de'i steng na mchod rten chung ngu byas pa zhig yod pa de shin tu snyan skad/ der rdo rje gdan gyi dkon gnyer rnams skra bzhar sar byed/ de nas bsdu ba yang byed do/ /de nas 'o thug gsol nas rdo rje gdan gyi shar phyogs chu bo neranya?dzana'i 'gram mchod rten zhig bzhugs pa der/ 'o thug gsol ba'i snod chur bskyur ste/ smon lam btab pa na/ nga mngon par rdzogs par sangs rgyas te/ sems can gyi don grub na snod chus mi 'khyer par shog sangs mi rgya na snod chus khyer cig gsungs pa las/ lhung bzed rgyang grags gcig tsam chus khyer nas/ de yar log ste/ yar bskyar bas/ 'ben gang tsam gyi gong nas byung ste/ lhung bzed de lhas spyan drangs/ sngar lhung bzed de bskyur ba dang / log pa dang / phyis byung ba gsum na rdo ring 'dom re lhag pa yod pa'i steng na rdo'i mchod rten re re yod skad/ de nas sku gser gyi gtan pa phyis pa ltar gyur nas/ phar nub phyogs su bzhud de rgyang grags phyed tsam du nye bar nub gcig gzim pa'i sar/ bcom ldan 'das kyi sku gzigs nas bzhugs pa'i steng na mchod rten lha khang can gcig bzhugs nas yod do/ /de nas tshangs pa dang brgya byin gnyis kyis byang chub sems dpa' bsu ba'i tshal na rdo ring 'dom re lhag pa'i tsa na mchod rten re bzhugs/ de nas nub byang mtshams na phar bzhud pa na/ rma bya gcig dang 'phrad/ des byang chub sems dpa' la phyag 'tshal bas der rma bya lung bstan nas/ de'i sa na mchod rten re re bzhugs/ de nas byang phyogs su bzhud de/ rdo rje gdan nas nyi ma phyed lam na/ ri ga ya mgo'i steng nas spyan ras gzigs dang / 'jam dpal gnyis mjal nas lha cig bzhugs te/ rdo rje lta bu'i ring nge 'dzin mngon sum du mdzad gsungs nas/ spyan ras gzigs btang nas der lho phyogs rdo rje gdan gyi gzhir 'ongs te/ de ni sa phyogs nyams dga' bas ting nge 'dzin skye ba'i sar gyur pas/ khong rang ting nge 'dzin la snyoms par bzhugs nas/ byang chub sems dpa' ma sbran pas/ spyan ras gzigs le lo can zhes grags te/ de'i sgom sa rdo rje gdan gyi lcags ri'i lho phyogs sgo nang na spyan ras gzigs kyi sku zhal la mi 'bring po'i khru gang tsam yod pa zhig bzhugs/ mchod rten lha khang co ba ri zhes bya ba gcig bzhugs so/ /de nas byang chub sems dpa' tshur byon pa rdo rje gdan gyi lho phyogs na bzhugs te/ bzhugs sa de na byang chub sems dpa'i rdo sku byin rlabs che ba bzhengs pa zhig bzhugs so/ /de nas byang chub kyi shing drung du bzhud pa'i lam zhes grags pa zhig yod de/ de nas byang chub kyi shing la brtag pa bya ba dang / phyi rabs gdul bya rnams yid ches par bya ba'i phyir byang chub shing nas 'dom bco lnga tsam du bzhud nas zhal shar du gzigs nas/ thugs ka nas 'od zer bkyes nas/ byang chub kyi shing ma yin pa thams cad bsregs pa'i sol ba rnams spungs pa las a dkar bo de zhes bya ba'i byang chub kyi shing gcig yod do/ /de dang byang chub kyi shing dngos kyi bar 'dom bdun tsam yod do/ /a dkar bo de yi byang phyogs na ra pa khu le zhes pa rgya mtsho la thug pa'i khron pa zhig yod de/ bcom ldan 'das kyis rngul chu'i rang bzhin du byin gyis brlabs nas/ dgra bcom pa mang po'i gdung bzhugs skad do/ /der skra dang sen mo dor na ngan song du mi 'gro