[A:༦༩ན]བསོད་གྲགས་པ། རྒྱལ་སྲས་ཐོགས་མེད་པ་སྟེ། དེ་རྣམས་ཀྱི་རྣམ་ཐར་ཆོས་རྗེ་མཚལ་མིན་པ་བསོད་ནམས་བཟང་པོས་མཛད་པར་གསལ་ལོ། །བྱིན་རླབས་ཀྱི་བཀའ་བབས་གཏུམ་སྟོན་བློ་གྲོས་གྲགས་ནི། གདུང་རུས་གཏུམ། འཁྲུངས་པ་ལྕགས་མཁར་སྟེ། ཤ་ར་བ་སོགས་བཀའ་གདམས་ཀྱི་བླ་མ་མང་དུ་བསྟེན། དེ་ནས་སྣར་གྱི་མདའི་ཐང་ལ་ལོ་ར་ཡོད་པར་སྤྱིལ་བུ་མཛད་དེ། ཆུ་མོ་བྱའི་ལོ་ལ་གཞི་བཙུགས་སྣར་ཐང་གི་དགོན་པ་བཏབ་སྟེ། ལོ་བཅུ་བཞི་བཞུགས། གྲྭ་པ་སྟོང་ཙམ་འདུས་པའི་གྲགས་ཆེ་པ་རྡོ་སྟོན་རྡོ་རྗེ་གྲགས། བདུད་རྩི་གྲགས་ཞག་བཙུན་རྡོ་རྗེ་འོད། སྒ་སྟོན་ཤེས་རབ་གྲགས་རྣམས་ལས་རྡོ་རྟོན་རྡོ་རྗེ་གྲགས་ལ་ཉིད་ཀྱི་དགོན་པ་འདི་བཟུང་ལ་འགྲོ་དོན་སྐྱོངས་གསུངས་ནས། ཁོང་རང་བྱང་རྟ་སྡེའི་ཆོས་ལུང་དུ་ཐུགས་དམ་ལ་བཞུགས་ཏེ། ཆོས་ལུང་སྐུ་གཤེགས་སུ་གྲགས། རྡོ་སྟོན་གྱི་གདན་ས་ལོ་ཉི་ཤུ་མཛད། དེ་ནས་ཞང་བཙུན་རྡོ་རྗེ་འོད་ཀྱིས་གདན་ས་ལོ་བརྒྱད་མཛད། དཔལ་ལྡན་གྲོ་མོ་ཆེ་བ་ནི། གདུང་རུས་གྲོ། འཁྲུངས་ཡུལ་ཆུ་སྒོ་བ། མཚན་བདུད་རྩིའི་གྲགས། ཡི་དམ་མང་པོ་དང་གནས་བརྟན་བཅུ་དྲུག་ཞལ་གཟིགས། སྣར་ཐང་གི་དབུ་རྩེ་རྙིང་མ་བཞེངས། གདན་ས་ལོ་སུམ་ཅུ་སོ་དགུ་མཛད། དེ་ནས་ཞང་སྟོན་ཆོས་ཀྱི་བླ་མས་གདན་ས་ལོ་བཅུ་མཛད་དེ། དེ་ནས་སངས་རྒྱས་སྒོམ་པས་གདན་ས་ལོ་བཅུ་མཛད་དེ། ཚོགས་ཆོས་ཆེན་མོར་གྲགས་པ་དང་། ལམ་སྒྲོན་ཊཱིཀྐ་སོགས་མཛད་ཅིང་། དབེན་གནས་བྱང་ཆེན་བཏབ། གཉལ་ཞིག་གི་སློབ་མ་གྲགས་པ་སེངྒེ་སྤྱན་