[A:60b]khyed ma 'dzoms snyam nas yid chad mi dgos/ nga gnas brtan bcu drug gi gcig yin pas nga dang mjal bas bsod nams che gsungs/ phyis gnas brtan yan lag 'byung gi sprul par zhal gyis bzhes/ zang zing gi dngos po bre gang yang 'dzin chags mi mdzad/ phyis po tor bzhugs nas gzim chung ka gnyis ma dpe khang du grags pa sogs la brten nas bzhugs/ gzhan phan mchog tu gyur te dgung lo don dgu bzhes pa bya lo la po tor yi dam mang po zhal gzigs/ shar phyogs kyi nam mkha' la lhas rol mo dang bcas te spyan drangs pa snang ba las dag pa rnams kyis mthong / de na phyag thal mo sbyar te sems can rnams kyi skyabs dang mgon du gyur cig gsungs te gshegs/ gdung bzhu bas thugs ljags dang / ring bsrel kha dog sna lnga mang du byon/ de nas sras chen brgyad kyi ka ba re btsugs pa'i dbu rtse ka brgyad ma dang / zhang ston shar ba pas sngar gyi chos ra'i sa la khyams ka ba nyi shu rtsa lnga yod pa bzhengs so/ /sngon gyi gtam brgyud la po to'i sgo la su 'dzul rgyal/ sdings ma'i chu la su 'thung rgyal zer ba la kha cig po to'i sgo steng du/ sdings ma ba'i gzims sa mdzad pas zer kyang / po to ba chos gsungs ba'i sgo nang du su tshud rgyal zer ba'i don yin zhes bka' gdams pa'i bla ma gong ma rnams gsung bar grags/ rgyas par don du gnyer na rnam thar che chung gnyis la sogs par blta'o/ /'di la slob ma'i mchog bka' babs brgyad pa sogs pa bka' gdams gzhung pa'i srol 'dzin byon tshul 'og tu 'chad do/ /grub pa'i dbang phyug chen po spyan snga ni/ 'khrungs yul nyan