[A:༦༤བ]ལྷས་པ་ཡེ་ཤེས་རྒྱལ་མཚན་ལ་བབས། སྟོང་ཉིད་ཀྱི་བལྟ་བས་དངོས་པོ་དང་མཚན་མར་འཛིན་པ་ཐམས་ཅད་འཇིག་ནུས་པ་ཡོད་པའི་བཀའ། རམ་སྡིངས་མ་བ་འབྱུང་གནས་རྡོ་རྗེ་ལ་བབས། རྩོད་པ་པཎྜི་ཏའི་རྒོལ་བ་ཡང་བཟློག་ནུས་པ་ཡོད་པའི་བཀའ། དོལ་པ་ཤེས་རབ་རྒྱ་མཚོ་ལ་བབས། བླ་མ་ལ་སངས་རྒྱས་དངོས་ཀྱི་མོས་གུས་རྒྱུན་ཆད་མེད་པའི་བཀའ། གཉལ་པ་ཆོས་འབར་ལ་བབས། དང་ཚུགས་མཆོག་ཟུང་ཅིག་ལ་འགྲན་ནུས་པ་ཡོད་པའི་བཀའ། གྲབ་པ་ཡོན་ཏན་འོད་ལ་བབས། རྒྱུན་དུ་དཀོན་མཆོག་གི་དྲུང་དུ་མཆོད་པ་ཁྲ་ལམ་མེ་བ་འབུལ་བ་ཡོད་པའི་བཀའ། དགེ་བཤེས་བྲག་དཀར་བ་ལ་བབས་སོ། །དེ་ཡང་གླང་རི་ཐང་པ་ནི། འཁྲུངས་ཡུལ་འཕན་ཡུལ་གཉའ་གོང་གསེར་མ་གཤོང་། ཡབ་ཇོ་བོ་དར་མ་མདོ་བཟང་གི་སྲས་སུ་རྟ་ལོ་ལ་འཁྲུངས། རུས་ཞུགས་ཚངས། ཁོང་རང་གི་ཞང་བོ་བཤེས་གཉེན་གྲོག་མོ་མཁར་པ་ལ་རབ་ཏུ་བྱུང་། མཚན་རྡོ་རྗེ་སེངྒེར་བཏགས། རྒྱལ་བ་འོད་དཔག་ཏུ་མེད་པའི་སྤྲུལ་པར་བྱེད་ལ། སྔོན་ལོ་ཙཱ་བ་ཀ་བ་དཔལ་བརྩེགས་སུ་སྤྲུལ་ནས་བསྟན་པ་ཆེར་གསལ་བར་མཛད་ཅིང་། འདིར་གདུལ་བྱ་བློ་དམན་པ་རྣམས་ཀྱི་ངོར། དང་པོ་ཤིན་ཏུ་བཀྲེན་པའི་ཚུལ་མཛད་དེ། ལོ་ན་སྤྱན་སྔ་བ་ལ་ཆོས་གསན་དུས། ཡོས་པར་བ་རེས་གདན་ནོན་མཛད་ཀྱིན་བཞུགས། དེ་ནས་བསོད་སྙོམས་མཛད་པའི་བསྙེན་པ་གང་བྱུང་སྤྱིར་དགེ་འདུན་དང་། ཁྱད་པར་པོ་ཏོ་བ་དཔོན་སློབ་ལ་དྲངས་པས། སྐུ་བསོད་སྐྱེས་པ་ལྟར་མཛད་དེ། གྲྭ་པ་ཉིས་སྟོང་ཙམ་འཚོགས་པའི་རྒྱགས་ཁོང་རང་གིས་གནང་། གནས་ངེས་མེད་དུ་བཤད་སྒྲུབ་ཟུང་འབྲེལ་