[A:༥༨ན]རྒྱལ་པོའི་ཕོ་བྲང་ལ་གནོད་པར་འདུག་པས། ནུབ་ཕྱོགས་སུ་གྱིས་གསུངས་པས། བཤེས་གཉེན་ཞང་འོད་འཇོ་བས་ར་སྒྲེང་དུ་ལོ་བཅུ་གཉིས་བཞུགས་པའི་བཅུ་པའི་ཐོག་ཏུ་ས་ཆོག་མཛད། རྨང་བཏིངས། དེ་ནས་ལོ་གཉིས་ལྕགས་ཕོ་རྟའི་ལོ་བདུན་ཏུ་རྩ་གསུམ་པ་བྱ་ཟླའི་ཚེས་བཅོ་ལྔ་ལ་གཤེགས། འཕན་ཡུལ་ཇོག་པོ་འཆད་ཁར་བྱོན་པའི་བཤེས་གཉེན་ནམ་མཁའ་འབུམ་གྱི་བླ་མ་དེ་ཡིན་ནོ། །དེ་ནས་གཞོན་ཚུལ་གྱི་ཀ་བ་ཉི་ཤུ་རྩ་བཞི། ཉི་ཐོག ལྷོ་སྒོར་བསྟན། སྤེན་བད་གསེར་འབྲས་མཛེས་པ་བྱས། དེའི་ཁྱམས་སྨད་རྩོང་ཁ་ཤཀ་འབྱུང་གིས་བཞེངས། དེ་རྣམས་ཀྱི་རབ་གནས་པ་སངས་རྒྱས་དབོན་སྟོན་གྱིས་མཛད་དོ། །ཞང་འོད་འཇོ་བ་གཤེགས་ཁར་དགོན་པ་དང་གདན་ས། དགོན་འོད་འཇོ་བ་ལ་གཏད་ཀྱང་། ར་སྒྲེང་པ་གཞན་རྣམས་ཀྱིས་མ་ཕུལ་བ། སྒང་ཐང་དཀར་བས་ཐང་དཀར་དང་། ར་སྒྲེང་སྦྲེལ་ནས་ལོ་ཉི་ཤུ་རྩ་དགུ་གདན་ས་མཛད། ཆུ་མོ་བྱ་ལ་གཤེགས། དེར་རྗེས་སྔར་གྱི་འབྲེལ་པས་ཞང་འོད་འཇོ་བའི་སློབ་མ་དགོན་འོད་འཇོ་བ་ཡང་ཟེར། ཞོགས་པ་ཆེན་པོར་གྲགས་པ་དེས་གདན་ས་ལོ་བཅུ་དྲུག་མཛད། དེ་ནས་སྒང་ཐང་དཀར་བའི་རྗེ་དང་གཉིས་སུ་གྱེས་པས། དགོན་གོང་འོག་གཉིས་སུ་གྲགས་པ་བྱུང་ངོ་། གཉིས་པ་སྐུ་མཆེད་རིན་པོ་ཆེ་གསུམ་བྱོན་ཚུལ་ནི། དེ་ལྟར་བཤེས་གཉེན་སྟོན་པས་ར་སྒྲེང་དུ་བཀའ་གདམས་ཀྱི་ཆོས་སྲོལ་རྣམ་པར་དག་པ་བཙུགས་ཏེ་བཞུགས་པའི་དུས་སུ་འཕགས་པ་སྐུ་མཆེད་གསུམ་གྱི་བྱོན་ཚུལ་བཞིན་དུ་བསྟེན་ཏེ་ཡོན་ཏན་རྣམས་རྫོགས་པར་མཛད་དོ། །དེ་ཡང་བཤེས་གཉེན་ཕུ་ཆུང་བ་ནི།