[A:༥༢བ]པ་སྔར་ནས་གསན་ཀྱང་། དེའི་ཚེ་རིང་པོར་མི་ཐོགས་པར་རྒྱ་གར་དུ་འབྱོན་པར་འདུག་ཟེར་བས། མཚན་ཐོས་པ་ཙམ་གྱིས་དད་པ་ལྷག་པར་སྐྱེས་ཏེ་ཡར་བྱོན། ཇོ་བོ་དཔོན་སློབ་པུ་ཧྲང་ན་བཞུགས་པ་ལ། སྒྲོལ་མའི་ཞལ་ནས། ད་ནི་ཞག་གསུམ་དྲོས་དང་བཞི་བོད་ཀྱི་ཨུ་པཱ་ས་ཀ་འབྱོན་པས་བྱིན་གྱིས་རློབས་ཤིག་གསུངས། ཇོ་བོས་ཀྱང་དེའི་སྟ་གོན་མཛད། ཨུ་པཱ་ཉེ་བ། ཨ་ས་ཀ་གནས་པ་སྟེ་མཚམས་སྦྱར་བས། ཨུ་པཱ་ས་ཀ་ཉེ་བར་གནས་པའམ། དགེ་བསྙེན་ལ་འཇུག་ལ། པའི་རིང་ཆ་ཆད་པ་དང་། སེ་ཀ་ཅེས་པ་མ་དག་སྟེ། ཨུ་པ་སེ་ཀ་དགེ་བསྙེན་མ་ལ་འཇུག་གོ །དེ་ནས་རྟའི་ལོ་རང་ལོ་སོ་དགུ་ལ་ཇོ་བོ་དང་མཇལ། བྱིན་གྱིས་བརླབས། དབང་སྐུར། འཇམ་དཔལ་རྡོ་རྗེའི་སྐུ་ཡང་གནང་། ཁྱོད་བླ་མ་རྣམས་དང་། སྒྲོལ་མས་ལུང་བསྟན་པའི་སློབ་མ་ཡིན་པས་ངའི་རྩར་སྡོད། ངའི་བཀའ་བརྒྱུད་འདི་ལ་གསོལ་བ་ཐོབ་དང་བྱིན་རླབས་ཡོད་ཀྱིས། བྱིན་རླབས་འབྱུང་གི་གསུངས། དེའི་ཚེ་ཇོ་བོ་ཉིད་ཀྱང་རྒྱ་གར་དུ་ལོག་པར་བཞེད། ལོ་ཙཱ་བ་ཡང་སྔར་གྱི་ཆད་ཡོད་པས་ཕར་བསྐྱལ་བར་བཞེད་པ་ལ། སྟོན་པས་ཀྱང་བཞུགས་པར་ཞུ་མ་ནུས། འོན་ཀྱང་ཐབས་ལ་མཁས་པས་དབུས་ན་རྒྱལ་བློན་གྱི་བཞེངས་པའི་གཙུག་ལག་ཁང་ཡོད་ཚུལ་དང་། དགེ་འདུན་གྱི་སྡེ་མང་དུ་བཞུགས་པ་རྣམས་ཇོ་བོ་ཕེབས་པར་མོས་ཚུལ་དང་། བོད་སྟོན་རྣམས་ལ་ཡང་ཆད་ཡོད་པ་བཞིན་འཕྲིན་ཡིག་བཏང་བ་སོགས་གོང་དུ་བཤད་པ་ལྟར་དཀའ་མ་དུ་མས་བོད་དུ་སྤྱན་དྲངས་ཏེ་སྟོན་པས་ལོ་ངོ་བཅུ་གསུམ་ཚུལ་བཞིན་དུ་བསྟེན་ཅིང་། བཤེས་གཉེན་སྟོན་པ་ལ་བླ་མ་ལྔ་ཡོད་པ་ནི། དང་པོར་