[A:༥༢ན]གྱི་ཞང་ཆེན་པོ་ལ་དགེ་བསྙེན་གྱི་སྡོམ་པ་བླངས། དེ་ནས་དགུང་ལོ་བཅུ་བདུན་བཞེས་པ་ལ། སེ་བཙུན་དབང་ཕྱུག་གཞོན་ནུ་ཁམས་ནས་ཡར་བྱོན། རྒྱ་གར་དུ་འབྱོན་པར་བཞེད་དེ། བལ་ཡུལ་བར་བྱོན། ལོ་གཅིག་ན་སླར་ལོག་པ་དང་མཇལ་ཁྲིད་པར་ཞུས་པས། སང་རེད་ཤོག་གསུངས་བས། ཚོང་པ་དང་འགྲོགས་ཏེ་བྱོན། ཁམས་སུ་ལོ་ཧྲིལ་པོ་བཅུ་དགུ་སེ་བཙུན་ལ་བསྟེན། མདོ་སྔགས་ཀྱི་ཆོས་མང་དུ་གསན་མཁས་པར་གྱུར་ཏེ་དགེ་བསྙེན་ཆོས་འཕེལ་དུ་གྲགས། སྙིང་རྗེ་པད་དཀར་དུ། བྱང་ཕྱོགས་སུ་བསྟན་པ་ལ་དད་པ་ལྷར་སྐྱེ་ཞིང་། རབ་བྱུང་ཆོས་བཞིན་མི་སྤྱོད་པ་ལོག་པར་ལྟུང་། དེར་དགེ་བསྙེན་ཆོས་འཕེལ་ཞེས་པ་རྫུ་འཕྲུལ་དང་ལྡན་པ་འབྱུང་། ཞེས་པ་དང་། སངས་རྒྱས་ཕལ་པོ་ཆེར་ཡང་། བྱང་ཕྱོགས་སུ་དགེ་བསྙེན་ཆོས་འཕེལ་བྱ་བ་འབྱུང་ཞེས་འབྲོམ་སྟོན་པ་ཉིད་ལུང་བསྟན་པ་ཡིན་ནོ། །དེ་ནས་འབྲོམ་གྱི་དགོངས་པ་ལ། དལ་འབྱོར་མི་ལུས་ཐོབ་པར་དཀའ་བ་སྐྱེད་པའི་དུས་འདིར་ཆོས་རྣལ་མ་གཅིག་བྱེད་ན་འདི་ཙམ་གྱི་ཆོག་གམ་མི་ཆོག རྒྱ་གར་མཁས་པ་གཅིག་ལ་དྲི་བ་ལ་བར་དུ་ལོ་ཙཱ་བ་མི་དགོས་པ་བྱེད་དགོངས་ཏེ་པཎྜི་ཏ་སྒྲའི་ཚེར་མ་བྱ་བ་ལ་བི་ཝརྟ་ལ་སོགས་པ་བསླབས། ཁ་ཅིག་སྨྲྀརྟི་ཉྫཱ་ན་དང་གཅིག་པར་འདོད། དེ་ནས་ལོ་ཙཱ་མཁས་པར་བསླབས། དེ་ནས་སེ་བཙུན་གྱི་ཞལ་ནས་ཕ་དང་ཕྲད་པར་སོང་གསུངས་ཏེ། དགུང་ལོ་སོ་བརྒྱད་འགྲོ་བ་ལ་ཡར་བྱོན། བྱང་འཕྲང་ཁ་སོགས་ཆུ་ཁར་ཕེབས། འཕྲང་ཁ་བེར་ཆུང་གིས་ར་སྒྲེང་གི་དགོན་པ་ཕུལ། མངའ་རིས་སུ་ལྷ་བླ་མས་པཎྜི་ཏ་སྤྱངས་ཏེ་ཕེབས་