[A:༥༧བ] ར་སྒྲེང་དུ་གྲྭ་ཚང་ཡང་མང་དུ་བཙུགས། བུད་མེད་དང་། ར་ལུགས་རྣམས་ཕུད། ཆོས་ཁྲིམས་ཤིན་ཏུ་དམ་པ་དང་། དགེ་འདུན་མང་པོ་ཡང་བཞུགས་པར་མཛད་དེ་ཆོས་སྲོལ་ཆེར་བཙུགས། ཚོགས་དཔོན་བཤེས་གཉེན་མཐའ་བཞིས་ལོ་ཤས་སུ་མཛད་དོ། །ཁྱད་པར་ཤར་བ་པས། ཀ་གཉིས་མའི་ནུབ་ཏུ་དབུ་རྩེ་ཀ་དགུ་མ་གཅིག་དང་པོར་བཞེངས་པ། ཕྱིས་དཔོན་གྱད་པ་དང་། ཟེར་གུ་ཆོས་གྲགས་གཉིས་ཀྱིས་མགོ་བྱས་བཟང་འདུས་བཅུ་དྲུག་བྱ་བས་བདག་རྐྱེན་བྱས་ནས། ཀ་ཆེན་བཅུ་དྲུག་ཡོད་པ་ལྷོ་སྒོར་བསྟན། ཉིས་ཐོག གསེར་འབྲུ། གསེར་བྱ་གཉིས་དང་བཅས་པ་བཞེངས། དེའི་ཁྱམས་སྨན་སྒང་ཕྱུག་པོ་བྱ་བས་བྱས་སོ། །པོ་ཏོ་བ་བཞུད་ནས། ལོ་མང་པོའི་བར་དུ་མཐའ་བཞི་ལ་སོགས་པ་སྒྲེས་པ་རེས་གྲལ་དབུ་ཙམ་མ་གཏོགས། གདན་སར་མིང་བཏགས་པ་དང་། འཆད་ཉན་སོགས་ཆེར་མེད་ལ་སྐབས་ཞིག་ཏུ་རྔོག་བློ་ལྡན་ཤེས་རབ་ལ་ཕུལ་བས། གསང་ཕུ་དང་སྦྲེལ་ཏེ་ལོ་ཁ་ཡར་དུ་ཆོས་བར་ཟླ་བ་གཅིག་གཉིས་ཙམ་བཞུགས་པ་ཡང་མཛད་དོ། །དེ་ནས་ཀ་གཉིས་མ་བཞེངས་ནས་ལོ་དགུ་བཅུ་རྩ་གསུམ་ལོན་པ་ས་ཕོ་འབྲུག་གི་ལོ་ལ་ཀ་བ་ཉི་ཤུ་རྩ་བཞི་མ་བཞེངས་པའི་སྦྱིན་བདག བྲང་ཁ་བེར་ཆུང་གི་བརྒྱུད་པ་སེའོ་གཞོན་ཚུལ་ཞེས་པ། སྤྱིར་ར་སྒྲེང་གི་སྐོར་དུ་ཞབས་ཏོག་ཆེར་མཛད། ཁྱད་པར་དབུ་རྩེ་ཀ་བ་ཉི་ཤུ་རྩ་བཞི། ཀ་གཉིས་མའི་ཤར་ཕྱོགས་སུ་བཞེངས་པར་འདོད་པ་ལ། རིན་ཆེན་སྒང་དུ་སངས་རྒྱས་དབོན་སྟོན་ལ་ས་སྤྱད་ཞུས་པས། ཤར་ནུབ་ནས་རྡོ་གཉིས་ཁྱེར་ཤོག་གསུངས་ཏེ། དེ་ལ་གཟིགས་པས། ཤར་ཕྱོགས་སུ་ཀླུའི་