[A:༦༦བ]གྲབ་ཕུའི་ཕོ་བྲང་སྡིངས་ཏེ། ཁོང་རང་གཞོན་དུས་ནས་ཐོས་པ་ཆེ་བས། དང་པོ་པོ་ཏོ་བ་ལ་ཆོས་ཀྱི་ཚོད་ལྟར་བྱོན་ཀྱང་། ཕྱིས་མི་ཕྱེད་པའི་དད་པ་སྐྱེས་ཏེ། ལྐོག་ཆོས་ལོ་བཅུ་དྲུག་གསན། པོ་ཏོ་བའི་གསུང་བགྲོས་བསྒྲིགས་པ། དཔེ་ཆོས་རྩ་འགྲེལ་མཛད་དོ། །དགེ་བཤེས་བྲག་དཀར་བ་ནི། སྤྲེའུ་ལོ་ལ་འཁྲུངས། འཁོར་བཞི་བརྒྱ་ཙམ་འདུས། དཔེ་ཆོས་གསན་པའི་ཆེད་དུ་གྲབ་པའི་སློབ་མ་མཛད། བརྒྱད་ཅུ་ཐམས་པ་ཡོས་ལོའི་དགུན་ཟླ་ཐ་ཆུང་གི་ཉེར་གཉིས་ལ་གཤེགས། དེའི་སློབ་མ་སློབ་དཔོན་བྱང་ཆུབ་སྣང་བ་པ། དེའི་སློབ་མ་གྲུབ་ཐོབ་གཅེས་སྒོམ། དེའི་སློབ་མ་སྐྱེར་སྒང་པ་ལ་སོགས་པ་བྱོན་ནོ། བཀའ་བབས་རྣམས་ཀྱི་ནང་ནས་ཞང་སྟོན་ཤ་ར་བ་པོ་ཏོ་བའི་ཆོས་སྲོལ་འཛིན་པའི་མཆོག་སྟེ། འདི་ལ་སློབ་མའི་མཆོག་བཀའ་བབས་ལྔར་གྲགས་པ་ནི། བྱང་ཆུབ་ཐུགས་ཀྱི་བཀའ་བབས་བྱ་འཆད་ཁ་བ། བྱིན་རླབས་ཀྱི་བཀའ་བབས་གཏུལ་སྟོན་བློ་གྲོས་གྲགས། གཞུང་བཤད་ཀྱི་བཀའ་བབས་དམ་པ་སྟབས་ཁ་བ། རྣམ་ཐར་གྱི་བཀའ་བབས་ཉི་མའི་འདུལ་འཛིན། ལོངས་སྤྱོད་ཀྱི་བཀའ་བབས་རྣལ་འབྱོར་ཤེས་རྡོར་རོ། །དང་པོ་བྱ་འཆད་ཁ་བ་ནི། འཁྲུངས་ཡུལ་ལོ་རོ། གདུང་རུས་ཇ། ཡབ་འཕགས་པ་སྐྱབས། ཡུམ་བསོད་ནམས་སྐྱིད་ཀྱི་སྲས་སུ་སྦྲུལ་ལོ་ལ་འཁྲུངས། སློབ་དཔོན་དྭགས་པོ་གཙང་འདུལ་ལ་རབ་བྱུང་ཞུས། མཚན་ཡེ་ཤེས་རྡོ་རྗེར་བཏགས། གཉལ་དུ་ངོར་རྗེ་བཙན་པོའི་ཆོས་འཁོར་ལ་བྱོན་པས། བ་རི་ལོ་ཙཱ་བ། རྔོག་ལོ་ཙཱ་བ་སོགས་སྡེ་སྣོད་འཛིན་པ་མང་པོ། གྲུབ་མཐའི་རྣམ་དབྱེ་འབྱེད་པ་