sprul pa yin pas rang thul bar 'gyur/ nga mya ngan las 'das nas ring por mi lon par/ nga'i nyan thos dang byang chub sems dpa' rnams kyis nga'i gsung rab rnams bsdu bar 'gyur bas the tshom des gcod do/ /dam chos snying rje pad ma dkar po'i mdo las/ ma 'ongs pa'i dus su nga'i 'khor rnams kyis chos kyi bka' bsdu ba de'i thog mar 'di skad bdag gis thos pa'i dus gcig na la sogs pas gleng slong la bar du bka' bstsal pa dang / 'di skad ces gsol bya ba'i mtshams sbyor gyi tshig dang / mtha' ru bcom ldan 'das kyis gsungs pa la mngon par bstod do/ /zhes bya ba'i tshig chug la bka' sdud cig ces gsungs nas/ bstan pa yun ring du gnas par bya ba'i phyir du nga'i sku tshad bzhengs shig ces bka' bstsal to/ /de ji ltar bzhengs zhes zhus pas bcom ldan 'das kyis zhal 'dzum pa mdzad pa'i zhal gyi sgo nas/ 'od zer bzhi byung ba la gcig lha chen po tshangs pa la phog gcig sgra gcan 'dzin ra hu la la phog gcig lha'i dbang po brgya byin la phog gcig lha'i bzo bo bi shwa karma la phog pas/ khong tsho spobs pa skyes nas/ bcom ldan 'das kyi zhabs drung du 'tshogs te/ tshangs pa na re/ bdag gis bcom ldan 'das kyi chos sku'i rten bzhengs su gsol ba'i yon gyi bdag bgyid par zhu zer/ gza' sgra gcan 'dzin ra hu la na re/ bdag gis bcom ldan 'das kyi longs spyod rdzogs pa'i sku'i rten bzhengs pa'i yon gyi bdag po bgyid par zhu zer/ lha'i dbang po brgya byin na re/ bdag gis bcom ldan 'das kyi sprul sku'i rten bzhengs pa'i yon gyi bdag po bgyid par zhu zer/ bzo bo bi shwa karma na re/ bdag gis ni rten bzhengs pa'i bzo bor zhu zer/ gtsang ris kyi mgon po bdun cu rtsa lnga na re/ bdag cag gis rten rnams kyi srung ma dang / zhabs thog bgyid par zhu zer/ gsang ba'i bdag po phyag na rdo rje na re/ bdag gis rten rnams kyi srung ba bgyid par zhu zer/ dpal mgon po byams pa na re/ bdag gis rten bzhengs pa dag gi dkon gnyer bgyid par zhu zer ba la/ bcom ldan 'das kyis kyang cang mi gsung bar gnang ngo / /de nas dus phyis rten de dag bzhengs su gsol ba'i dus la bab pa'i tshe/ lha chen po tshangs pas bcom ldan 'das kyi chos kyi sku'i rten bzhengs pa'i rgyu la lha'i rin po che chu shel zhun ma dang / gser la sogs pa'i rin po che zhun ma'i phung po gcig lha'i bzo bo bi shwa karma'i mdun du spungs pa nas/ mi shwa karmas bzhu btul lugs su blugs pa las/ chos kyi sku'i rten la phyogs med par bstan pa'i phyir/ dbyibs zlum po kha dog ni dkar ser du grub pa/ che chung gi tshad ni lha tshangs pa'i 'dom gang yod pa/ mtshan ni dpal du ba lta bu'i mchod rten zhes su grags pa bzhengs te/ bcom ldan 'das nyid kyis rab gnas mdzad de bcom ldan 'das kyi zhal nas lha tshangs pa la khyod kyis bzhengs pa'i rten 'di/ u rgyan gyi yul dpal he ru ka'i zhing khams su bzhugs su gsol/ zhes gsungs pa las/ lha tshangs pas mar spyan drangs nas/ rgya gar nub phyogs u rgyan na bzhugs pa dus phyis sangs rgyas kyi ring bsrel snying po can bkang nas sa la ma reg par bar snang la bzhugs pas/ dpal ma reg pa'i mchod rten zhes grags so/ /chos kyi sku nam mkha' dang 'dra bar bstan pas lhung bzed kha sbubs pa ltar grags so/ /de la ma mo