[A:༥༨བ]རྒྱལ་གྱི་རའི་ཕུ་ཆུང་དུ་ལྕགས་མོ་ལུགས་ལ་འཁྲུངས། རུས་ཟུར་ཚང་། ཡབ་ཡུམ་འབྱོར་པ་ཆུང་ཡང་གསེར་ཞོ་དོ་བསྣམས་ནས། རྒྱལ་ལྷ་ཁང་དུ་ཞང་ཆེན་པོ་ལ་རབ་ཏུ་བྱུང་སྟེ། མཚན་གཞོན་ནུ་རྒྱལ་མཚན་དུ་བཏགས། ཁུ་སྟོན་ལ་ཕར་ཕྱིན་འགྲེལ་པ་དོན་གསལ་ཚར་བཅོ་ལྔ་དང་། འདུལ་མངོན་ལ་སོགས་པ་མང་དུ་གསན་ཏེ་ཐོས་པ་ཆེར་མཛད། སྣེ་ཐང་དུ་ཇོ་བོ་ལ་ཆོས་ཀྱི་འབྲེལ་པ་ཞུས་པས། མི་རྟག་པ་རང་འཁྲུངས་སུ་བྱུང་སྟེ་གང་ལ་ཡང་ཞེན་ཆགས་མེད་པའི་བློ་སྐྱེས་གསུངས། དེ་ནས་ར་སྒྲེང་དུ་བྱོན་པས། སྐུ་མཆེད་གཞན་གཉིས་ཀྱང་བྱོན་ཏེ་རྟེན་འབྲེལ་དང་། ཕ་རོལ་ཏུ་ཕྱིན་པའི་གདམས་ངག བསླབ་ཕྱོགས། སྤྱོད་ཕྱོགས་ཀྱི་སྐོར་རྣམས་ཞུས། ལོ་བདུན་བསྟེན། ཁོང་རང་ལ་ཆོས་ཞུས་མང་དུ་བྱུང་ཡང་། ཤ་ཟུག་བཟང་པོ་རང་བཟའ་བའི་དུས་ཡིན། གཞན་ལ་སྟེར་བའི་དུས་མིན་གསུངས་ནས་སྒྲུབ་པ་གཙོ་བོར་མཛད་པས། བདག་ལས་གཞན་གཅེས་པའི་བྱང་ཆུབ་ཀྱི་སེམས་དང་། ཆོས་ཐམས་ཅད་བདག་མེད་པར་རྟོགས་པའི་ཤེས་རབ་ཁྱད་པར་ཅན་འཁྲུངས། ཡི་དམ་མང་པོའི་ཞལ་གཟིགས། ཉམས་ལེན་བྱིན་རླབས་ཀྱི་བརྒྱུད་པའི་བཀའ་གཙོ་བོར་བབས། དེ་ནས་སྐུ་མཆེད་གསུམ་འབྲལ་མེད་དུ་སྒྲུབ་པ་མཛད་ཀྱིན་བཞུགས། ཕྱིས་ཡུང་ངའི་ཕུ་ཆུང་དུ་བཞུགས་ནས་ཀྱང་སྒྲུབ་པ་གཙོ་བོར་མཛད་དེ། བྲག་གི་དཀྱིལ་ན་གསེར་བྲེ་ཡོད་པ་མངོན་པར་མཁྱེན་པའི་དགོངས་ནས་ཕྱག་འཁར་གྱིས་རེག་པས་རང་བྱེ་སྟེ་བཏོན་པའི་རྗེས་དང་། གཟིམ་ཁང་གི་ནུབ་ན་བྲག་ལ་ཕྱག་མཛུབ་བཙུགས་སར་སྒྲུབ་ཆུ་དང་། ཞབས་རྗེས་དང་། དབུ་ཞྭའི་རྗེས་