[A:༦༠ན]གྱིས། སེམས་བཟང་པོར་གྱིས་དང་ཁྱད་པར་ཅན་ཅིག་དང་། འཕྲད་དེ་ཡོང་གིས་གསུངས། མདུན་ན་ཇོ་ལེགས་ཡོད་པས་སེམས་བཟང་པོ་བྱ་བ་བྱང་ཆུབ་ཀྱི་སེམས་ལ་ཟེར་བ་མ་ལགས་སམ། ཞུས་པས། ཡིན་མོད་གསུངས་པས་དེ་སྔ་ནས་མ་གོ་རྒྱུས་མེད་པ་ལ། དེས་གསལ་བཏབ་པ་འདྲ་བ་ཅིག་བྱུང་ནས། དེའི་ཐབས་ལྐོག་ཏུ་མན་ངག་ཏུ་ཡང་གསུངས། ཚོགས་སུ་ལུང་དང་སྦྱར་ནས་ཀྱང་གསུངས། ཐ་ན་བཀའ་སྐྱོན་ཚུན་ཆོད་ཀྱིས་ཀྱང་དེའི་ཐབས་གསུངས་ནས་ཡོད་པས་ལོ་གཉིས་ཙམ་དུ་མྱ་ངན་བསངས་པ་འདྲ་བ་ཅིག་བྱུང་། ཕྱིས་སེམས་བཟང་པོ་བྱེད་པ་ལ། ཁོང་རང་དགོས་པར་སོང་བས་མྱ་ངན་ལ་སངས་དུས་མ་བྱུང་གསུངས། ར་སྒྲེང་ནས་བྱོན་ཏེ་སྐུ་མཆེད་གསུམ། དང་པོ་ཀླུང་ཤོད་ན་མགོར་བཞུགས། དེས་ནས་གནས་ངེས་མེད་དུ་སྒྲུབ་པ་མཛད། ཐུགས་གཏིང་ཟབ་པས་ཡོན་ཏན་འདི་ཡོད་ཆེར་མི་གསུང་ཡང་། བྱང་ཆུབ་ཀྱི་ཐུགས་རང་འཁྲུངས་ཀྱི་ཚུལ་དུ་མངའ། ཡི་དམ་ལྷ་དཔག་ཏུ་མེད་པའི་ཞལ་གཟིགས། མངོན་པར་ཤེས་པ་རྒྱ་ཆེན་པོ་དང་ལྡན་པའི་ཚུལ་བསམ་གྱིས་མི་ཁྱབ་བོ། །གཞན་ཕན་མཛད་པའི་ཐོག་མར་ལམ་སྒྲོན། ཡོན་ཏན་མཐའ་ཡས་པར་བསྟོད་པ། བསླབ་བཏུས་སོགས་གསུངས་པས་གྲངས་སུམ་བརྒྱ་ཙམ་བྱུང་། དེ་ནས་རིམ་གྱིས་འཕེལ་ཏེ། གྲྭ་པ་ཉིས་སྟོང་ཙམ་འདུས། དེ་ཐམས་ཅད་ཀྱང་ཚེ་འདི་བློས་ཐོང་པ་ཤ་སྟག་ཡོད་པར་གྲགས། རམ་སྡིངས་མ་བསྲུང་ན་བཞུགས་དུས་ཆ་རྐྱེན་མེད་པས་གོས་ཅུང་ཟད་གནང་བ་ལ། འདི་ཡེ་མི་གནང་བར་ཞུ། བདག་གི་བློ་ཆུད་ཟོས་ནས། ཟད་དུས་དགེ་བཤེས་ཀྱིས་གནང་སྟེ་འོང་སྙམ་ནས་བརྣབ་སེམས་སྐྱེ་ཞུས་པས་