[A:85]
spral nus pa lta bu gda'/ rdzogs pa'i rim la drod bde gsal mi rtog stong pa'i nyams myong / zhi gnas lhag ma mthong zung 'jug gi rtogs pa shar bas sgom chen bzang ba'i rab tu gyur pa yin/ de ltar sdom pa gsum lag len gong 'og ma 'dres/ dgongs pa gnad kyis mi 'gal/ gnang bkag dus khebs gang 'phrod/ dgos pa yon tan par ldan/ ngo bo bsrungs sems dbyer med du ldan par bzhugs/ sdom pa gsum gyi spang bya spong ba de lhag pa tshul khrims bslab pa/ bslab bya slob pa de lhag pa sems kyi bslab pa/ spong sgrub shes pa de lhag pa shes rab kyi bslab pa yin mod/ de mchog tu gyur pas/ 'dul ba'i thabs mkhas mdzad kun don med pa'i/ mthong thos dran reg 'brel tshad don dang ldan/ skal ba ji bzhin gdul bya smin grol 'god/ dus bab gdul bya 'dul la phyag 'tshal lo/ gdul bya gang la thabs gang gis 'dul ba'i thabs de shin tu mkhas te/ 'ga' zhig zhi bas 'brid cing slob/ 'ga' zhig drag pos rdzogs shing 'jur/ 'ga' zhig thabs kyi bskor zhing 'dren/ 'ga' zhig btsan thabs su 'ches shing 'dul/ gsung re re la mang pos go ba so so blang btub pa dang / spyod lam gyi rnam 'gyur mang po la blo bskyed thon pa yod/ dka' tshegs chung ngus dge ba brlabs po che 'grub pa dang / mngon mtshan med bzhin du ji ltar bzhed pa'i don chen po shugs kyis 'grub pa mkhyen/ bskyangs pa ma tshor bar 'khyongs pa/ btul ba ma tshor bar thul ba/ bsgrubs pa ma tshor bar 'grub pa/ mdzad pa ma tshor bar don gnyis rgya chen po mdzad tshar yong