[A:༦༥ན]དུ་མཛད། གཙོ་བོར་པོ་ཏོ་བ་ལ་ཡུན་རིང་དུ་བསྟེན། ཕུ་ཆུང་བ་དང་། ཁམས་ལུང་བ་ཆེན་པོ་སོགས་ལ་ཡང་ཆོས་གསན། པོ་ཏོ་བ་གཤེགས་ནས། ཐང་གྲོང་ལྟག་ཏུ་གཏོར་མ་མཛད་དུས། གཏོར་སྡེར་བྱ་རོག་གིས་ཁྱེར་ཏེ་གླང་ཐང་གི་ཤར་རི་དེའུ་དེའི་ཁར་བཞག་པས། དཔོན་ཤཱཀྱ་བྱ་བས་ཞབས་ཏོག་བྱས་ཏེ་དེར་ལོ་གསུམ་སྒྲུབ་པ་མཛད། ཞོལ་དུ་སྒྲུབ་ཆུ་ཡང་བྱུང་། ཉིན་མཚན་དབྱེར་མེད་དུ་བྱང་ཆུབ་སེམས་ཀྱི་ཏིང་ངེ་འཛིན་སྒོམ་པའི་མདངས་ལ། ཀླུ་མོ་སྤུན་གསུམ་གྱིས་གླང་ཐང་གི་གནས་ཕུལ། དགེ་འདུན་གྱི་སྡེ་འཛུགས་པར་ཞུས། ཕྱིས་རི་དེའི་སྟེང་ནས་ཡར་འཕུར་ཏེ། ཐུགས་དམ་གྱི་ཕྲེང་བ་སྐྱུར་སར་ཁྲོན་པ་བྲུས། དབུ་ཞྭ་སྐྱུར་སར་བླ་བྲང་བྱས་ཏེ་དགོན་པ་བཏབ། སློབ་མ་མང་དུ་འདུས། བཀའ་གདམས་གཞུང་དྲུག ལམ་སྒྲོན་སོགས་ལ་འཆད་ཉན་མཛད་ཅིང་། བདག་གཞན་བརྗེ་བའི་བྱང་ཆུབ་ཀྱི་སེམས་ཁོ་ན་གཙོ་བོར་མཛད་དེ། གསུང་ལས་ཀྱང་། ཁོ་བོས་རླུང་ཐ་མལ་དུ་གཏོང་མ་མྱོང་གསུངས། ཞལ་བཞུགས་རིན་གླང་ཐང་གི་ལྕགས་རིའི་ནང་དུ་སྲོག་ཆགས་རྣམས་ཅིག་ལ་ཅིག་མི་འཚོ་བར་གྲགས། དགུང་ལོ་བདུན་ཅུ་པ་ཡོས་ལོ་ས་ག་ཟླ་བའི་ཉེར་གསུམ་ལ་དཔེའི་ཆུ་ལུང་དུ་གཤེགས། རྒྱ་ལྕགས་རི་གོང་ཁ་བ་ནི། ཁམས་སུ་གླང་རི་ཐང་པའི་སྙན་པ་ཐོས་པས། དབུས་སུ་ཆོས་ལ་འབྱོན་པའི་འདུན་པ་ཡོད་པས། གླང་རི་ཐང་པས་མཁྱེན་ནས་དེར་བྱོན། བགེགས་བསྐྲད། གཏོར་མས་བྱིན་གྱིས་བརླབས་པས་མིའི་ལུས་སུ་གྱུར། སྲིན་མོ་ཅིག་གི་གནོད་པས་ཕོ་བོ་དྲུག་འདས། ཁོང་རང་ཡང་སྔགས་ཀྱི་བཅིངས་ཏེ། ཁྱིའི་ལུས་སུ་བསྒྱུར་ཀྱང་། གླང་རི་ཐང་པ་ལ་མཇལ་བར་མགྲོན་པོའི་ཕྱི་ལ་ཡོང་།