[A:༧༤བ]་བྱ་ཡུལ་བ། ཤ་པ་གླིང་པ། དགེ་བཤེས་སྒྲེ་བ། སྙུག་གྲུམ་པ། རྒྱ་ལྕགས་རི་གོང་ཁ་བ་དང་ལྔ་ལ་བཀའ་གདམས་གསན། དེ་ནས་སྒྲུབ་པ་བྱ་དགོངས་ནས་ཁོང་རང་གི་ཡབ་མེས་ཀྱི་བརྩིགས་པའི་གསེར་ཁ་བྱ་བའི་གཙུག་ལག་ཁང་ཡོད་སར་བྲང་ཁང་བརྩིགས། ཕ་ཞིང་ལ་ཡོན་བདག་བྱས་ཏེ་སྒྲུབ་པ་བྱེད་པའི་དུས། ཉིན་ཅིག་ལྕགས་རིའི་ལྷོ་ཕྱོགས་སུ་སྐྱོ་སངས་ལ་བྱོན་པ་ན། སྤྲང་པོ་གསུམ་ལས། རྗེ་བཙུན་མི་ལའི་སྙན་པ་གསན་པས། དད་པའི་རྐྱེན་བྱས་ཏེ། ཕ་ཞིང་གསེར་ཞོ་བཞི་དང་ཆ་ཞོ་གང་ལ་བཙོངས་ནས། དགེ་བཤེས་རྒྱ་ལྕགས་རི་བ་དང་། བྱ་ཡུལ་པ། སྙུག་གྲུམ་ལ་རྣམས་ལ་ཕྱི་ཕྱག་མཛད་པས། བྱ་ཡུལ་བའི་ཞལ་ནས། ཁྱེད་རྣལ་འབྱོར་པ་ཁྱི་ཐུལ་ཅན་གྱི་སྤྱན་སྔར་མ་འགྲོ ཅིས་ཀྱང་འགྲོ་ན་ངེད་ཀྱི་རྟགས་རྣམ་ཐར་མ་དོར་བ་ཤོག་ཅིག ལར་སེར་ཁ་ལ་ཕན་ན་ཁྱི་ཚིལ་ཡང་སྨན་ཡིན། ཟངས་ངེད་ཀྱི་བརྡུངས་ནས་ཟངས་སྐད་མི་ཡིས་འདོན་པ་ཅིག་འོང་བར་འདུག་སྟེ། ཐབས་མེད་གསུངས། སྙུག་གྲུམ་པའི་ཞལ་ནས། ཁྱོད་ཀྱི་ང་རྒས་ཁར་མ་བོར་བ་ཤོག་ཅིག་གསུངས། དེ་ནས་མི་ལ་དང་མཇལ་གདམས་ངག་གི་ཐུགས་ཚིམ་པར་མཛད། འཕྲིན་ལས་མཐའ་ཡས་ཤིང་། དགས་ལྷ་སྒམ་པོར་དགུང་ལོ་བརྒྱད་ཅུ་བར་དུ་བཞུགས་ཤིང་། རྣམ་ཐར་རྒྱས་པ་བཀའ་བརྒྱུད་གསེར་ཕྲེང་སོགས་སུ་གསལ་ལོ། །འདི་དག་བཀའ་གདམས་ཀྱི་བརྒྱུད་པ་དངོས་སུ་མི་འཛིན་ཀྱང་། བཀའ་ཕྱག་ཟུང་འབྲེལ་བས་གྲགས་པས་སློབ་མའི་ཁོངས་སུ་གཏོགས་པ་ཡིན་ནོ། །དེ་ནས་ལོ་བྱ་ཡུལ་གྱི་གདན་པ་རིམ་པར་བྱོན་