par gyis/ /sgom pa thag chod gsal sgrib med par gyis/ /spyod pa thag cod dgag sgrub med par gyis/ /dam tshig mi nyams sa gzhi 'dra ba zungs/ /matun 'jig spyod pa blang dor ma byed nyams dang ldan pa gyis/ /rtsa ba'i bla ma grangs dang grangs kyis bsten/ /yid dam lha dang theg pa phyogs rigs med par mos gus gyis/ /bskyed rim gzhung srongs rdzogs rim gyis/ /dam can chos skyong dgra lha bzhin du macod/ /gsang sngags mtha' drug rdzogs par spyad pa rigs/ /de ltar ma byas slob dpon slob ma byas gyur na/ /lkog dang nyes pa ma tshor mang po 'byung / /slob dpon brtag par ma byas bcud kyi dam tshig nyams/ /mnyes pa'i yon ma phul bas dam tshig bka' mi thob/ /bar du bsnyen bkur tshogs 'khor ma byas dbang lung ma thob/ /mtha' mar 'bul ba ma byas phyag bzhes zhal gdams med/ /mtha' mar dam tshig ma bsrungs gnyis ka dmyal ba'i rgyu/ /de ltar ma byed slob dpon slob ma rnams/ /thos bsam sgom sgrub nan tan gyis/ /dbang dang zhu gnang rim par rdzogs par nod/ /sgrub la brtson pas rang don mthar phyin bya/ /slob dpon slob ma brtags la chos 'brel byas/ /chos la byin rlabs med pas bsgrubs kyang 'bras bu med/ /gnyis kas dam tshig ma bsrungs be sbrel g.yang la lhung / /dmyal ba rim gyis nyos te bya thabs med/ /de ltar ma byed slob dpon slob ma rtogs/ /dad gus mos pa skyed la snying rje skyed/ /snang ba dag pas bla ma sangs rgyas khur/ /dul ba'i sems ldan khengs dang nga rgyal skyungs/ /brtson 'grus phyi bshol med par nyams su longs/ /de lta bu la gdams ngag rdzogs par gnang / /kha gsag thabs kyis chos 'dod gdong 'das 'ded byed/ /nga che nga btsan khengs pa'i nga rgyal can/ /snod med rnams la bstan na dam tsig nyams/ /zhes gsungs pa ste/ slob dpon gyis bod kyi slob ma rnams la zhal ta bzhag pa'o/ /de nas slob dpon pad ma 'byung gnas kyis bod 'bangs spyi mthun la zhal ta gsungs pa/ snying rje chung ba gdong dmar srin po'i rigs/ /khrel med ngo tsha chung ba spre'u'i rigs/ /chos la gnag pa srin mo'i rigs/