[A:༦༠བ]ཁྱེད་མ་འཛོམས་སྙམ་ནས་ཡིད་ཆད་མི་དགོས། ང་གནས་བརྟན་བཅུ་དྲུག་གི་གཅིག་ཡིན་པས་ང་དང་མཇལ་བས་བསོད་ནམས་ཆེ་གསུངས། ཕྱིས་གནས་བརྟན་ཡན་ལག་འབྱུང་གི་སྤྲུལ་པར་ཞལ་གྱིས་བཞེས། ཟང་ཟིང་གི་དངོས་པོ་བྲེ་གང་ཡང་འཛིན་ཆགས་མི་མཛད། ཕྱིས་པོ་ཏོར་བཞུགས་ནས་གཟིམ་ཆུང་ཀ་གཉིས་མ་དཔེ་ཁང་དུ་གྲགས་པ་སོགས་ལ་བརྟེན་ནས་བཞུགས། གཞན་ཕན་མཆོག་ཏུ་གྱུར་ཏེ་དགུང་ལོ་དོན་དགུ་བཞེས་པ་བྱ་ལོ་ལ་པོ་ཏོར་ཡི་དམ་མང་པོ་ཞལ་གཟིགས། ཤར་ཕྱོགས་ཀྱི་ནམ་མཁའ་ལ་ལྷས་རོལ་མོ་དང་བཅས་ཏེ་སྤྱན་དྲངས་པ་སྣང་བ་ལས་དག་པ་རྣམས་ཀྱིས་མཐོང་། དེ་ན་ཕྱག་ཐལ་མོ་སྦྱར་ཏེ་སེམས་ཅན་རྣམས་ཀྱི་སྐྱབས་དང་མགོན་དུ་གྱུར་ཅིག་གསུངས་ཏེ་གཤེགས། གདུང་བཞུ་བས་ཐུགས་ལྗགས་དང་། རིང་བསྲེལ་ཁ་དོག་སྣ་ལྔ་མང་དུ་བྱོན། དེ་ནས་སྲས་ཆེན་བརྒྱད་ཀྱི་ཀ་བ་རེ་བཙུགས་པའི་དབུ་རྩེ་ཀ་བརྒྱད་མ་དང་། ཞང་སྟོན་ཤར་བ་པས་སྔར་གྱི་ཆོས་རའི་ས་ལ་ཁྱམས་ཀ་བ་ཉི་ཤུ་རྩ་ལྔ་ཡོད་པ་བཞེངས་སོ། །སྔོན་གྱི་གཏམ་བརྒྱུད་ལ་པོ་ཏོའི་སྒོ་ལ་སུ་འཛུལ་རྒྱལ། སྡིངས་མའི་ཆུ་ལ་སུ་འཐུང་རྒྱལ་ཟེར་བ་ལ་ཁ་ཅིག་པོ་ཏོའི་སྒོ་སྟེང་དུ། སྡིངས་མ་བའི་གཟིམས་ས་མཛད་པས་ཟེར་ཀྱང་། པོ་ཏོ་བ་ཆོས་གསུངས་བའི་སྒོ་ནང་དུ་སུ་ཚུད་རྒྱལ་ཟེར་བའི་དོན་ཡིན་ཞེས་བཀའ་གདམས་པའི་བླ་མ་གོང་མ་རྣམས་གསུང་བར་གྲགས། རྒྱས་པར་དོན་དུ་གཉེར་ན་རྣམ་ཐར་ཆེ་ཆུང་གཉིས་ལ་སོགས་པར་བལྟའོ། །འདི་ལ་སློབ་མའི་མཆོག་བཀའ་བབས་བརྒྱད་པ་སོགས་པ་བཀའ་གདམས་གཞུང་པའི་སྲོལ་འཛིན་བྱོན་ཚུལ་འོག་ཏུ་འཆད་དོ། །གྲུབ་པའི་དབང་ཕྱུག་ཆེན་པོ་སྤྱན་སྔ་ནི། འཁྲུངས་ཡུལ་ཉན་