[A:༦༩བ]དྲངས་ཏེ་མཚན་ཉིད་ཀྱི་བཤད་གྲྭ་བཙུགས། དེ་ནས་འཆིམ་ནམ་མཁའ་གྲགས་པ་ཞེས་བྱ་བ། གདུང་རུས་འཆིམ། ཉང་སྟོད་སྨོན་གྲོའི་ཤུ་ཁའུ་བྱ་བར་སྐུ་འཁྲུངས། གནས་བརྟན་བཅུ་དྲུག་གི་གཅིག་ཏུ་གྲགས། མཁྱེན་རབ་དང་འཕྲིན་ལས་ཆེ་བས་རྩོམ་ཆོས་མང་དུ་མཛད་ཅིང་། གདན་ས་ལོ་སུམ་ཅུ་རྩ་དྲུག་མཛད། ཆོས་རྒྱལ་འཕགས་པའི་བླ་མ་ཡང་མཛད་ནས། ཆོས་འཁོར་ཆེན་པོ་ཅིག་གི་གྲལ་དབུ་ལ་སྤྱན་འདྲེན་ཞུས། དེ་ནས་སྐྱེ་སྟོན་པར་གྲགས་པས་གདན་ས་ལོ་བཅོ་ལྔ་མཛད་དེ། སྣར་ཐང་གི་གཙུག་ལག་ཁང་ཆེ་བ་དང་ལྕགས་རི་སོགས་མཛད། དེ་ནས་ཆོས་རྗེ་ཉི་མ་བ། མཁན་ཆེན་འདུལ་བ་འཛིན་པ། འཆིམ་བློ་བཟང་གྲགས་པ་སོགས་དཔལ་སྣར་ཐང་དུ་བཀའ་གདམས་པའི་བཤེས་གཉེན་བཟང་ལ་མང་བ་རིམ་པར་བྱོན་པ་ཡིན་ནོ། །གཞུང་བཤད་ཀྱི་བཀའ་བབས་དམ་པ་སྟབས་ཁ་བས། སྟབས་ཁ་གྲྭ་པའི་སྒང་། འདོད་འཇོ་ཆོས་ཀྱི་སྒང་། ཁྲ་ཕུ་ལོངས་སྤྱོད་ཀྱི་སྒང་སྟེ་དགོན་པ་གསུམ་བཏབ། གྲྭ་པ་བརྒྱད་བརྒྱ་ཙམ་འདུས། གྲགས་ཆེ་བའི་ཞང་བཞི་ནི། ཞང་སྟོན་འདོད་འཇོ་བ་དར་མ་གཡུང་དྲུང་། ཞང་སྟོན་ཁང་མོ་ཆེ་བ། ཞང་སྟོན་ཤོ་མ་ར་བ། ཞང་སྟོན་གཙོ་ཐང་པ་ཆེན་པོའོ། །ཐུགས་ཀྱི་སྲས་བཞི་ནི། སྒང་ཐང་དཀར་བ་རྡོ་རྗེ་རིན་ཆེན། གུ་ར་བ་ཚུལ་ཁྲིམས་རྡོ་རྗེ། སྟབས་ཁའི་རྣལ་འབྱོར་པ་ནམ་མཁའ་རིན་ཆེན། ཁྲ་ཕུ་བ་འདུལ་བ་འཛིན་པའོ། །འདོད་འཇོ་ཞང་སྟོན་དར་མ་གཡུང་དྲུང་ལ་གཏད། དེ་ནས་རོང་སྟོན་ཁ་པོ་ཆེས་བསྐྱངས་སོ། །ཁྲ་ཕུ་འདུལ་འཛིན་པས་བསྐྱངས་ཏེ། དེ་ལས་