bstan pa'i khungs dgos/ ston rtsen mi 'dra ste/ nged rtse min pa gsung rab kun gyi don kun bslabs/ shes rab rnam pa gsum la brten nas don ma nor bar shes/ chos spyod bcu la bslabs/ sgom pas sa dang po la bzod pa thob/ yang dag par skyon med par yang 'jug ste/ de nas sa dgu yang dag par rim par sbyangs/ pha rol tu phyin pa bcu la bslabs/ brgyud sbyangs tshogs gnyis rdzogs nas sangs rgyas brnyes pa lags na/ khyed ltar na tshogs ma bsags/ blo ma sbyangs par 'jig rten gyi bya ba yang mi shes na thams cad mkhyen pa'i rigs dang shes bya thams cad la 'jug par ji ltar 'gyur/ ji ltar tshogs yang ma bsags ci yang ma byas na gum nas zan yang ma myong par ltogs te mchis na/ sangs rgyas rang bzhin gyis don phun sum tshogs pa/ de'i rgyu ci las grub/ stong pa gcig pus rang la rang mi phan/ gzhan gyi don lta ga la 'grub/ khungs med cing thabs shes ya bral ba'i chos kyis sangs rgyas skur te bslus pa yin/ byang chub sems dpa'i ni sems can gyi don du sems bskyed nas 'gro ba'i don lhur byas nas tshogs bsags te/ thabs mkhas par bslabs nas shes rab rnam gsum la blo sbyangs/ ye shes tshogs bsags sgrib gnyis sbyangs glo bur gyi dri ma thams cad spangs nas sangs rgyas te/ sems can thams cad sangs rgyas kyi sa la dgod par mdzad pa'i 'phrin las 'khor ba ma stongs bar du lhun gyis grub pa yin pa lung du ma nas gsungs/ ci la yang mi sems pa ni bya'i sgo nga dang 'dra'o/ ma brtags par gom bor yang grag snyam ste/ chos ga la rtogs/ des na mdo sde'i don khong chud par bslabs shing / zhi gnas dang lhag mthong dben par yid la byed/ rang la myong ba dang rtogs pa shar/ de ltar ma rtogs pa'i don du tshogs bsags shing / sems ci lta bur sgyu ma lta bu ste don dam par de ma skyes te med par ma rtogs/ chos thams cad chu shing gi snying po lta bur ma bcos par rtogs na dus gsum du mi dmigs par 'gyur te/ chos dang gang zag la bdag ma mchis te/ bying rgod ma mchis par zung sbrel du 'jug pa lags te/ sgom pa la de ltar lags zhes mchis pa dang / ston min pas rim gyis theg pa la shags lan smra bar ma nus te/ spobs pa lan med gyur nas me tog gtor nas pham blangs so/ /rtsod pa chos phyogs su 'dum par byas so/ /de nas btsan po'i zhal nas don la mi mthun pa tsam mi 'dug ste/ lam sbyong lugs la ha shang gi chos cig car du 'jug mchis pa de/ dbang po yang rab sbyangs pa can gyi lam yin la/ dbang po 'bring man chad chos spyod bcu la skyon bkal/ sems ni bying / tshogs ni ma bsags/ gzhan gyi blo sbyong 'phro bcad pas chos kyang nub par gyur pas/ 'phro chod la khyed rang yang sgoms shig da phyin chad lta ba ni na ga dzu na'i lta ba bzung / spyod pa pha rol du phyin pa drug la gyis/ chos spyod bcu nyams su longs/ sgom pa shes rab gsum gyi blo sbyongs/ thabs dang shes rab zung du 'brel bar gyis la sgoms/ da phyin nga'i bod 'bangs rje blon gang gis kyang chos byed par 'dod pa rnams kyis bod mtha' 'khob tu gyur pa dang / rig pa blun zhing rang kha mang ste/ chos rtog par dka' zhing zab par gyur pas/ rgya gar gyi mkhas par rab tu grags pa rgyal pos spyan drangs te/ lo tsA mkhas pas gtan la phab pa de la 'jug par