[A:༥༧ན]འཐུངས་ལ་སྒྲུབ་པ་གྱིས་གསུངས་པའི་གདམས་ངག་གནང་སྟེ། རུས་པ་ལྷག་རལ་རོལ་ཚོ་བསྡུས་ལ། བྱང་ར་སྒྲེང་ན་དཔལ་ལྡན་དགོན་པ་བའི་སྐུ་འབུམ་ཡོད་པ། དེའི་གྲིབ་མ་དང་སེར་བུ་ཕོག་སར་སྐྱོལ་ཅིག་གསུངས་ཏེ། དེ་ལྟར་བྱས་སོ། །དེ་ནས་ར་སྒྲེང་དུ་དཔལ་ལྡན་དགོན་པའི་རྗེས་སུ། པོ་ཏོ་བས་གདན་ས་ལོ་གསུམ་མམ། གཅིག་མཛད་ཀྱང་ཟེར་ཏེ། ཞང་ཆོས་རྒྱལ་ལ་སོགས་པ་ཁམས་པ་མ་རུང་པ་འགའ་ཞིག་གིས་བཞུགས་དབང་མ་བྱུང་པ་དང་། པོ་ཏོ་བ་རང་གི་མནལ་ལམ་དུ་ཡང་། ཞིང་ས་མ་དུལ་བ་སོགས་བྱུང་བས། དེར་མ་བཞུགས་པར་སྐུ་མཆེད་གསུམ་པོ་དཀའ་ཐུབ་ཀྱི་སྒོ་ནས་རི་སུལ་རྣམས་སུ་དྲང་སྲོང་གི་སྤྱོད་ཚུལ་གྱིས་གནས་ངེས་མེད་དུ་ཐུགས་དམ་དང་། གཞན་ཕན་གོང་འཕེལ་མཛད་པས། ར་སྒྲེང་དུ་གདན་ས་ལ་བར་སྟོང་ལོ་སུམ་ཅུ་ཙམ་དང་། ཆོས་ཚུལ་ལ་ཡང་དར་རྒུད་ཆེར་བྱུང་། དེ་ནས་སྐུ་མཆེད་གསུམ་གཤེགས་ནས་ལོ་གཅིག་གཉིས་ན། མཐའ་བཞི་སྒོམ་པ་བྱ་བ། སྟོན་པ་ལ་ཡང་ཐུག་ཅིང་། སྐུ་མཆེད་གསུམ་གྱི་སློབ་མ་ཡིན་པ། ཡིད་དམ་གྱི་ལྷ་མང་པོ་ཞལ་གཟིགས་ཅིང་། གཞན་དོན་འཕྲིན་ལས་ལ་དབང་འབྱོར་པ་དེས་བླ་མའི་གདན་ས་ཉམས་པའི་གཏམ་གསན་པས། ར་སྒྲེང་དུ་བྱོན་གནས་ཚུལ་རྣམས་གཟིགས་ཏེ། ཤར་པ་བ་ཞོའི་ཁང་པ་གནས་ན་བཞུགས་པ་དང་། བྱ་ཡུལ་བ་ཆེན་པོ། གླང་རི་ཐང་པ། ཀ་མ་པ། ལོར་སྡིང་པོ་བ་རྣམས་ཀྱི་དྲུང་དུ་བྱོན་ནས། ཁྱེད་རྣམས་བླ་མའི་གདན་ས་ལ་ཕྱིར་མིག་ལྟ་ན་དུས་ལ་བབ་ནས་འདུག་གསུངས་ཏེ་བསྐུལ་བས། དེ་རྣམས་ཀྱིས་གྲོགས་མཛད་འབུལ་བ་ཆེན་པོ་བྱུང་སྟེ།